Daniel 7

दानिएला का शुझुऐ सुपनै च़ार ज़ीब

1 बाबेल देशै बणअ बेलशेसर राज़अ। तेऊए राज़ा दी पैहली साला हुऐ दानिएला धैन अर सुपनै ज़ेभै सह राची सुत्तअ द आसा त। ज़ुंण गल्‍ला तेऊ धैनै-सुपनै भाल़ी, तिंयां डाही तेऊ लिखी। 2 दानिएलै आसा इहअ लिखी डाहअ द:

"मुंह हुअ राची इहअ सुपनअ कि मुखा शुझुई सरगै आसा च़ऊ दिशा बाखा ढिश-बागरी लागी दी। तेता करै उझ़ुई मांझ़ समुंदरै बडी-बडी छ़ाल्‍ली। 3 तेखअ शुझुऐ मुखा नच़ानक कि समुंदरा का निखल़ै च़ार बडै-बडै ज़ीब अर हेरनै तै तिंयां होरी-होरी रंगे।✝7:3 प्रका. 13:1; 17:8 4 ✝7:4 प्रका. 13:2पैहलअ ज़ीब त सिहा ज़िहअ अर तेऊ तै मुक्षरलै ज़िहै फैंख। हुंह त तेऊ भाल़अ ई लागअ द कि तेऊए फैंख पाऐ पोर्ही पेच़ी! सह किअ धरना का खल़अ संघा डाहअ मणछा ज़िहअ दूई खूरा दी खल़अ करी। तेऊ ज़ीबा लै दैनअ मणछा ज़िहअ मन्‍न।

5 "दुजअ ज़ीब शुझुअ मुखा भाल्‍लू ज़िहअ, सह त आपणीं ज़ांघे थूंज़ा प्रैंदै आज़रअ खल़्हुअ द। मुखा शुझुअ कि तेऊ दांदा बाती आसा चअन शल़्है बागा लै निखल़ै दै। तेऊ लै त इहअ बोलअ द, ‘तूह पल़ चुटी! तिन्‍नां सोभी ल्हासा खा ज़हा तूह च़ाहा।’

6 "चिऊथअ ज़ीब शुझुअ मुखा च़राघा ज़िहअ, पर एऊ ज़ीबे पिठी थिऐ च़ेल्‍लू ज़िहै च़ार फैंख। एऊ ज़ीबे मूंड बी थिऐ च़ार अर एऊ भेटअ राज़ करनैओ हक।

7 "हुंह त सुपनै भाल़अ लागअ द, मुखा शुझुअ सह च़ौथअ ज़ीब। सह ज़ीब त हेरनअ होरी का करबैऊंणअ। तेऊए खाखा तै लोहे बडै-बडै दांद। सह ज़ीब खाआ त सोभै च़िज़ा अर तेते करा त सह ठोर-ठोर। ज़ुंण तेऊए खाखा का छ़ुटा थिअ, तेता जैंटा त सह आपणैं खूरा करै। सह त मंऐं पैहलै भाल़ै दै तिन्‍नां ज़ीबा का होरी रंगो, तेऊए मुंडै तै दस शींग।✝7:7 प्रका. 12:3; 13:1 8 हुंह त तेऊए तिन्‍नां शींगे बारै सोठदअ लागअ द कि मुखा शुझुअ इहअ कि एक शींग टिप्पअ होर अर तेता करै पेछ़ुऐ चअन शींग पोर्ही। अह शींग त होछ़अ ज़िहअ अर तेथ थिई मणछे आछी ज़ेही आछी अर तेऊ दी थिई खाख बी अर सह त बडी शरेरी गल्‍ला करदअ लागअ द।✝7:8 प्रका. 13:5,6

नसाफ

9 ✝ 7:9 प्रका. 20:4 तेखअ शुझुअ मुखा सुपनै इहअ कि

कोऐ आणी तिधा लै राज़गाद्दी अर

तैहा राज़गाद्दी दी बेठअ सह ज़ुंण

जुगा-जुगा ओर्ही सदा*7:9 जुगा-जुगा ओर्ही सदा अटल़ परमेशर राज़ करदी आअ।

तेऊए झिकल़ै तै हिंऊंआं ज़िहै शेतै अर

तेऊए मुंडे शराल़ बी थिऐ शेती ऊना ज़िहै।

तेऊए तैहा राज़गाद्दी अर तेते घरेटा का थिई आग भकी दी।✝7:9 प्रका. 1:14

10 ✝ 7:10 प्रका. 5:11 ✝ 7:10 प्रका. 1:14 ज़हा राज़गाद्दी दी सह बेठअ द थिअ, तेता का बगअ आगीओ दरैअ!

