1 तेऊ स्वर्ग दूतै बोलअ मुल्है इहअ, "ज़धू दारा बाबेल देशो राज़अ बणअ, तेऊए राज़ा दी पैहली साला दैनअ त मंऐं मिकाईल स्वर्ग दूतो साथ, मंऐं किअ त तेऊ बाखा तेऊए दुशमणा संघै जुध। 2 ऐबै लाअ मंऐं ताखा सत्त खोज़ी कि आजू किज़ै हणअ।"

तेखअ बोलअ स्वर्ग दूतै, "फारसी राज़ा दी करनअ चिई राज़ै राज़, ज़ुंण च़ौथअ राज़अ एछणअ, सह हणअ तिन्‍नां चिई का खास्सअ सेठ। तेता करै हणअ सह खास्सअ बलबान। तेखअ डाहणैं होर देश बी ज़गाऊई कि तिंयां यूनानी राज़ा संघै जुध छ़ेल़े।

3 "तेखअ निखल़णअ एक होर राज़अ, सह हणअ खास्सअ जोधअ। तेऊ बढेरनअ आपणअ राज़ सारै दी अर तेऊ करनअ ज़िहअ तेऊए दिल बोलअ तिहअ। 4 पर ज़ांऊं सह खास्सअ बलबान हणअ, तेऊए राज़ा दी पल़णीं फूट अर सह हणअ च़ऊ बाखा लै। आजू निं तेऊए आद-लुआदो मांझ़ै राज़अ बणनअ नां तिंयां तेऊ ज़िहै जोधै हणैं ज़िहअ सह आसा त।

5 "तेखअ हणअ दखण रेगीस्ताना बाखा मिसर देशो राज़अ खास्सअ बलबान। पर तेऊए सैनापति मांझ़ै हणअ एक ज़ण्हअ तेऊ का बी खास्सअ बलबान अर तेऊ करनअ नऊंअ राज़ खल़अ अर सह राज़ हणअ खास्सअ बडअ। 6 खास्सी साला बाद करनी दखणा बाखा मिसर देशे राज़ै, उतरा बाखा सिरीया देशे राज़ै संघै आपणीं सैना साझ़ू। मिसर देशे राज़ै करनअ आपणीं शोहरीओ बैह सिरीया देशे राज़ै संघै ताकि तिन्‍नों साथ शुचअ-पाक्‍कअ रहे। पर सह साझ़ निं खास्सी च़लणीं, तैहा शोहरीओ हक बी छ़ुटणअ तैहा का पोर्ही, नां तेसो मर्ध राज़अ रहणअ। सह शोहरी, तेसो मर्ध, तेसे शोहरू माठै अर तेसे च़ाकरी लै तैहा संघा डेऊऐ दै दास-दासी पाणै कहा सोभ मारी।

7 "तेखअ निखल़णअ तैहा शोहरीए आद-लुआदा मांझ़ै एक राज़अ। तेऊ पल़णअ सिरीया देशे राज़ेए सैना लै चुटी। तेऊ डेऊणअ संघा करनअ सिरीया देशे राज़े गहल़ा दी कबज़अ संघा पाणअ सह हारी। 8 तिन्‍नें देअ-देबते मुहुर्ती अर तिन्‍नें देअए देहुरै सुन्‍नैं-च़ंदीए किम्मती भांडै निंणै तेऊ राज़ै मिसर देशा लै। तेखअ निं तेऊ कई साला तैणीं उतरा बाखा सिरीया देशा संघै जुध करनअ। 9 सिरीया देशे राज़ै छ़ेल़णअ दखण दिशा दी मिसर देशा संघै जुध पर खिरी पल़णअ तेऊ पिछ़ू हटी आपणैं देशा लै बापस फिरनअ।

10 "तेखअ छ़ेल़णअ सिरीया देशे राज़ेए सोभी शोहरू जुध। तिन्‍नां झाल़णीं जुधा लै बडी भारी खास्सी सैना। तिन्‍नें सह सैना च़लणीं जुधा लै बडै दरैऊआ ज़ेही। तिन्‍नां पल़णअ दुशमणे बडै-बडै गहल़ा लै चुटी। 11 दखणा बाखा मिसर देशे राज़ै एछणी एता लै खास्सी रोश्शै। तेऊ निखल़णअ आपणीं बडी सैना पाई उतर सिरीया देशा संघै जुधा लै। सिरीया देशा का बी हणीं बडी सैना पर मिसर देशे राज़ै हेरनअ सह जुध तिन्‍नां का ज़िती। 12 मिसर देशे राज़ै हणअ एतो घमंड कि सह ज़ितअ सिरीया देशे एतरी बडी सैना का अर तेऊ पाऐ तिन्‍नें सैना मांझ़ै खास्सै मारी। पर सह ज़ीत रहणीं तेऊए थोल़ी घल़ी लै।

