बेबिलोन के बिरूध अगमबानी
1 समुंदर तीर के मरू-भुइयां के बिरूध अगमबानी:
जइसन दक्खिन के भुइयां ले आंधी आथे,
वइसन ही मरू-भुइयां ले,
आतंक के देस ले एक हमला करइया आवत हवय।
2 एक भयानक दरसन मोला देखाय गीस:
बिसवासघाती ह बिसवासघात करथे अऊ लूटनेवाला ह लूटथे।
हे एलाम, हमला कर! हे मादै, घेराबंदी कर!
मेंह ओ सब कराहना ला खतम कर दूहूं, जऊन ह ओकर कारन आय हवय।
3 एकर कारन मोर देहें म भारी पीरा हे,
छेवारी होवत माईलोगन के पीरा सहीं मोला पीरा होवत हे;
जऊन बात मेंह सुनत हंव, ओकर ले मेंह डर गे हंव,
जऊन चीज ला मेंह देखत हंव, ओकर ले घबरा गे हंव।
4 मोर हिरदय ह कांपत हे,
डर के मारे मेंह कांपत हंव;
जऊन संझा के मेंह रसता देखत रहेंव
ओह मोर बर आतंक के बात हो गे हवय।
5 जेवन के तियारी होवत हे,
ओमन ओनहा बिछावत हें,
ओमन खावथें, ओमन पीयथें!
हे हाकिममन, उठव,
ढालमन म तेल लगावव!
6 परभू ह मोला ये कहत हे:
"जाके एक पहरेदार ठहिरा दे
अऊ जऊन कुछू ओह देखथे, ओला आके बतावय।
7 जब ओह रथमन ला
घोड़ामन के दल के संग देखथे,
जब ओह गदहामन के सवार
या ऊंटमन के सवारमन ला देखथे,
त ओह सावधान हो जावय,
पूरा सावधान हो जावय।"
8 अऊ ओ पहरेदार21:8 कुछू हस्तलिपि म सिंह ह चिचियाके कहिस,
"हे मालिक, हर दिन मेंह ठाढ़ होके पहरा देथंव;
हर रात मेंह पहरा म काटथंव।
9 देखव, एक आदमी एक रथ म
घोड़ामन के एक दल के संग आवथे।
अऊ ओह जबाब देथे:
‘गिर परिस, बेबिलोन गिर परिस!
येकर देवतामन के जम्मो मूरतीमन
गिरके भुइयां म चकनाचूर हो गीन।’ "
10 कोठार म कुचरे गय हे मोर मनखेमन,
जऊन बात मेंह सर्वसक्तिमान यहोवा,
इसरायल के परमेसर ले सुने हंव,
ओला मेंह तुमन ला बतात हंव।
एदोम के बिरूध अगमबानी
11 दूमा21:11 दूमा येह एदोम के दूसर नांव, जेकर मतलब होथे चुपचाप के बिरूध अगमबानी:
सेईर म ले कोनो मोला बलावत हवय,
"हे चौकीदार, रथिया के का खबर हे?
हे चौकीदार, रथिया के का खबर हे?"
12 चौकीदार ह कहिस,
"बिहान पहाथे, पर रथिया घलो होथे।
यदि तेंह पुछे चाहत हस, त पुछ;
अऊ फेर लहुंटके आ।"
अरब के बिरूध अगमबानी
13 अरब के बिरूध अगमबानी:
हे ददानीमन के रसता रेंगइया दलमन,
जेमन अरब के झाड़ीमन म डेरा डालथव,
14 पीयासन करा पानी लानव;
तुमन, जेमन तेमा नगर म रहिथव,
भगोड़ामन बर जेवन लेके आवव।
15 ओमन तलवार के डर ले भागत हें,
मियान ले खींचे तलवार ले,
ताने गय धनुस ले
अऊ भारी लड़ई ले भागत हवंय।
16 परभू ह मोला ये कहत हे: "जइसे ठेका म बंधे बनिहार ह येला गनथे, एकेच बछर के भीतर, केदार गोत्र के जम्मो सोभा खतम हो जाही। 17 केदार के धनुसधारी, सूरबीरमन ले थोरकन ही रह जाहीं।" यहोवा, इसरायल के परमेसर ह कहे हवय।