1 शाऊल गअ त तिहा साले अमरा राज़अ बणी अर सह रहअ इज़राईली प्रैंदै दूई साला *तैणीं राज़अ। 2 शाऊलै छ़ांटै इज़राईली मणछा मांझ़ा का चअन हज़ार मणछ अर तिन्‍नां बाकी छ़ाडै तेऊ घअरा लै बापस। दूई हज़ार आदमीओ दल डाहअ तेऊ आप्पू संघै मिकमाश नगरी अर बेतेल धारा बाती अर बाकी एक हज़ार लोग छ़ाडै तेऊ आपणैं शोहरू जोनाताना संघै बिन्यामीन गोत्रे मुल्खै गिबा नगरी लै। 3 जोनातान पल़अ गिबा नगरी पलिश्तीए च़ौकी दी चुटी, अर अह खबर गई हेरा-हेरी सारै पलिश्ती लोगा का पुजी! शाऊलै छ़ाडै सारै इब्रानी देशै आपणैं दूत तिन्‍नैं किऐ सारै दी नर्शिंगै बाज़ी लोगै झाल़ै संघा खोज़अ लोगा का पठी कि किज़ै हुअ। 4 दूतै खोज़अ सोभी इज़राईली का इहअ, "गिबा नगरी किऐ शाऊलै पलिश्ती डेरै खतम। ऐबै ज़िधूऐ पलिश्ती इज़राईली लै होर बी खास्सै। शाऊलै शादै नगरी अर गराऊंआं का खास्सै मणछ संघा हुऐ सोभ गिलगाल कठा।"

5 पलिश्ती हुऐ इज़राईली संघै जुध करना लै कठा, तिंयां आऐ चअन हज़ार रथ, छ़ह हज़ार शुंआर अर पैदल हांढणै आल़ी सैना ती समुंदरे रेता ज़ेही खास्सी। तिन्‍नैं पाऐ बेताबेन पुर्बा बाखा मिकमाश डेरै। 6 तेखअ गअ इज़राईली का ज़ाण्हुंई कि तिन्‍नें लोगा लै पल़ी ऐबै बडी आफ़त अर तिंयां निं ऐबै पलिश्ती का ज़िती सकदै! तेखअ लुक्‍कै सोभै इज़राईली जुहल़ी, कोई डुआरै, कोई लुक्‍कै घणैं कांडे झ़ाकल़ै, कोई रहै बडी-बडी टोल्हा जैंदरी अर कोई रहै खात्ती अर घोरी लुक्‍की। 7 बाकी होर इब्रानी डेऊए जरदण नदी पार टपी गाद अर गलाद नाओंए ज़ैगा लै। शाऊल रहअ आप्पू गिलगाल ई अर तेऊए लोगा बी ती डरै काम्मणीं लागी दी। 8 शाऊल रहअ तिधी साता धैल़ी तैणीं शमूएला न्हैल़अ लागी, ज़िहअ शमूएलै बोली त डाहअ द। पर शमूएल निं अज़ी बी गिलगाल पुजअ आथी त। तेखअ गअ शाऊला का ज़ाण्हुंई कि तेऊए आदमी लागै तेऊ का ओर्ही-पोर्ही खिस्सकदै! 9 खिरी बोलअ शाऊलै तिन्‍नां लै, "तम्हैं आणा हूम बल़ी अर मेल़-ज़ोल़े बल़ीदान करना लै मुंह सेटा चैणैं!" शाऊलै काटअ तिधी हूम बल़ीदान करना लै एक पशू अर 10 ज़ेतरी शाऊल तिधी हूम बल़ी करी मुक्‍कअ, शमूएल बी गअ तिधी पुजी। शाऊल डेऊअ तेऊ सेटा तेऊए ज़ैकार अर सुआगत करदअ, 11 पर शमूएलै पुछ़अ शाऊला का, "लै तंऐं अह कै किअ?"