13 "सिरीया देशे राज़ै झाल़णीं पैहलै का बी खास्सी बडी सैना। थोल़ी साला बाद डेऊणअ तेऊ खास्सै अस्त्र-शस्त्रा पाई आपणीं बडी सैना संघी मिसर देशा संघै जुधा लै। 14 तेऊ ज़मानै करनअ दखण मिसर देशै राज़ै लै कई द्रोह। तम्हां इज़राईली मांझ़ै ज़ुंण उपद्रभी हणैं, तिन्‍नां बी करनअ द्रोह। इहअ करै हणअ अह सुपनअ पूरअ ज़ुंण तंऐं भाल़अ। तिन्‍नां करनअ तेऊ संघै जुध पर तिंयां निं सफल हणैं। 15 उतर बाखा सिरीया देशो राज़ै डेऊणअ दखण मिसर देशा संघै जुधा लै बडी सैना पाई। तेऊ दैणअ एकी बडी गहल़ा आल़ी नगरी फेर गोट संघा करनअ तेथ कबज़अ। मिसर देशे सैना हणअ तेऊओ मकाबलअ करनअ कठण। तिन्‍नें सैना मांझ़ै ज़ुंण सोभी का बडअ जोधअ बी हणअ, तेऊ बी निं सिरीया देशे सैना संघै मकाबलै जोगी ज़ोर हणअ। 16 सिरीया देशे राज़ै करनअ तिन्‍नां संघै ज़िहअ तेऊओ मन्‍न किअ तिहअ। तेऊओ मकाबलअ निं कोही बोल़णअ करी। सह डेऊणअ तेऊ रज़दै-पज़दै बित्तै देशा बाती संघा करनअ तेथ कबज़अ।

17 "तेखअ झाल़णीं उतर देशे राज़ै आपणीं सारी सैना कि सह दखण बाखा सारै मिसर देशै राज़ करे। तेता लै करनी तेऊ मिसर देशा संघै सुल्हअ अर तेऊ करनअ आपणीं शोहरीओ बैह बी मिसर देशे राज़ै संघै। पर अह च़ाल बी निं तेऊए सफल हणीं।

18 "एता बाद छ़ेल़णअ तेऊ तिन्‍नां देशा संघै जुध ज़ुंण मांझ़ समुंदरे बाढै आसा बस्सै दै। तिन्‍नां मांझ़ै करनअ तेऊ कई नगरी दी कबज़अ। पर होरी देशे सैनापति पाणअ सह जुधा दी हारी अर तेखअ हणीं तेऊए शरेरी गल्‍ला खतम अर सह हणअ शर्मिंदअ। 19 तेखअ फिरनअ सह बापस कि आपणैं देशै गहल़ा आल़ी नगरी पुजे। पर सह पाणअ पठी हारी अर इहअ करै हणअ सह अर तेऊओ राज़ खतम।

20 "तेऊ बाद बणअ उतर सिरीया देशै एक होर राज़अ। तेऊ छ़ाडणैं आपणैं अफसर लोगा हंतदै कि तिंयां लोगा का खास्सअ कारअ झाल़े अर तेऊए राज़ खज़ानै दी खास्सै ढब्बै कठा होए। सह राज़अ हेरनअ तेतरी मारी। पर इहअ निं हणअ कि सह मारअ जुधा दी, नां इहअ हणअ कि लोग तै तेऊ का नराज़, तै पाअ सह मारी।

21 "ज़ुंण उतर देशै सिरीया एऊ राज़ै बाद राज़गाद्दी दी बेशणअ, सह हणअ खास्सअ नर्दैई। सह निं राज़ परिबारे खिंबा का हणअ, तैही निं सह राज़अ बणअ तेऊए बशै हणअ। पर सह बणनअ लोगा ठगी करै राज़अ। ईंयां गल्‍ला हणीं तेऊ ज़मानै ज़ेभै लोग निहंचै हणैं कि तिंयां आसा राज्ज़ी-राम्बल़ै। 22 ज़ुंण बी तेऊ संघै मकाबलै लै एछे, तेऊ करनै तिंयां झ़ट च़ारै खतम। तेऊ पाणै परमेशरो बधान सखाऊंणै आल़ै सैणैं तोही मारी। 23 ज़ुंणीं देशै तेऊ संघै मेल़-ज़ोल़े करार बी होए किई दी, तिन्‍नां संघै बी करनअ तेऊ धोखअ। सह हणअ होर बी खास्सअ बलबान, पर तेऊओ राज़ हणअ होछ़ै ज़िहै देशा प्रैंदै। 24 ज़ुंण मुल्ख सेठ हणैं, तिन्‍नां लै पल़णअ तेऊ नभैऊशै चुटी। तेऊ राज़ै करनै इहै-इहै काम ज़ुंण तेऊए दाद-बाब बी कधि निं करदै तै। ज़हा दुशमणा संघै बी सह जुध छ़ेल़े, तेऊ लुटणीं तिन्‍नें किम्मती च़िज़ा पठी संघा बांडणी तिन्‍नां संघै ज़ुंण तेऊओ जुधा लै साथ दैनअ। सह रहणअ बडी-बडी गहल़ा आल़ी नगरी दी कबज़ै करने बारै सोठदअ लागी। पर तेऊओ अह बगत जाणअ छ़ेक्‍कै खतम हई।

