यसायाह 35

छोंड़ाय गय मनखेमन के आनंद

1 मरू-भुइयां अऊ सूखा भुइयां खुस होहीं;

निरजन भुइयां ह आनंद मनाही अऊ उहां फूल धरही।

मरू-भुइयां ह मगन होके, 2 केसर के सहीं फूल धरही;

येह बहुंत आनंदित होही अऊ आनंद के मारे जय-जयकार करही।

लबानोन के महिमा येला दिये जाही,

अऊ येकर सोभा करमेल अऊ सारोन के सहीं होही;

ओमन यहोवा के महिमा,

हमर परमेसर के सोभा ला देखहीं।

3 ढीला हांथमन ला मजबूत करव,

कमजोर माड़ीमन ला मजबूत करव;

4 घबरानेवाला मनखेमन ला कहव,

"मजबूत बनव, झन डरव;

तुम्हर परमेसर ह आही

ओह बदला लेय बर आही;

ईस्वरीय बदला के संग

ओह तुम्हर उद्धार करे बर आही।"

5 अंधरामन के आंखी खोले जाही

अऊ भैंरामन के कान घलो खोले जाही;

6 तब खोरवा ह हिरन सहीं कूदही

अऊ कोंदामन अपन जीभ ले आनंद के मारे जय-जयकार करहीं।

काबरकि बंजर भुइयां म पानी के सोता फूट निकलही

अऊ मरू-भुइयां म नदी बोहाय लगही;

7 घाम ले बरत भुइयां ह तरिया बन जाही

अऊ सूखा भुइयां म सोतामन फूटहीं।

अऊ एक समय जिहां सियारमन रहत रिहिन

उहां घांस अऊ नरकट अऊ सरकंडा जामही।

8 अऊ उहां एक राजमार्ग होही;

येला पबितरता के रद्दा कहे जाही;

ये रद्दा ह ओमन बर होही, जेमन ओ रद्दा म रेंगथें।

कोनो असुध जन ओमा ले होके नइं जा सकही;

दुस्ट मुरूख मनखेमन येमा ले होके नइं जा सकहीं।

9 उहां कोनो सिंह नइं होही,

अऊ न ही कोनो हिंसक पसु;

ये पसुमन उहां नइं मिलहीं।

पर सिरिप छोंड़ाय गय मन ओमा रेंगहीं,

10 अऊ जेमन ला यहोवा ह बचाय हवय, ओमन लहुंटके आहीं।

ओमन गीत गावत सियोन म आहीं;

सदाकाल के आनंद ह ओमन के मुड़ के मुकुट होही।

खुसी अऊ आनंद ले ओमन भर जाहीं,

अऊ दुख अऊ पीरा के अन्त हो जाही।