1 Pedro 5

2 ज़िहअ एक फुआल आपणीं भेडा हेरअ-भाल़अ रहा लागी, तम्हैं बी रहा तिन्‍नां हेरै-भाल़ै लागी ज़ुंण परमेशरै तम्हां का आसा सभाल़ै दै। एता करा दिला का किल्हैकि परमेशर च़ाहा इहअ ई कि तम्हैं करे। इहअ निं सिधअ तै करा कि तम्हां लै बोलअ कुंणी ज़बरदस्ती विश्वासीए हेर-सभाल़ करना लै। एऊ कामां निं एते तैणीं करा कि तम्हां लै कुंण ढब्बै दैए पर थारै दिलै लोल़ी असली दी परमेशरे अर लोगे च़ाकरी करने च़ाहा हुई। 3 ज़ुंण लोग तम्हां का सभाल़ै दै आसा, इहअ निं समझ़ा कि तिन्‍नां प्रैंदै आसा थारअ राज़, पर तम्हैं करा एही च़ाकरी कि तिंयां तम्हां का शिखल़े। 4 मसीहा ईशू आसा हाम्हां लै सैणैं फुआला ज़िहअ, ज़ेभै सह भिई फिरी एछणअ, तेभै दैणअ तेऊ तम्हां लै शोभलअ मुगट नांम तेतो झ़ामण निं कधि खतम हणअ।

5 ऐबै बोला हुंह तम्हां ज़ुआन मणछा लै कि टोली दी ज़ुंण थारै सैणैं विश्वासी आसा तम्हैं रहा तिन्‍नें डरा हेठै। एकी दुजे करनी सादै-सिधै रही च़ाकरी किल्हैकि हाम्हैं सका पबित्र शास्त्रा दी इहअ लिखअ द पहल़ी कि

"परमेशर करा घमंडी मणछो बरोध, पर

सादै-सिधै मणछा लै करा झींण।"