25 "उतर सिरीया देशे तेऊ नर्दैई राज़ै झाल़णीं खास्सी बडी सैना कि सह दखण मिसर देशा संघै जुध छ़ेल़े। पर मिसर देशे राज़ै का हणीं तेऊए मकाबलै करना लै तेऊ का बी खास्सी बलबान सैना। पर तज़ी बी निं सह सिरीया देशे राज़ै का जुध ज़ितणअ, किल्हैकि तेऊ लै हणैं तेऊए आपणैं ई लोग द्रोही। 26 तेऊओ सोभी का खास बज़ीर ज़ुंण तेऊ संघा खाआ-पिआ, सह बी रहणअ तेऊ मारदअ ताखुई। सिरीया देशे नर्दैई राज़ै पाणीं तेऊए खास्सी सैना जुधा दी मारी अर ज़खमी करी।

27 "तेखअ बेशणै सिरीया अर मिसर देशे ईंयां दुहै राज़ै खांदै-पिंदै कठा। पर दिलै हणीं तिन्‍नैं बूरी ई सोठ डाही दी। तिन्‍नां करनी दुही एकी-दुजै संघै झ़ुठी ई गल्‍ला। पर ज़िहअ तिंयां च़ाहा, तिहअ निं हणअ। किल्हैकि तिन्‍नों राज़ खतम हणैंओ आसा परमेशरै बगत डाहअ द। 28 तेखअ डेऊणअ सिरीया देशो राज़अ आपणैं देशा लै फिरी। तेऊ निंणीं लुटी दी कई किम्मती च़िज़ा आप्पू संघै। पर फिरदा पाणीं तेऊ परमेशरो बधान मनणै आल़ै लोगा लै आफ़त। तेऊ करनअ तिन्‍नां संघै ज़िहअ तेऊओ दिल बोलअ तिहअ बभार। संघा पुजणअ सह आपणैं देशै बापस।

29 "बादा का डेऊणअ सह भिई दखण मिसर देशा संघै जुधा करदअ, पर तैहा बारी तेऊ जुधो नतिज़अ निं तेऊ लै तिहअ हणअ ज़िहअ पिछ़ली बारी हुअ त। 30 समुंदरे बाढै बस्सै दै कित्ती* लोगे समुंदरे ज़हाज़ा करै जुधा करदी सैना एछणी दखण रेगीस्तानै तेऊए मकाबलै करदी अर तिन्‍नां डरै फिरनअ सह आपणैं देशा लै बापस। बापस फिरदा काढणअ तेऊ सह रोश्श परमेशरो बधान मनणै आल़ै लोगा लै। तेऊए सलाहकार हणैं तिंयां ज़ुंणी परमेशरो बधान मनणअ छ़ाडअ। 31 तेऊ छ़ाडणअ आपणीं सैनो दल एरुशलेम नगरीए गहल़ा लै। तिन्‍नां करनी बिधाते भबनै पबित्र ज़ैगा पेशी सह छ़ोतली। तिन्‍नां लाणीं बिधाता लै बल़ीदान अर भैंट करना लै रोक ज़ेता लोग हर धैल़ै करा। तिन्‍नां डाहणीं तेथ च़िल़्हखरी मुहुर्त ज़ेता करै सह ज़ैगा उज़र पल़णीं।✝ 32 तेऊ राज़ै ठगणै तिंयां लोग ज़ुंणी पापा दी पल़ी परमेशरो बधान मनणअ छ़ाडी आसा हेरअ द। पर ज़ुंण लोग परमेशरा लै शुचै-पाक्‍कै रहणैं, तिन्‍नां करनी तेऊ रोक्‍कणा लै खास्सी मैन्थ।

