1 शमूएल 10

1 शमूएलै पाअ शिंगी दी जैतूनो तेल संघा तरैल़अ शाऊले मुंडै, तेऊए माथै माख्खी दैई बोलअ शमूएलै इहअ, "बिधाता किअ तेरअ अभिषेक कि तूह हणअ तेऊए आपणीं खास परज़ा इज़राईलीओ सैणअ। 2 मुंह सेटा का डेऊई ज़ांऊं तूह आझ़ बिन्यामीन गोत्रे मुल्खे सिऊंआं नेल़ ज़ेलज़ा नाओंए ज़ैगा, राहेले घोरी सेटा पुजणअ, तिधी भेटणैं ताह दूई मणछ। तिन्‍नां खोज़णअ तम्हां का इहअ कि ज़ुंण गाधी लुक्‍की ती, तिंयां गई भेटी अर तेरअ बाब आसा तिन्‍नां बिस्सरुई गअ द, ऐबै आसा तेऊ तेरअ हैल़अ-फिकर पल़अ द! सह रहा इहअ बोल्दअ लागी, ‘ऐबै हुंह आपणैं शोहरू केस्सी लोल़ूं!’

3 "तिधा का रहै आजू हांढदै लागी ज़ांऊं तैणीं ताबोर नाओंए बडै महरूए बूटा सेटा निं पुजे। तिधी भेटणैं तम्हां चअन मणछ। तिंयां हणैं बिधाता लै बल़ीदान करदै बेतेला लै च़ाल्‍लै दै। तिन्‍नां मांझ़ै एकी का हणैं चअन छ़ेल्हू, दुजै का हणैं चअन रोट अर चिऊथै हणीं दाखे रसे शिंगी च़की दी। 4 तिन्‍नां पुछ़णी तम्हां का राज्ज़ी-खुशी संघा दैणैं दूई रोट तम्हां लै अर तम्हैं लागै तिन्‍नां ढाकदै। 5 तेखअ पुजणैं तम्हैं बिधाते धारा ज़िधी गिबाह नाओंए ज़ैगा ज़िधी पलिश्ती सपाहीए च़ौकी आसा। तिधी भेटणैं ताह नगरी दी डेऊंदी बिधाते गूरे एक टोली। तिंयां हणैं धारा बेदी सेटा का कतारै, डफली, बींन बाज़दी नाच़दी-नाच़दी अर ज़ोरै-ज़ोरै परमेशरे गल्‍ला प्रगट करदी उंधै होथदै लागै दै। 6 तेभै एछणी बिधाते आत्मां बडै बला संघै ताह दी अर तेरअ सभाब बदल़णअ पठी संघा डेऊणअ तूह बी तिन्‍नां जैंदरी अर तूह बी लागणअ परमेशरे गल्‍ला प्रगट करदअ। 7 ज़ेभै ताह संघै इहअ होए, तेभै करै तूह तिहअ ज़ेही तेरै मन्‍नैं एछे अर बिधाता हेरनी तेरी मज़त करी। 8 तेखअ डेओऐ तूह गिलगाल नगरी ज़रूर। थोल़ै धैल़ै बाद एछणअ हुंह बी, तूह रहै मुंह न्हैल़अ लागी। मुंह सका तिधी पुजणा लै सात धैल़ै बी लागी। तिधी एछी करनी मुंह बिधाता लै हूम बल़ी अर मेल़-ज़ोल़ो बल़ीदान। इहअ बी खोज़ूं हुंह ताखा तिधी पुजी कि ताह आजू किज़ै-किज़ै करनअ।"

9 ज़ांऊं शाऊल शमूएला सेटा का डेऊणा लै पिछ़ू फिरअ, बिधाता दैनअ शाऊला लै नऊंअ सभाब अर ज़िहअ-ज़िहअ नछ़ैण शमूएलै खोज़अ थिअ, तिंयां गल्‍ला निभी तेही ई तैहा ई धैल़ी। 10 ज़ांऊं शाऊल अर तेऊओ दास गिबा पुजै, तेऊ भेटी बिधाते गूरे एक टोली एछदी, परमेशरे आत्मां बस्सी हेरा-हेरी शाऊला दी अर सह डेऊअ तिन्‍नां जैंदरी संघा लागअ तिन्‍नां ई ज़िहअ नाच़दी-नाच़दी ज़ोरै-ज़ोरै परमेशरे गल्‍ला प्रगट करदअ। 11 तिन्‍नां मांझ़ै त कई शाऊल बछ़ैणअ द, ज़ांऊं तिन्‍नैं भाल़अ कि तेऊ आसा गूरा ज़ेही लहर लागी दी अर परमेशरे गल्‍ला प्रगट करदअ लागअ द! तिंयां लागै आप्पू मांझ़ै पुछ़दै, "ऐबै एऊ कीशे शोहरू किहअ गअ! शाऊल बी कै ऐबै गूर निखल़अ?" 12 तिधी बोलअ एकी मणछै इहअ, "किल्है निं निखल़ी सकदअ? इना होरी गूरा निखल़णेंओ खिंब आसा त?" इहअ करै हुई कहाबत मशूर, "शाऊल बी कै ऐबै गूर निखल़अ?" 13 ज़ांऊं शाऊले लहर मुक्‍की, तेखअ डेऊअ सह उझै धारा लै ज़िधी बेदी थिई बणाईं दी।

14 बादा का ज़ांऊं शाऊल अर तेऊओ दास घअरै पुजै, शाऊले च़ाच़ू पुछ़ै तिंयां, "लै तम्हैं एतरै धैल़ै किधी तै डेऊऐ दै?"

