1 शमूएल 22

दाबेद रहअ जुहल़ी लुक्‍की

1 दाबेद ठुर्हअ गात नगरी का दूर संघा रहअ अदुलाम नगरी नेल़ एकी जुहल़ी लुक्‍की। ज़ांऊं दाबेदे ईज-बाब, भाई अर होरी टबरा का थोघ लागअ कि सह आसा तिधी, तिंयां आऐ तिधी तेऊ सेटा लै। 2 होर लोग बी आऐ तिधी दाबेदा सेटा। तिन्‍नां मांझ़ै तै कई इहै ज़हा खास्सी खरी ती पल़ी दी, ज़हा खास्सअ ऋण त पल़अ द अर ज़हा खास्सी घाटी ती आई दी। इहअ करै हुऐ तिधी कोई च़ार शौ मणछ दाबेदा संघै कठा अर तिन्‍नों प्रधान बणअ दाबेद।

3 तिधा का डेऊअ दाबेद मोआब मिज़पा नगरी लै संघा बोलअ मोआब देशे राज़ै लै, "ज़ीबाण, मेरै ईजा-बाबा दै तेभै तैणीं आपणैं देशै रहणैं ज़ेभै तैणीं मुखा थोघ जाए लागी कि बिधाता मुल्है किज़ै आसा लाअ द करी।" 4 इहअ करै डाहै दाबेदै आपणैं ईज-बाब मोआब देशे राज़ै सेटा अर तिंयां रहै तधा बाद तेतरै धैल़ै तैणीं तिधी ज़ेतरै धैल़ै तैणीं दाबेद जुहल़ी लुक्‍की रहअ। 5 तेखअ आअ गाद नाओं एक गूर दाबेदा सेटा लै संघा बोलअ इहअ, "तूह निं इधी जुहल़ी लुक्‍की रहै! तूह डेऊ एकी बारी यहूदा मुल्खा लै फिरी।" तेखअ डेऊअ दाबेद तिधा का संघा रहअ हेरेत नाओंए बणैं।

6 तेखअ हुअ इहअ कि शाऊल त गिबा नगरी मधनूंए बूटा हेठै आपणैं हाथै बर्छ़अ लई बेठअ द अर तेऊए कार-करिंदै तै तेऊ फेर खल़्हुऐ दै। तेऊ का खोज़अ कुंणी इहअ कि दाबेद अर तेऊए आदमीओ थोघ गअ लागी। 7 तेखअ बोलअ शाऊलै आप्पू फेर खल़्हुऐ दै कार-करिंदै लै, "तम्हैं बिन्यामीन गोत्रा आल़ै शूणां मेरी गल्‍ल! तेऊ ईशैईए शोहरू दाबेदै कै तम्हां लै ज़ैगा-ज़िम्मीं अर दाखे बाग आसा दैणैं किऐ दै? तेऊ कै तम्हैं सैना दी दलपति कि सैनापति आसा लाऐ दै बणाईं? 8 तैही आसा तम्हैं मुल्है द्रोह करी एक्‍कअ किअ द? तम्हां मांझ़ै निं मुखा एकी बी खोज़अ कि मेरै आपणैं ई शोहरू आसा ईशैईए शोहरू दाबेदा संघै सांठ-गांठ किई दी! नां तम्हां मांझ़ै मुखा कुंणी इहअ खोज़अ कि दाबेद ज़ुंण मेरअ ई आदमी थिअ, सह आसा आझ़ मुंह मारने मोक्‍कै लोल़अ लागअ द अर मेरअ आपणअ शोहरू आसा तेऊ लै च़ेही दैंदअ लागअ द कि तूह कर इहअ।"

9 एदोम खिंबो दोएग त तिधी शाऊले कार-करिंदै संघै खल़्हुअ द, तेऊ बोलअ इहअ, "मंऐं भाल़अ ईशैईओ शोहरू दाबेद नोब नगरी आहीतूबे शोहरू आहीमोलक प्रोहता सेटा डेऊंदअ। 10 आहीमोलकै पुछ़अ दाबेदा लै बिधाता, संघा दैनी तेऊ दाबेदा लै खाणें च़िज़ा अर पलिश्ती जोधै गोलियाथे तलबार बी दैनी तेऊ लै।"