33 "ज़हा मणछा अक्ल हणीं, तिन्‍नां समझ़ाऊंणैं होर लोग बी। पर थोल़ी साला हणीं तिन्‍नां लै खास्सी आफ़त। तिन्‍नां मांझ़ै पाणै कई जुधा दी मारी अर कई पाणै आगी जैंदरी दहई अर कई डाहणैं कैद करी। 34 ज़ांऊं सारै दी एही काट-मार हणीं मच़ी दी, तेखअ जाणीं परमेशरे लोगा थोल़ी मज़त भेटी। तिन्‍नां संघै ज़ुल़णै कई ठग लोग, असली दी निं तिंयां तिन्‍नें साथी हणैं। 35 अक्ली आल़ै सैणैं मांझ़ै बी पाणै कई मारी, पर एतो नतिज़अ निखल़णअ इहअ कि लोगे हणीं शुधी। अह रहणअ खिरी तेभै तैणीं हंदअ लागी ज़ुंण बगत परमेशरै डाहअ द आसा।

36 "सिरीया देशे राज़ै करनअ ज़िहअ तेऊओ दिल बोलअ तिहअ बभार। तेऊ करनी एही शरेरी गल्‍ला कि सह आसा सोभी देअआ का बडअ! तेऊ बोल़णअ इहअ तोही कि सह आसा परमेशरा का बी बडअ। सह रहणअ खिरी तेभै तैणीं इहअ करदअ लागी ज़ेभै तैणीं कि परमेशर तेऊ लै सज़ा नां दैए। परमेशरा करनअ ज़ाथी तिहअ ई ज़िहअ तेऊ सोठी आसा डाहअ द।✝ 37 तेऊ राज़ै निं तिन्‍नां देअए बी परबाह करनी ज़हा तेऊए दाद-बाब पूज़ा तै। नां आपणीं बेटल़ीए कुल़ज देअ अदर करनअ ज़ेता लै तिंयां बेटल़ी झ़ूरा। तेऊ निं कोह देअ-देबी किछ़ समझ़णैं, किल्हैकि तेऊ सोठणअ इहअ कि सह आसा सोभी का बडअ। 38 इना छ़ाडी करनअ तेऊ तिन्‍नां अदर देअ ज़ुंण गहल़ा-कोटे फाज़त करा। तेऊ करनअ सुन्‍नअ-च़ंदी, ढब्बै अर होर किम्मती मणीं तिन्‍नां देअआ लै भैंट ज़सरी पूज़ा-गाज़ा तेऊए दादै-बाबै बी निं कधू किई। 39 आपणैं गहल़े फाज़त करना लै डाहणैं तेऊ तिंयां लोग ज़ुंण परदेसी देअआ मना। तेऊ दैणी तिन्‍नां लै खास्सी इज़त ज़ुंण तेऊ राज़अ मने अर तिन्‍नां लै दैणीं तेऊ बडी-बडी पदबी अर बस्सणा लै ज़ैगा-ज़िम्मीं।

40 "ज़ांऊं सिरीया देशे राज़ेए मरने घल़ी पुजणीं, दखण दिशा दी मिसर देशे राज़ै छ़ेल़णअ तेऊ संघै जुध, अर सिरीया देशे राज़ै करनअ आपणैं खास्सै रथ, घोल़ै अर कई पाणींए ज़हाज़ा आल़ी सैना करै पूरअ ज़ोर लाई तेऊओ मकाबलअ। तेऊ छ़ेल़णअ कई देशा संघै जुध, तेऊए सैना डेऊणी कई देशा बाती पाणींए बडै दरैऊआ ज़ेही। 41 तेऊ पल़णअ थारै रज़दै-पज़दै शोभलै देशा* लै बी चुटी, तेथ पाणै तेऊ कई हज़ार लोग मारी। पर एदोम, मोआब अर अमोन देश जाणैं तेऊए बनाशा का बच़ी।

42 "इहअ करै पल़णअ सह कई देशा लै चुटी अर मिसर देश बी निं तेऊ का छ़ुटणअ आथी। 43 तेऊ लुटणीं मिसर देशे च़ंदी, सुन्‍नअ अर सोभ किम्मती च़िज़ा। लिबिया अर कूश देशे लोगा प्रैंदै बी करनअ तेऊ राज़। 44 तेखअ एछणी तेऊ लै पुर्ब अर उतर दिशा बाखा एही खबर कि तेऊ छ़ुटणअ तेता शूणीं दर्छ़णअ। तेऊ रोश्शै डेऊणअ तेऊ आपणीं सैना पाई संघा पाणै खास्सै लोग मारी। 45 तेऊ करनै समुंदर अर पबित्र धारा मांझ़ा-मांझ़ी आपणैं राज़ दरबारो खिम्भ खल़अ। पर सह मरनअ तिधी अर तिधी निं तेऊ बच़ाऊंणै आल़अ बी हणअ।"