हज़ारो स्वर्ग दूत तै तेऊए च़ाकरी लै तेऊ सेटा हाथ ज़ोल़ी खल़्हुऐ दै।

सह त नसाफ करना लै दरबार लागअ द अर

तिधी खोल्ही बधाने कताबा कि तेथ किज़ै आसा लिखअ द।✝7:10 प्रका. 20:12

11 "हुंह त तेऊ राम्बल़ै करै भाल़अ लागअ द कि तेऊ होछ़ै ज़िहै शींगा लै किज़ै हणअ होए, किल्हैकि सह त बडी शरेरी गल्‍ला करदअ लागअ द। तेतरी शुझुअ मुखा इहअ कि सह च़ौथअ ज़ीब पाअ मारी अर सह पाअ तेऊ ज़ल़दी आगीए दरैऊआ दी। 12 ज़ुंण तिंयां चअन ज़ीब होर आसा तै, तिन्‍नां का छ़ड़ैऊअ राज़ करनैओ हक पोर्ही। पर तिन्‍नां लै दैनअ एक बगत कि तिंयां तेभै तैणीं ज़िऊंदै रहे।

13 "मंऐं भाल़अ राची एऊ सुपनै दी इहअ कि सरगा का आसा बादल़ा संघै कुंण मणछा ज़िहअ मुंह बाखा एछदअ लागअ द। सह डेऊअ तेऊ सेटा ज़ुंण सदा ज़िऊंदअ आसा अर लोगै किअ सह परमेशरा सेटा खल़अ।✝7:13 मोत्त. 24:30; 26:64; मार्क. 13:26; 14:62; लूक. 21:27; प्रका. 1:7,13; 14:14 14 परमेशरै किअ तेऊओ अदर अर तेऊ दैनअ तेऊ मणछा लै राज़ करनैओ हक, सोभी देशै अर सोभी बोली-भाषा बोल़णैं आल़ै हुऐ तेऊए च़ाकरी करना लै सैहमत। सह हणअ सदा लै राज़अ अर तेऊओ राज़ निं कोह खतम करी सकदअ।✝7:14 प्रका. 11:15

एऊ सुपनैओ फल

15 "एऊ सुपनै भाल़ी तबझ़ुअ हुंह दानिएल पठी अर मुंह छ़ुटअ दर्छ़णअ। 16 तेखअ डेऊअ हुंह एकी नेल़ ज़िहअ ज़ुंण परमेशरे राज़गाद्दी सेटा त खल़्हुअ द। मंऐं बोलअ तेऊ लै कि तूह समझ़ाऊ मुखा कि इना गल्‍लो किज़ै मतलब आसा। तेऊ खोज़अ मुखा तेऊ सुपनैओ फल। 17 तेऊ बोलअ इहअ, ‘ईंयां च़ार बडै ज़ीब आसा च़ार राज़ ज़ुंण धरती दी हणैं। 18 पर राज़ करनैओ हक भेटणअ परम प्रधान परमेशरे पबित्र परज़ा अर तिन्‍नों राज़ रहणअ जुगै-जुगै तैणीं सारी सदा।’✝7:18 प्रका. 22:5

