2 Pedro 3

3 सोभी का ज़रूरी गल्‍ल आसा अह कि तम्हां का लोल़ी थोघ लागअ कि खिरीए धैल़ी मसीहा एछणैं का आजी हणैं इहै लोग; तिन्‍नां बणाणअं थारअ ऐहा गल्‍ला पिछ़ू मखौल कि तम्हैं करा इहअ विश्वास कि मसीहा एछणअ भिई फिरी। तिन्‍नां हणअ एही बूरी गल्‍ला करनैओ भैस्स पल़अ द ज़ेता करै तिंयां खुश हआ। 4 तिन्‍नां बोल़णअ इहअ कि तेऊए फिरी एछणें करार निं शुची आथी! सह निं कधि एछणैं आल़अ आथी! किल्हैकि ज़ुंण शुरू दी म्हारै दाद-बाब तै तिंयां मूंऐं सोभ, पर आझ़ तैणीं निं किछ़ै बदल़अ। सोभै गल्‍ला आसा कबल्‍ली ज़ेही कै तेही हंदी, ज़ेही तधू ती ज़धू परमेशरै संसार बणाअं।

5 तिंयां सका इहअ बोली किल्हैकि तिंयां च़ाहा बिस्सर्नअ कि खास्सी साला पैहलै आसा सरग अर पृथूई परमेशरै हुकम करी बणाऐं दै। तेऊ बोलअ ज़िम्मीं लै पाणीं का उझै निखल़णां लै अर पाणीं का ज़ुदै हणां लै।✝3:5 मूल. 1:6-9

6 तेऊ ई पाणीं करै किअ परमेशरै तेऊ जुगो संसार पाणीं दी डबेऊई करै खतम।✝3:6 मूल. 7:11 7 पर एऊ जुगे सरग अर पृथूई आसा तेऊ ई बैणा करै एते तैणीं डाहै दै कि एकी धैल़ै पाणै ईंयां दहई। तेऊ आसा तिंयां तैहा धैल़ी तैणीं डाहै दै ज़ेभै तेऊ नसाफ करनअ अर तिंयां लोग खतम करनै ज़ुंण तेऊओ अदर निं करदै।