1 पलिश्ती का जुध ज़िती ज़ांऊं शाऊल बापस फिरअ, तेऊ का खोज़अ कुंणी इहअ कि दाबेद आसा एनगाद रेगीस्तानै। 2 शाऊलै निंयैं इज़राईला मांझ़ै आपणैं चअन हज़ार खास सपाही आप्पू संघै, तेखअ डेऊअ दाबेदा अर तेऊए आदमी शाफल़े खोखा दी लोल़अ ज़ेथ बणें बाकरै रहा। 3 सह पुजअ भेडा-बाकरीए हेल़्ही डाहणां लै शाल़ा नेल़ एकी डुआरै, तिधी ती एक जुहल़ अर शाऊल डेऊअ तेथ भितरी संघा बेठअ दिशा। तैहा ई जुहल़ी तै दाबेद अर तेऊए आदमी पिछ़ू लुक्‍की बेठै दै। 4 तिन्‍नैं बोलअ दाबेदा लै, "आझ़ आसा बै ताल्है मोक्‍कअ! एते ई बारै बोलअ त बिधाता ताल्है इहअ, ‘मुंह करनअ तेरअ दुशमण तेरै बशै, ताकि ज़िहअ तेरअ दिल च़ाहे, तूह तेऊ संघै तिहअ बभार करी सके।’"

दाबेद आअ शाऊला नेल़ पिछ़ू संघा काटअ तलबारा करै तेऊए च़ोल़ै का एक शाट्टअ। शाऊला का निं तेतो थोघ ई लागअ। 5 पर दाबेदा हुई तेते बडी माल़ी बी कि शाऊले च़ोल़ै का काटअ शाट्टअ अर 6 तेऊ बोलअ आपणैं आदमी का, "बिधाता ज़ाणा ऐहा गल्‍ला, मुंह निं आपणैं मालक राज़ै शाऊला संघै इहअ लागा करनअ। मेरी आसा बिधाता का एही अरज़ कि इहअ बूरअ निं मेरै भलै भिई लोल़ी हुअ। नां मुंह अह मारनअ किल्हैकि अह आसा बिधाता आप्पै अभिषेक करी राज़अ बणाअं द।" 7 इहअ करै समझ़ाऊऐ दाबेदै तैहा धैल़ी आपणैं आदमी, संघा निं तिन्‍नां शाऊला मारनै दैनअ।

दिशा करी उझ़ुअ शाऊल अर जुहल़ी बागै निखल़ी लागअ आपणीं बाता हांढदअ। 8 तेऊ पिछ़ू निखल़अ दाबेद बागै संघा लाई पिछ़ू का शाऊला लै हाक्‍का, "माहा राज़अ! मेरै मालक!" शाऊलै भाल़अ पिछ़ू अर दाबेदै किअ धरनीं माथअ टेक्‍की राज़ैओ अदर, 9 संघा बोलअ दाबेदै शाऊला लै इहअ, "तूह किल्है शूणां तिन्‍नां मणछे गल्‍ला ज़ुंण इहअ बोला कि हुंह च़ाहा तेरी हान्‍नी करनी? 10 आझ़ सका तूह आप्पू लै आप्पै भाल़ी कि ज़ाथी एभै किअ त तूह जुहल़ी भितरी बिधाता मेरै बशै। मेरै आदमी हेरअ त ताह मारना लै बी बोली, पर मुंह हुई तेरी खास्सी माल़ी अर मंऐं बोलअ इहअ कि मुंह निं तेरी किछ़ै हान्‍नी करनी। किल्हैकि तूह आसा मेरअ मालक ज़सरअ राज़ै हणां लै बिधाता आप्पै अभिषेक आसा किअ द। 11 भाल़ मेरै बाब! राम्बल़ै करै भाल़! तेरै च़ोल़ै का आसा एक शाट्टअ काढी मंऐं आपणैं हाथै ढाकअ द! हुंह सका त ताह मारी बी, पर मंऐं काटअ तेरै च़ोल़े पाल्‍लै का सिधअ अह शाट्टअ। एता करै ता आई होए ताह समझ़ कि नां हुंह ताल्है द्रोह करदअ आथी लागअ द, अर नां हुंह तेरी हान्‍नी च़ाहंदअ करनअ। मंऐं ता निं ताल्है किछ़ै बूरअ किअ पर तूह आसा मुंह मारदअ शकारी ज़िहअ पिछ़ू पल़अ द! 12 ऐहा गल्‍लो नसाफ करे बिधाता कि ताह अर मुंह मांझ़ै कुंण आसा गलत! ज़ुंण तंऐं मुंह संघै किअ, बिधाता लोल़ी तेता लै ताल्है आप्पै सज़ा दैनी। पर मुंह निं आप्पू तेरी धख बी हान्‍नी करनी। 13 प्रोढै खोज़ा एही सैणीं गल्‍ल,

‘बूरअ करा कदुष्ट ई।’

"पर मुंह निं आप्पू तेरी धख बी हान्‍नी करनी। 14 इहअ ता भाल़ा, इज़राईलो राज़अ कहा च़ाहा मारनअ! सह कसरै पिछ़ै आसा पल़अ द! मुंह पिछ़ू ज़ुंण कहा मूंऐं दै कुक्‍करा अर पिर्शू ज़िहअ बृथा आसा! 15 तैही बोला हुंह, बिधाता करनअ आप्पै नसाफ अर तेऊ खोज़णअ कि हाम्हां दूई मांझ़ै कुंण आसा गलत। मेरअ बकील आसा सह ई अर ताह अर तेरै बला का बच़ाऊंणअ हुंह तेऊ ई।"

16 ज़ांऊं दाबेद एतरअ बोली मुक्‍कअ, तेखअ बोलअ शाऊलै, "दाबेद, मेरै बेटैआ, अह असली दी तूह ई आसा बोल्दअ लागअ द?" तेखअ लागअ शाऊल लेरा लांदअ। 17 तेखअ बोलअ शाऊलै दाबेदा लै, "तंऐं बोलअ ठीक, एथ आसा हुंह ई गलत। तंऐं किअ मेरअ भलअ पर मंऐं किअ तेरअ बूरअ ई! 18 आझ़ रहैऊई तंऐं अह गल्‍ल कि तूह मुल्है केतरअ भलअ आसा! बिधाता हेरअ त हुंह तेरै बशै करी अर तेऊ हेरअ त ताल्है मुंह मारनैओ मोक्‍कअ दैई पर तंऐं निं हुंह मारअ आथी। 19 इहअ निं कोहै हंदअ कि आपणैं दुशमणा ढाकी तेऊ ज़िऊंदै छ़ाडे! ज़ुंण आझ़ तंऐं मुंह संघै किअ, तेता लै लोल़ी बिधाता ताल्है खास्सी बर्गत दैनी! 20 ऐबै गअ मुखा पाक्‍कअ ज़ाण्हुंई कि तूह हणअ मुंह बाद इज़राईलो राज़अ अर इज़राईला प्रैंदै रहणअ सदा तेरअ राज़। 21 पर बिधाता शाजत मनी दै मुल्है तूह एही ज़बान कि तूह निं मुंह बाद मेरी आद-लुआदा मारी आथी। ताकि आजू मेरै खिंबो नाअं बी रहे।"

22 दाबेदै दैनी तेऊ लै ज़बान अर तेखअ डेऊअ शाऊल आपणैं घअरा लै अर दाबेद अर तेऊए आदमी डेऊऐ गहल़ै तिन्‍नां ज़ैगा लै ज़िधी तिंयां लुक्‍की रहा तै।