1 शमूएल 19

शाऊलै हंतअ दाबेद खास्सअ

1 शाऊलै बोलअ एकी धैल़ै आपणैं शोहरू जोनातान अर आपणैं कार-करिंदै लै कि दाबेद पाणअ हाम्हां मारी। पर शाऊलो शोहरू जोनातान झ़ूरा त दाबेदा लै खास्सअ अर 2 तेऊ हेरी ईंयां गल्‍ला दाबेदा का खोज़ी, "मेरअ बाब च़ाहा ताह मारी पाणअ। काल्‍ला दोत्ती डाहै तूह धैन। तूह रह किधी एही ज़ैगा लुक्‍की ज़ेतो कोही का थोघ निं लागे, संघा रहै तिधी। 3 मुंह आणनअ आपणअ बाब तेस्सी बाती संघा करनीं मुंह तेरै बारै तेऊ संघै गल्‍ला, ज़ै मुखा किज़ै होर बी थोघ लागे, तेता बी हेरुं हुंह ताखा खोज़ी।"

4 जोनातानै किई आपणैं बाब शाऊला सेटा दाबेदे सर्राफी, "माहा राज़अ, आपणैं दास दाबेदा लै निं ज़ुल्म करी! तेऊ निं तेरअ किछ़ै बूरअ किअ, तेऊ किई हर गल्‍ला लै तेरी ई मज़त ज़ेथ तेरअ ई भलअ होए। 5 तेऊ निं आप्पू मरने परबाह बी किई। दाबेदै मारअ भाल़ पलिश्ती गोलियाथ अर तेऊ करै दैनी बिधाता इज़राईला लै बडी ज़ीत। तेता भाल़ी हुअ त तूह बी खुश। तै ऐबै किल्है च़ाहा तूह थोघै बाझ़ी दाबेदा मारनअ? नर्दोश मणछे हत्या करनैओ पाप किल्है लाअ आप्पू लै पाई?"

6 शाऊला गम्मी जोनाताने गल्‍ला संघा खाऐ तिधी तेऊ इहै सोह, "हुंह खाआ बिधाते सोह, मुंह निं दाबेदा मारनै दैणअ।" 7 जोनातानै शादअ दाबेद संघा खोज़ी तेऊ का ईंयां पठी गल्‍ला। तेखअ निंयं तेऊ सह शाऊला सेटा। दाबेद लागअ तेखअ पैहलै ई ज़िहअ राज़ै शाऊले च़ाकरी करदअ।

8 तेतरी गअ पलिश्ती संघै भिई जुध लागी। दाबेद डेऊअ पलिश्ती संघै जुधा लै अर तेऊ मारै तिंयां इहै कि तिन्‍नां पल़अ पिछ़ू बापस ठुहर्नअ।

9 एकी धैल़ै दैनअ बिधाता भिई शाऊला दी भूत बस्सणै। सह थिअ आपणैं घअरै बेठअ द अर तेऊए हाथै त बर्छ़अ अर दाबेद त तेऊ सेटा बींन बाज़दअ लागअ द। 10 शाऊलै सोठअ इहअ कि एऊ लै बाहणअ मुंह इहअ ज़ोरै बर्छ़अ कि एऊ बाती लोल़ी बर्छ़अ पिछ़ू भित्ती दी खुभअ। दाबेद ठुर्हअ तिधा का तैहा राची दूर अर इहअ करै बच़अ सह तधू।

मिकलै बच़ाऊअ दाबेद

11 तैहा ई राची छ़ाडै शाऊलै आपणैं दूत दाबेदे घअरा लै कि काल्‍ला दोत्ती रहै तेऊ मारना लै ताखुई। दाबेदे लाल़ी मिकलै हेरअ दाबेदा का इहअ खोज़ी सह चतैन करी, "ज़ै तूह आझ़ राची इधा का बच़ी दूर निं डेओए, दोत्ती पाणअ तूह इना मारी।"

