1 थोल़ै धैल़ै बाद हुअ इहअ कि पलिश्ती झाल़ी इज़राईली संघै जुध छ़ेल़णा लै आपणीं सैना अर आकीश राज़ै बोलअ दाबेदा लै, "मेरै साबै गई ताह समझ़ एछी कि ताह अर तेरै आदमी हुअ मुंह बाखा इज़राईली संघै जुध करनअ।"

2 दाबेदै बोलअ, "हाँ, हुंह आसा तेरअ दास, ताखा बी जाणअ आप्पै शुझुई कि हुंह किज़ै सका करी।"

आकीशै बोलअ, "ठीक आ, तूह डाहणअ मुंह तेखअ सदा आप्पू ई संघा मेरी फाज़त करनै आल़अ शूरबीर।"

3 शमूएल गूर त मरी गअ द, सोभी इज़राईली लाई ती तेऊ लै आपणीं हिक्‍का पटाक्‍की लेरा संघा त सह रामाह नगरी दाबी हेरअ द ज़िधी तेऊओ घअर थिअ। शाऊलै तै मणशाण झ़ैऊंणै आल़ै आपणैं देशा का बागै काढै दै।

4 पलिश्ती हुऐ कठा संघा पाऐ शूनेम नगरी नेल़ जुधा लै आपणैं डेरै। शाऊलै बी झाल़ै इज़राईली संघा पाऐ पलिश्ती संघै मकाबलै करना लै गिलबा धारा डेरै। 5 ज़ांऊं शाऊला का पलिश्तीए सैना शुझुई, तेऊ फिरअ तिन्‍नां भाल़ी डरै दर्छ़णअ। 6 शाऊल लागअ बिधाता पुछ़दअ कि हुंह किज़ै करूं? पर बिधाता निं तेऊ लै किछ़ै ज़बाब दैनअ, नां धैनै-सुपनै बिधाता किज़ै खोज़अ, नां प्रशण बाही अर नां कहा गूरा का बाती तेऊ संघै बिधाता गल्‍ला किई। 7 तेखअ किअ शाऊलै आपणैं कार-करिंदै लै हुकम, तम्हैं आणा कहा बेटल़ी लोल़ी ज़ुंण मणशाण झ़ैऊआ।

तिन्‍नैं बोलअ, "एनदोर नगरी आसा एक बेटल़ी ज़ुंण मणशाण झ़ैऊआ।"

8 शाऊलै बदल़अ आपणअ भेश, घेरी बान्हैं आम झिकल़ै, आप्पू संघा निंयैं दूई मणछ संघा पुजअ राचो-राच तैहा बेटल़ी सेटा। तेऊ बोलअ तैहा लै, "तूह पुछ़ मुल्है मणशाण अर ज़सरअ नाअं हुंह खोज़ूं, तूह झ़ैऊ तेऊओ मणशाण?"

9 तैहा बेटल़ी दैनअ ज़बाब, "तूह किल्है आसा मुंह पटंकदअ लागअ द, तंऐं किल्है लाई हुंह मारनै बझ़ैल़ी? ताखा थोघ निं आथी कि शाऊलै काढै मुंह ज़िहै मणशाण झ़ैऊंणै आल़ै इज़राईल देशा का दूर!"

10 शाऊलै काढै तैहा सेटा सोह संघा बोलअ इहअ, "ज़िऊंदै बिधाते नाओंऐं दैआ हुंह ताल्है ज़बान कि एता पिछ़ू निं ताल्है किछ़ै हंदअ।"

11 तेखअ पुछ़अ तैहा बेटल़ी, "हुंह ताल्है कहा मणछो मणशाण झ़ैऊं?"

शाऊलै दैनअ ज़बाब, "शमूएलो!"

12 ज़ांऊं तैहा बेटल़ी का शमूएल शुझुअ, तैहा पाई ज़ोरै लैल़ा संघा बोलअ शाऊला लै इहअ, "तंऐं किल्है दैनअ मुल्है धोखअ? तूह आसा राज़अ शाऊल!"

13 राज़ै बोलअ तैहा लै, "डरै निं आथी! खोज़, ताखा कै शुझिआ?"

