1 ज़ांऊं शमूएल प्रोढअ हुअ, तेऊ बणाऐं आपणैं शोहरू इज़राईली प्रैंदै पांच़। 2 तेऊए तै तिंयां दूई ई शोहरू, ज़ेठै नाअं त जोएल अर कान्हैं नाअं त अबियाह। तिंयां करा तै बेर्शेबा नगरी रही लोगो नसाफ। 3 पर तिन्‍नों सभाब निं आपणैं बाब शमूएला ज़िहअ आथी त। तिन्‍नां त सिधअ ढब्बैओ मांण अर तिंयां खाआ तै लोगा का रेशपत संघा निं शुचअ नसाफ करदै तै।

4 खिरी हुऐ सोभै इज़राईलीए सैणैं कठा संघा डेऊऐ रामाह नगरी शमूएला सेटा। 5 तिन्‍नैं बोलअ शमूएला लै इहअ, "भाल़, तूह ता गअ ऐबै प्रोढअ हई अर तेरै शोहरूओ सभाब निं ताह ज़िहअ सभाब आथी! ऐबै छ़ांट तूह हाम्हां प्रैंदै राज़ करना लै एक राज़अ, तै हणअ म्हारै बी नसाफ करना लै राज़अ, ज़िहअ होरी देशै आसा।"✝

6 शमूएल त तिन्‍नें ऐहा गल्‍ला का नराज़ कि तिन्‍नैं पाई राज़े मांग। सह लागअ एते बारै बिधाता का प्राथणां करी पुछ़दअ। 7 बिधाता बोलअ शमूएला लै इहअ, "शमूएल, ज़िहअ ईंयां बोला, तूह कर तिहअ ई। अह निं इहअ आथी कि ईंयां निस्सै ताह मनी! अह गल्‍ल बोली इनै मुल्है कि हुंह निं इना आप्पू प्रैंदै राज़अ लोल़ी! 8 ज़धकै मंऐं ईंयां मिसर देशे गलामी का काढै, तधकै आऐ ईंयां कबल्‍लै मुंह छ़ाडी होरी देअआ पूज़दी! तिहअ ई लाअ इनै आझ़ तूह छ़ाडी। 9 तैही बोला हुंह ताल्है, ज़िहअ ईंयां बोला तूह कर तिहअ ई, पर इना लै डाह पैहलै ई चतैनगी दैई कि राज़ै आजू इना संघै किहअ बभार करनअ।"

10 ज़ुंण इज़राईली सैणैं राज़े मांग करदै तै लागै दै, शमूएलै खोज़अ तिन्‍नां का इहअ कि बिधाता बोलअ इहअ-इहअ। 11 शमूएलै खोज़अ इहअ, "राज़ैओ राज़ हणअ तम्हां प्रैंदै इहअ कि तेऊ राज़ै बणाणीं थारै शोहरू करै आपणीं सैना, तिन्‍नां मांझ़ै कोऐ हणैं जुधा लै रथा-घोल़ै च़लाऊंदै अर कोऐ हणैं तेऊए रथा आजू-आजू पैदल ठुहर्दै लागै दै, 12 कोई हणैं हज़ार-हज़ार सपाही प्रैंदै दलपति अर कोऐ हणैं पज़ाह-पज़ाह सपाही प्रैंदै दरोगै। एता का लाऊआ डाहणैं तेऊ कोऐ राज़ै आपणैं खेचै हल़ा लांदै अर लऊंदै लाई। कोऐ डाहणैं तेऊ जुधा लै अस्त्र-शस्त्र अर रथे समाना बणाऊंदै लाई।

13 "थारी शोहरी डाहणीं तेऊ खुशबूदार तेला काढदी अर कोऐ राज़ दरबारै सोभी रंगे खाणैं-पिणैं बणाऊंदी मल़ेगी लाई। 14 राज़ै दैणैं थारै रज़दै-पज़दै खेच, राम्बल़ै-राम्बल़ै जैतून अर दाखे बाग आपणैं कार-करिंदै लै। 15 तेऊ निंणअ थारै नाज़ अर दाखो दसुअ निसब मांगी संघा दैणअ सह आपणैं बज़ीर अर होरी कार-करिंदै लै।

16 "थारै दास-दासी, राम्बल़ै-राम्बल़ै डागै अर गाधै निंणै राज़ै, संघा डाहणैं तेऊ तिंयां आपणैं कामां करदै लाई। 17 थारी भेडा-बाकरीए हेल़्ही मांझ़ै बी हर दसा मांझ़ै एक आप्पू लै अर इहअ करै हणैं तम्हैं आप्पू ई राज़े गलाम। 18 खिरी एछणी तम्हां गल़ै तैणीं घाटी अर तम्हैं लागणै तेऊ राज़ै का आज़ाद हणां लै बिधाता सेटा लेर-पकार पाई अरज़ करदै ज़ुंण तम्हैं आप्पै छ़ांटअ! पर बिधाता निं तेभै तम्हां लै किछ़ै ज़बाब दैणअ।"

19 इज़राईली निं शमूएले इना चतैनगी बाखा धैन दैनअ, तिन्‍नैं बोलअ इहअ पै, "हाम्हैं निं मंदै, हाम्हां लोल़ी राज़अ ई, 20 तै हणैं हाम्हैं बी होरी देशा ज़िहै अर म्हारै बी हणअ नसाफ करनै आल़अ राज़अ ज़ुंण हाम्हां बाखा जुध करना लै हाम्हां आजू डेओए।"

21 शमूएलै शूणीं तिन्‍नें गल्‍ला पठी संघा खोज़ी तिंयां गल्‍ला बिधाता का। 22 बिधाता दैनअ शमूएला लै ज़बाब, "ज़िहअ ईंयां बोला, तूह कर तिहअ ई, अर तिन्‍नां लै छ़ांट एक राज़अ।"

तेखअ बोलअ शमूएलै इज़राईली लै, "ठीक आ बै, तम्हैं डेओआ आपणीं-आपणीं नगरी आपणैं घअरा लै फिरी।"