12 मिकलै थुआल़अ दाबेद ताक्‍की बाती उंधै बागा लै, संघा ठुर्हअ दाबेद तिधा का दूर अर सह बच़अ। 13 मिकलै डाहै तेऊए कऊंचा प्रैंदै आपणैं घअरे देबते मुहुर्ती सताऊई, मुंडा बाखा डाही बाकरीए शेली करै बणाईं दी शरैहण अर प्रैंदी डाहअ च़ादरू छ़ैई। 14 राज़ै शाऊलै छ़ाडै दाबेदा ढाकदै दूत, मिकलै बोलअ तिन्‍नां का, "तेऊ आसा दाह लागी दी।" 15 शाऊलै छ़ाडै आपणैं दूत दाबेदा भाल़ै इहअ बोली भितरा लै, "तेऊ आणा कऊंचा संघी मुंह सेटा लै, मुंह मारनअ ई सह।" 16 तिंयां डेऊऐ भितरा लै अर तिन्‍नैं भाल़अ कि कऊंचा प्रैंदै आसा कुल़ज देअए मैहरै डाहै दै सताऊई अर मुंडा बाखा आसा बाकरीए शेलीए शरैहण! 17 शाऊलै पुछ़अ मिकला का, "तंऐं किल्है किअ मुंह संघै धोखअ? तंऐं किल्है दैनअ मेरै दुशमणा डेऊणैं कि सह बच़े?"

तैहा दैनअ ज़बाब, "तेऊ बोलअ मुल्है, ‘तूह कर मेरी इधा का बच़णा लै मज़त, नांईं ता मुंह पाणीं तूह ई मारी।’"

शमूएलै बच़ाऊअ दाबेद

18 तिधा का बच़ी डेऊअ दाबेद रामाह नगरी शमूएल गूरा सेटा संघा खोज़ी तेऊ का पठी गल्‍ला कि शाऊलै तेऊ संघै किहअ-किहअ किअ। तेखअ डेऊऐ तिंयां दुहै ज़ण्हैं नबाओत गराऊंऐं संघा रहै तिधी। 19 शाऊला का हेरअ कुंणी खोज़ी कि दाबेद आसा रामाह नगरी नबाओत, 20 तेऊ छ़ाडै आपणैं दूत दाबेदा ढाकदै। शाऊले आदमी भाल़अ तिधी कि गूरो छ़ुंढ आसा मिट्टदी-छ़ेर्हदी आजू हणैं आल़ी गल्‍ला प्रगट करदै लागै दै। शमूएल आसा तिन्‍नां सोभी गूरो सैणअ। शाऊले तिन्‍नां आदमी दी बी बस्सी परमेशरे आत्मां अर तिंयां बी लागै तिन्‍नां ई ज़िहै मिट्टदै-छ़ेर्हदै। 21 ज़ांऊं इना गल्‍लो थोघ शाऊला का लागअ, तेऊ छ़ाडै आपणैं होर दूत अर तिंयां बी लागै तिहै ई मिट्टदै-छ़ेर्हदै। 22 तेखअ आअ शाऊल आप्पै रामाह नगरी लै। ज़ांऊं सह सेकू बडै कुहै सेटा पुजअ, तिधी लागअ सह पुछ़दअ, "शमूएल अर दाबेद किधी आसा?" कुंणी खोज़अ तेऊ का, "तिंयां आसा नबाओत गराऊंऐं।" 23 तेखअ डेऊअ अह रामाह नगरीए नबाओत गराऊंआं लै। बाता हेरअ सह बी परमेशरे पबित्र आत्मां बशै करी अर सह बी लागअ सारी बाता मिट्टदअ-छ़ेर्हदअ ज़ोरै-ज़ोरै बोल्दअ। 24 तेऊ खोल्है आपणैं झिकल़ै पोर्ही संघा लागअ शमूएला सम्हनै मिट्टदअ-छ़ेर्हदअ। संघा रहअ तैहा सारी धैल़ी अर सारी राची धरनीं नांगअ बधल़ूई। तधा का निखल़ी एही कहाबत, "शाऊल बी ऐबै गूर निखल़अ?"