शाऊलै दैनअ ज़बाब, "हाम्हैं तै गाधी लोल़ै लागै दै, ज़ांऊं हाम्हां तिंयां किधी निं भेटी, तेखअ डेऊऐ हाम्हैं शमूएला का पुछ़दै।"

15 शाऊले च़ाच़ू पुछ़अ, "तेखअ शमूएलै कै खोज़अ तम्हां का?"

16 शाऊलै खोज़अ, "तेऊ खोज़अ हाम्हां का इहअ कि तम्हैं रहा निहंचै तिंयां गाधी आसा भेटी गई दी।" पर शाऊलै डाहअ इना गल्‍लो टवारअ कि शमूएलै आसा सह इज़राईलीओ राज़अ हेरअ द छ़ांटी।

शमूएलै खोज़अ इज़राईली का शाऊल आसा थारअ राज़अ

17 तेखअ शादै शमूएलै सोभै इज़राईली मिज़पा नाओंए ज़ैगा बिधाता सेटा संघा किअ बडअ झाल़अ। 18 तेऊ बोलअ इज़राईली लै इहअ, "इज़राईलो परमेशर बिधाता बोला इहअ, ‘मंऐं आणै तम्हैं मिसर देशे गलामी का काढी, मंऐं बच़ाऊऐ तम्हैं मिसरी लोगा अर तिन्‍नां होरी सोभी लोगा का ज़ुंणीं तम्हैं हंती-हंती मारी आणै तै। 19 हुंह आसा थारअ परमेशर ज़ुंणीं तम्हैं थारी मसीबता अर आफ़ता का बच़ाऊऐ! पर आझ़ समझ़अ हुंह तम्हैं बृथा अर तम्हैं लागै आप्पू लै राज़ै मांगदै!’ तै करा ऐबै सोभै गोत्र अर इज़राईले सारी टोली बिधाते पबित्र ज़ैगा बडअ झाल़अ ताकि बिधाता तम्हां लै राज़अ छ़ांटे।"

20 शमूएलै शादै इज़राईले सोभै गोत्र अर परच़ी पाई निखल़अ बिन्यामीन गोत्रो नाअं। 21 तेखअ शादी शमूएलै बिन्यामीन गोत्रे सोभै टोली आजू अर च़िठी निखल़ी मत्री खिंबे। तेखअ शादै मत्री खिंबे सोभी टोला मांझ़ै मणछ आजू अर तेथ निखल़ी कीशे शोहरू शाऊले नाओंऐं परच़ी। तेखअ लागै सोभ शाऊला लोल़ै पर तिन्‍नां निं सह तिधी भेटअ। 22 तेखअ लागै तिंयां बिधाता का पुछ़दै, "हे बिधाता, सह कै इधी आअ द आसा?"

बिधाता दैनअ तिन्‍नां लै ज़बाब, "पोर्ही दैआ समाना जैंदरी भाल़णीं, तेथ आसा शाऊल लुक्‍की रहअ द।"

23 तेखअ भेटअ तिन्‍नां सह तिधी संघा आणअ बागा लै। संघा किअ शाऊल लोगे झाल़ै जैंदरी खल़अ। तेऊ सका तै सोभ लोग भाल़ी किल्हैकि सह थिअ सोभी का लाम्मअ अर होर लोग एछा तै तेऊए कान्हा तैणीं। 24 शमूएलै बोलअ सोभी लोगा लै, "सह मणछ आसा अह ज़ुंण बिधाता तम्हां लै राज़अ छ़ांटअ। सारै इज़राईला दी निं एऊ बराबर कोहै आथी!" सोभै लोग लागै तिधी ज़ोरै-ज़ोरै बोल्दै, "म्हारै राज़े लोल़ी खास्सी अमर हुई!"

25 तेखअ खोज़ी शमूएलै लोगा का सारी गल्‍ला कि राज़ैओ हक अर काम किज़ै हणअ। तेखअ डाही तिंयां बही दी लिखी पबित्र ज़ैगा बिधाता सेटा। तेखअ बोलअ शमूएलै सोभी लोगा लै कि ऐबै डेओआ आपणैं-आपणैं घअरा लै। 26 शाऊल बी डेऊअ गिबा नगरी आपणैं घअरा लै। एक शूरबीर मणछे टोली बी डेऊई शाऊला संघै ज़सरै मन्‍नैं परमेशरै तेऊ संघै डेऊणे गल्‍ल पाई। 27 पर कोई कदुष्ट मणछै बोलअ इहअ बी, "एऊ मणछै म्हारअ कै भलअ लाअ करी?" इहअ करै निं तिंयां शाऊला लै राज्ज़ी आथी तै अर नां तिन्‍नैं तेऊ लै किज़ै भैंट दैनी। पर शाऊलै निं तिन्‍नें इना गल्‍ला दी धैन ई दैनअ।