11 राज़ै शाऊलै छ़ाडै तोब नगरी लै दूत संघा किअ हुकम कि आहीतूबो शोहरू आहीमोलक अर नोब नगरी तेऊए खिंबे सोभै प्रोहत लोल़ी राज़ै सेटा लै आऐ। ज़ांऊं तिंयां सोभै आऐ, 12 शाऊलै बोलअ, "आहीमोलक, आहीतूबे शोहरूआ, शुण।"

आहीमोलकै बोलअ, "ज़ी मालक, कै हुकम आसा।"

13 शाऊलै पुछ़अ तेऊ का, "तूह अर ईशैईओ शोहरू दाबेद किल्है आसा मेरै द्रोही हुऐ दै? तंऐं किल्है दैनी तेऊ लै खाणें च़िज़ा अर तलबार? अर तंऐं किल्है पुछ़अ तेऊ लै बिधाता? आझ़ आसा सह मेरअ द्रोही हुअ द अर सह आसा तेऊ मोक्‍कै भाल़अ ताखुई रहअ द कि केभै पाणअ हुंह तेऊ मारी!"

14 आहीमोलकै दैनअ ज़बाब, "माहा राज़अ, तेरै सोभी कार-करिंदै मांझ़ै आसा दाबेद तेरअ सोभी का भरोस्सैमंद! सह आसा तेरअ आपणअ ज़ुआंईं अर तेरै खास सपाहीओ दलपति, तेरी सभा दी करा सोभै तेऊओ खास्सअ अदर। 15 हाँ, मंऐं पुछ़अ दाबेदा लै बिधाता अर इहअ बी निं आथी कि अह किअ मंऐं पैहली बारी। रही ताल्है द्रोह करने गल्‍ल, माहा राज़अ, एही गल्‍लो दोश नां मुल्है लाई अर नां मेरै खिंबा लै लाई। किल्हैकि मुंह तेरै च़ाकरा का निं इना गल्‍ले बारै थोघ आथी हेरे कि किज़ै हुअ!"

16 शाऊल राज़ै बोलअ, "आहीमोलक, तूह पाणअ मुंह तेरै सारै खिंबा संघी मारी।"

17 तेखअ किअ राज़ै शाऊलै आप्पू नेल़ तिन्‍नां सपाही लै हुकम, "बिधाते इना सोभी प्रोहता पाआ मारी! इने बी आसा दाबेदा संघै सांठ-गांठ! इना का थिअ थोघ कि सह आसा मुखा दूर ठुर्हअ द, पर इनै निं मुखा खोज़अ!" पर शाऊले तिन्‍नां सपाही मांझ़ै निं कोह बिधाते प्रोहता मारना लै आजू आऐ। 18 तेखअ बोलअ राज़ै शाऊलै दोएगा लै, "तूह मार इना!" एदोमी दोएगै पाऐ तिंयां सोभ मारी। तैहा धैल़ी पाऐ पजैस्सी प्रोहत मारी ज़ुंण बाछे खास च़ोल़ै बान्हीं बिधाते च़ाकरी करा तै। 19 प्रोहते नोब नगरी बी बझ़ैल़ै राज़ै शाऊलै, प्रोहते ईज-बाब, मर्ध-बेटल़ी, शोहरू-शोहरी अर च़ूई झुटणैं आल़ै शोहरू संघी सोभ मारी पाणै। गाऊई-बल्द, गाधै, भेडा-बाकरी मांझ़ै बी निं तेऊ किछ़ ज़िऊंदै छ़ाडै।

20 पर आहीतूबो पोचअ आहीमोलको एक शोहरू अबतार छ़ुटअ तिन्‍नां का ज़िऊंदअ अर सह ठुर्हअ तिधा का संघा पुजअ दाबेदा सेटा। 21 तेखअ खोज़ी अबतारै दाबेदा का पठी गल्‍ला कि शाऊलै किई बिधाते सोभी प्रोहते हत्या। 22 दाबेदै बोलअ अबतारा का, "ज़धू मंऐं सह एदोमी दोएग आहीमोलका सेटा तिधी भाल़अ त, मंऐं हेरअ त ज़ाणीं कि एऊ हेरनअ ज़रूर शाऊला का खोज़ी। मुंह पिछ़ू हुई तेरै सारै खिंबे हत्या। 23 तूह रहअ मुंह संघै, ताह निं डरने ज़रुरत आथी। शाऊल च़ाहा मुंह अर ताह दुही मारनअ। पर मुंह संघै रहणअ तूह बच़ी।"