शाऊलै दैनअ ज़बाब, "लोग लागै मुखा ओर्ही-पोर्ही खिस्सकदै अर ज़ेभै एछणा लै तंऐं बोलअ थिअ, तेभै निं तूह बी पुजअ! एसी आसा पलिश्ती हाम्हां संघै जुधा लै मिकमाश कठा हुऐ दै! 12 तेखअ सोठअ मंऐं इहअ, ‘पलिश्ती आसा तेतरी गिलगाल पुजणैं आल़ै अर मंऐं निं अज़ी बिधाता का मज़त ई मांगी!’ एही करनअ निं हुंह च़ाहंदअ त पर तेखअ पल़अ मुंह ताह पुजणैं का आजी हूम बल़ीदान करनअ ई।"

13 शमूएलै दैनअ शाऊला लै ज़बाब, "अह किअ तंऐं बेघै ऐडअ काम, तंऐं निं बिधातो हुकम मनअ! तै रहणअ त इज़राईली प्रैंदै तेरी आद-लुआदो बी सदा राज़। 14 पर ऐबै निं तेरअ राज़ खास्सअ रहणअ नां आजू तेरी आद-लुआदा मांझ़ै आजू राज़अ बणनअ। किल्हैकि तंऐं निं बिधातो हुकम मनअ। ऐबै हेरअ बिधाता ज़िहअ सह च़ाहा तिहअ मणछ छ़ांटी ज़ुंण ताह बाद इज़राईली प्रैंदै राज़अ हणअ।"

15 शमूएल लागअ तिधा का हांढदअ। बाकी लोग रहै शाऊला संघै कि तेऊए सैना दी ज़ुल़े। तिंयां डेऊऐ गिलगाला मुल्खा का बिन्यामीन मुल्खै गिबा नगरी। तिधी गणै शाऊलै आपणैं आदमी तिंयां थिऐ छ़ह शौ।

16 शाऊल अर तेऊओ शोहरू जोनातान पाऐ आपणैं डेरै बिन्यामीन गोत्रे मुल्खै गिबा नगरी अर पलिश्ती तै मिकमाश आपणैं डेरै पाऐ दै। 17 पलिश्तीए सैना निखल़ी आपणैं डेरै का इज़राईली संघै जुधा लै दल बणाईं। तिन्‍नों एक दल आअ उतर दिशा दी शूआल़ देशा लै ओफरा नगरी बाखा लै। 18 दुजअ दल आअ बेथ-हारोन बाखे बाता अर चिऊथअ आअ पुर्बा दिशा दी सबोईम खागा दी रेगीस्ताना बाखा।

19 इज़राईली मांझ़ै निं सारै देशै लुहार भेटदअ त, किल्हैकि पलिश्ती निं तिन्‍नां लोहेओ काम शिखल़णै ई दैंदै तै! तिंयां बोला तै इहअ, "इना इब्रानी निं हाम्हां तलबार बर्छ़ै बणाणैं दैणअ।" 20 इज़राईली पल़ा आपणैं हल़ा लै लुहाल़, कदाल़ी, दाच, खराल़ै अर बर्छ़ै साज़णा लै पलिश्ती सेटा डेऊणअ, 21 अर पलिश्ती मांगा तै तिन्‍नां का खास्सी साज़-पल़ैई। खेचे खहल़े होछ़ै समान दाच-खराल़ै, च़िखल़ी कदाल़ी लै साज़ पल़ैई लागा ती च़ंदीए च़ुआन्‍नी अर बडै समाने साज़-पल़ैई लागा ती च़ंदीए ठान्‍नीं दैणीं। 22 तैही निं जुधे धैल़ै शाऊल अर जोनाताना का सुआई तिन्‍नें होरी इज़राईली साथी का नां तलबारा आथी ती अर नां बर्छ़ै थिऐ।

23 पलिश्ती छ़ाडअ आपणीं सैनो दल मिकमाश कुआल़ी लै कि तैहा ज़ैगा तैणीं आपणअ कबज़अ बणाईं डाहे।