यसायाह 27

इसरायल के छुटकारा

1 ओ दिन,*27:1 या दंड के ओ दिन

यहोवा ह अपन तलवार ले—

अपन भयंकर, बड़े अऊ मजबूत तलवार ले—

लिबयातान नांव के टेड़गा रेंगइया सांप,

लिबयातान नांव के कुंडली मरइया सांप ला दंड दीही;

ओह समुंदर के बड़े अऊ बिकराल जन्तु ला मार डारही।

2 ओ दिन—

"फर देवइया एक अंगूर के बारी के बारे म गीत गाहू:

3 में, यहोवा ह येकर रकछा करथंव;

मेंह लगातार येमा पानी पलोथंव।

मेंह रात-दिन येकर पहरेदारी करथंव,

ताकि कोनो येकर हानि झन करंय।

4 मेंह गुस्सा नइं करत हंव।

यदि मोर आघू म उहां सिरिप झाड़ी अऊ कांटामन होतिन!

त मेंह ओमन के बिरूध लड़े बर आघू बढ़तेंव;

मेंह ओ जम्मो म आगी लगा देतेंव।

5 या फेर ओमन मोर मेर सरन लेय बर आवंय;

ओमन मोर संग म मेल-मिलाप कर लेवंय,

हव, ओमन मोर संग मेल-मिलाप कर लेवंय।"

6 अवइया दिनमन म याकूब ह जरी धरही,

इसरायल ह बढ़ही अऊ ओमा फूल धरही

अऊ पूरा संसार ला फर ले भर दीही।

7 का यहोवा ह ओला वइसने मारिस

जइसने ओह ओमन ला मारिस, जेमन ओला मारिन?

का ओह वइसने मार डारे गीस

जइसने ओमन मार डारे गीन, जेमन ओला मार डारिन?

8 लड़ई अऊ बंधुवई के दुवारा तें ओकर संग लड़—

अपन भयंकर आंधी ले ओह ओला भगा देथे।

जइसे एक दिन पुरवाही हवा चलथे।

9 तब एकर दुवारा, याकूब के अधरम के पछताप करे जाही,

अऊ ओकर पाप दूर होय के फर ये होही:

जब ओह बेदी के जम्मो पथरामन ला

चूना के पथरा सहीं कुचरके कुटा-कुटा कर देथे,

तब कोनो असेरा के खंभा*27:9 असेरा देवी के लकड़ी के खंभा या धूप के बेदी ला

सही-सलामत नइं छोंड़े जाही।

10 काबरकि गढ़वाला नगर निरजन हो गे हवय,

एक छोंड़े गय बस्ती ला निरजन जगह सहीं तियाग दिये गे हवय;

उहां बछवामन चरथें,

उहां ओमन बईठथें;

अऊ येकर डंगालीमन ला खाके ठुठवा कर देथें।

11 जब येकर छोटे डंगालीमन सूख जाथें, त ओमन टूट जाथें

अऊ माईलोगनमन आके ओमन ला जला देथें।

काबरकि येमन बिगर समझवाले मनखे अंय;

एकरसेति ओमन के बनानेवाला ओमन ऊपर दया नइं करय,

अऊ ओमन के सिरिस्टी करइया ह ओमन ऊपर किरपा नइं करय।

12 ओ दिन यहोवा ह फरात नदी ले लेके मिसर के नरवा तक अपन अनाज ला पछिनही, अऊ हे इसरायलीमन, तुमन एक-एक करके इकट्ठा करे जाहू। 13 अऊ ओ दिन एक बड़े तुरही फूंके जाही। जेमन अस्सूर देस म नास होवत रिहिन अऊ जेमन मिसर देस म बंधुवई म रिहिन, ओमन आहीं अऊ यरूसलेम म पबितर पहाड़ ऊपर यहोवा के अराधना करहीं।