1 पतरास 4

2 एतो नतिज़अ हणअ इहअ कि आजू निं तेऊ मणछा आपणीं ज़िन्दगी कदुष्ट काम करनै ज़ुंण एऊ संसारे मणछ हर बगत करनअ च़ाहा। पर तेऊ करनअ तिहअ ज़िहअ परमेशर तेऊ लै करना लै बोले।

3 पैहलै च़ाहा तै तम्हैं इहै काम करनै ज़ेथ विश्वास नांईं करनै आल़ै मज़अ लागा त, तम्हैं करा तै आपणीं ज़िन्दगी कदुष्ट काम करना लै बरैबाद ज़िहअ कि शराब अर खाणैं पिणैं दी, कंज़रैई दी अर नशर्म नाच़-खेल्हा दी अर मुहुर्ती पूज़ा दी ज़ेता का परमेशर नफरत करा।

4 तैही हआ तिन्‍नां थारै पराणैं साथी रहैनी कि तम्हैं निं इहै भारी इना कदुष्ट कामां दी तिन्‍नें साझ़ू हंदै अर तैही करा तिंयां थारी निंदा। 5 पर एक धैल़ी एछणी एही बी ज़रूर ज़ेभै तिन्‍नां परमेशरा सम्हनै इना सोभी बूरी गल्‍लो साब-कताब लागणअ दैणअ। परमेशर आसा सोभी लोगे नसाफ करना लै तैर, च़ाऐ तिंयां अज़ी ज़िऊंदै आसा, च़ाऐ तिंयां पैहलै होए मरी गऐ दै।✝4:5 2 तिम. 4:1

6 तैही खोज़अ तिन्‍नां मणछा का बी मसीहा खुशीओ समाद ज़ुंण पैहलै ई थिऐ मरी गऐ दै। एही ता भुगती तिन्‍नैं सोभी मणछा ज़ेही सज़ा अर तिंयां मूंऐं, पर ऐबै आसा तिंयां आत्मां दी परमेशरा संघै सदा ज़िऊंदै।

परमेशरे भलै भढारी

7 एऊ संसारो अंत आसा छ़ेक्‍कै हणैं आल़अ, तैही करा तम्हैं आप्पू सबर, संघा रहा सादै-सिधै रही प्राथणां करदै लागी।✝4:7 इफि. 6:18; याक. 5:8