तैहा बोलअ राज़ै शाऊला लै, "मेरै मालक, मुखा शुझिआ एक देअ धरती का उझै निखल़दअ।"

14 शाऊलै पुछ़अ तैहा का, "एऊए नर्हांग कहा ज़ेही आसा?"

तैहा बेटल़ी बोलअ, "एक प्रोढअ मणछ शुझिआ मुखा च़ोल़अ बान्हीं उझै एछदअ।"

तेखअ हेरअ शाऊलै ज़ाणीं कि अह आअ शमूएल, तेऊ टेक्‍कअ धरनीं उटी बाखा शमूएला लै माथअ।

15 शमूएलै बोलअ शाऊला लै, "तूह किल्है आसा मुंह हंतदअ लागअ द? तंऐं किल्है फरेऊअ हुंह बापस?"

शाऊलै दैनअ ज़बाब, "मुल्है पल़ी खास्सी आफ़त! पलिश्ती आसा मुंह संघै जुधा लै डेरै पाऐ दै अर बिधाता बी डाहअ हुंह कल्ही शोटी! ऐबै नां सह मेरै धैनै-सुपनै एछदअ अर नां मुंह संघै कहा गूरा बाती गल्‍ला करदअ। तैही शादअ मंऐं तूह ताकि तूह मुखा खोज़े कि हुंह ऐबै किज़ै करूं?"

16 शमूएलै बोलअ इहअ, "ज़ै बिधाता ताह कल्ही शोटी तेरअ दुशमण आसा बणी गअ द, तै किज़ू आसा तूह मुंह पुछ़दअ लागअ द? 17 बिधाता किअ ताल्है तिहअ ई ज़िहअ तेऊ मुखा पैहलै ई त खोज़ी हेरअ द। तेऊ दैनअ ताखा राज़ छ़ड़ैऊई दाबेदा लै। 18 तंऐं निं ज़िहअ बिधाता बोलअ तिहअ किअ अर तंऐं निं अमोलकी अर तिन्‍नें ज़ैदात पठी खतम किऐ! तैही आसा बिधाता आझ़ तेरी एही दशा किई दी। 19 बिधाता दैणअ इहअ हणैं कि काल्‍ला हारनै इज़राईली पलिश्ती का! अर तूह अर तेरअ शोहरू बी पुजणैं काल्‍ला इधी मुंह सेटा मूंऐं दै मणछे संसारै।"

20 शाऊल पल़अ धरनीं उटी बाखा लाम्मअ संघा लागअ शमूएले गल्‍ला शूणीं डरै काम्बदअ। तेऊ निं तेखअ सारी धैल़ी नां राची रोटी खाई अर तेऊए मूंऐं तराण पठी। 21 तेखअ डेऊई सह बेटल़ी शाऊला सेटा, ज़ांऊं तैहा भाल़अ कि तेऊ निं हैल़ी हांस ई रहै, तेखअ बोलअ तैहा तेऊ लै, "माहा राज़अ, तेरी गल्‍ला मनी मंऐं आपणीं ज़ान खातरै दी पाई। 22 ऐबै आसा मेरी ताल्है ज़ीबाण करी अरज़ कि ज़िहअ हुंह बोला तूह कर तिहअ। हुंह आणू ताल्है धख रोटी संघा खा तेता। ताकि ताह बाता हांढणा लै तराण फिरे।"

23 शाऊलै किअ नांईं कि मुंह निं किछ़ै खाणअ। तेऊ संघै आऐ दै तिन्‍नैं आदमी बी किई तेऊ लै रोटी खाणें अरज़। ज़ांऊं तिन्‍नैं खास्सअ ज़ोर लाअ तै उझ़ुअ खिरी शाऊल धरना का खल़अ संघा बेठअ मांज़ै प्रैंदै। 24 तेखअ बणाईं तैहा बेटल़ी झ़ट-पटै तेऊ लै धाचअ द बाछ़ू काटी शिखा तेखअ मुछ़अ धख ज़िहअ पिठअ संघा बणाईं बाझ़ी सज़ेल़े रोटी। 25 तेखअ दैनी शाऊला सेटा खाणां लै अर तिन्‍नैं सोभी खाई रोटी संघा लागै तैहा ई राची हांढदै।