19 "तेखअ च़ाहा त हुंह तेऊ च़ौथै ज़ीबे बारै पुछ़णअ। सह ज़ीब निं तिन्‍नां होरी ज़ीबा ज़िहअ आथी त। सह त करबैऊंणअ ज़ीब, तेऊ भाल़ी छ़ुटअ मुंह दर्छ़णअ। तेऊ ज़ीबे तै लोहे दांद अर न्हश थिऐ पितल़े। सह ज़ीब खाआ त सोभै च़िज़ा अर तेते करा त सह ठोर-ठोर। ज़ुंण तेऊए खाखा का छ़ुटा थिअ, तेता जैंटा त सह आपणैं खूरा करै। 20 हुंह च़ाहा त तेते बारै बी पुछ़णअ ज़ुंण तेऊ ज़ीबे मुंडै दस शींग थिऐ अर तेऊ होछ़ै शींगे बारै ज़ुंण तिन्‍नां शींगा जैंदरा का टिप्पअ त अर ज़ेता करै चअन शींग गोधी का पोर्ही पेछ़ुऐ तै, ज़हा मणछा ज़ेही आछी अर खाख थिई अर ज़ुंण बडी शरेरी गल्‍ला करदअ त लागअ द। सह होछ़अ शींग ज़ाण्हिंआं त तिन्‍नां होरी शींगा का खास्सअ डरैऊंणअ।✝7:20 दान. 7:8

21 "हुंह त भाल़अ लागअ कि सह होछ़अ शींग पल़अ परमेशरे पबित्र परज़ा मारदअ चुटी अर सह ज़ितअ तिन्‍नां का।✝7:21 प्रका. 13:7 22 तेखअ आअ सह जुगा-जुगा ओर्ही सदा राज़ करदी आअ। तेऊ किअ परमेशरे पबित्र परज़े पक्षा दी नसाफ कि तिंयां आसा भलै अर शुचै। ऐबै गअ सह बगत एछी कि अह राज़ दैणअ परमेशरे पबित्र परज़ा लै।✝7:22 प्रका. 20:4✝7:22 मोत्त. 19:28

23 "ज़हा का मंऐं पुछ़अ, तेऊ खोज़अ मुखा इहअ, ‘च़ौथअ बडअ ज़ीब आसा धरती दी ज़ुंण च़ौथअ राज़ एछणअ। अह राज़ हणअ तिन्‍नां चिई राज़ा का होरी साबो। एऊ राज़ा करनी सारी धरती पृथूई बरैबाद। एऊ राज़ा चेल्हणीं धरती ज़ेही नां केही अर एते सोभी च़िज़े करनै तेऊ ठोर-ठोर। 24 ईंयां दस शींग आसा एऊ राज़ा दी राज़ करनै आल़ै दस राज़ै। तेखअ एछणअ एक होर राज़अ राज़ करदअ। तेऊओ बभार हणअ इना होरी राज़ै का ज़ुदअ अर शुरू ई दी हेरनै तेऊ इना दसा राज़ै मांझ़ै चअन राज़ै खतम करी।✝7:24 प्रका. 17:12 25 तेऊ बोल़णअ परम प्रधान परमेशरा लै बूरअ अर तेऊए पबित्र परज़ा हंतणी तेऊ ज़ेही नां केही। सह हणअ तिन्‍नां लै खास्सअ नर्दैई कि तेऊ करनी तिन्‍नें तिह-थैर, बिधी-बधान खतम करने कोशिश। साढै चिई साला तैणीं करनअ तेऊ परमेशरे पबित्र परज़ा प्रैंदै राज़।✝7:25 प्रका. 12:14; 13:5,6 26 तेखअ लागणअ नसाफ करना लै परमेशरो दरबार, परमेशरा छ़ड़ैऊंणअ तेऊ का राज़ पोर्ही अर सह करनअ तेऊ पठी खतम। 27 तेखअ दैणअ धरती दी सोभी देशो महान राज़ परमेशरे पबित्र परज़ा लै। तिन्‍नों राज़ निं तेखअ कधि खतम हणअ, धरती दी राज़ करनै आल़ै करनी तेखअ तिन्‍नें च़ाकरी अर तिन्‍नां मनणअ ज़िहअ तिंयां बोले तिहअ हुकम।’✝7:27 प्रका. 11:15; 20:4; 22:5

28 "ईंयां एतरी गल्‍ला भाल़ी मंऐं सुपनै। एता करै तबझ़ुअ हुंह दानिएल खास्सअ। मेरअ फिरअ त मुंह बी शेफल़अ, पर मंऐं निं इना गल्‍ले बारै कोही का खोज़अ आथी।"