Apocalipse 14

मिम्मूं अर तेऊए लोग

1 एता बाद भाल़अ मंऐं किज़ै होर, सह थिअ इहअ कि मंऐं भाल़अ कि मिम्मूं आसा सियोन धारा खल़्हुअ द अर तेऊ संघै आसा तेऊए 144,000 मणछ, तिन्‍नें माथै दी त तेऊओ अर तेऊए बाबो नाअं लिखअ द। 2 मंऐं शूणअ स्वर्गा का पाणींए छ़ोआ ज़िहअ शणकार या बडै गुल़ूबिज़ल़ू ज़िहै बोल। अह बोल ज़ाण्हिंआं त इहअ ज़ाणनअ बींन बाज़णैं आल़ै आसा बींन बाज़दै लागै दै।✝14:2 एज. 43:2

3 तिंयां 144,000 आसा राज़गाद्दी, तिन्‍नां ज़िऊंदै प्राणीं अर टोलीए सैणैं सम्हनै एक नऊंईं गिहा बोल्दै लागै ज़ेता सिधै तिंयां ई सका तै शिखल़ी। तिंयां आसा तिंयां पबित्र मणछ ज़ुंण परमेशरै तिन्‍नां मणछा मांझ़ा का आणै तै बच़ाऊई ज़ुंण पृथूई दी रहा। 4 ईंयां आसा तिंयां ज़ुंण इहै मणछा ज़िहै पबित्र आसा ज़ुंणी कधि कंज़रैई निं किई, इहै ई तिन्‍नैं निं मिम्मूं का सुआई होरी कोहिए पूज़ा किई। ज़िधा लै बी मिम्मूं डेओआ, तिंयां बी डेओआ तेऊ पिछ़ू-पिछ़ू। तिंयां आसा तिंयां ई ज़ुंण पृथूईए सोभी मणछा मांझ़ा का आसा बच़ाऊऐ दै। ज़िहै लोग तिन्‍नें फसला का पैहलअ फल़ परमेशरा लै दैआ, तिंयां बी आसा तिहै ई परमेशर अर मिम्मूं लै पैहलै फल़ भैंट किऐ दै। 5 तिन्‍नें खाखा का निं कधि झ़ुठअ निखल़दअ त, तिंयां थिऐ नर्दोश।

चअन स्वर्ग दूत

6 तेखअ भाल़अ मंऐं एक होर स्वर्ग दूत सरगै उछ़टै दी डैऊंदअ लागअ द। तेऊ का थिअ पृथूई दी रहणैं आल़ी हर ज़ाती, हर देश, खिंब, भाषा अर सोभी लोगा लै सदा लै खुशीओ समाद। 7 तेऊ बोलअ ज़ोरै-ज़ोरै, "परमेशरा का डरा, अर तेऊए अदर अर ज़ै-ज़ैकार करा, किल्हैकि तेऊए नसाफ हणें धैल़ी गई एछी। तेऊए च़ाकरी करा, ज़ुंणी स्वर्गै, पृथूई, समुंदर अर पाणींए सोबल़ा आसा बणाईं दी।"✝14:7 नहे. 9:6; प्रका. 4:11

8 तेखअ आअ पैहलै स्वर्ग दूता पिछ़ू एक दुजअ स्वर्ग दूत इहअ बोल्दी, "ढूल़अ, सह बाबेल ढूल़अ, ज़सरी कंज़रैईए बरैबाद करनै आल़ी झ़रीली शराब झुटी करै सोभै ज़ाती छ़ोतली हुई ती।"✝14:8 ईशा. 21:9; जेर. 51:7

9 तेखअ आअ तिन्‍नां दूई स्वर्ग दूता पिछ़ू एक होर चिऊथअ स्वर्ग दूत अर सह थिअ ज़ोरै इहअ बोल्दअ लागअ द, "ज़ुंण तेऊ पशूए या तेऊए मुहुर्तीए पूज़ा करा अर ज़सरै माथै अर दैहणै हाथै तेऊ पशूए छ़ाप आसा लागी दी तिन्‍नां लै दैणीं परमेशरा सज़ा। 10 परमेशरा आसा तिन्‍नां लै भारी रोश्शै आई दी अर तेऊओ रोश्श हणअ झ़रीलै दाख रसा ज़िहअ ज़ुंण तेऊ तिन्‍नां लै आपणीं लोहदी का झुटणा लै दैणअ। तिंयां पाणै पबित्र स्वर्ग दूते सम्हनै अर मिम्मूं सम्हनै आगी अर गंधका जैंदरी चाछल़दै।✝14:10 ईशा. 51:17

11 "तिन्‍नें दझ़णेंओ धूँ रहणअ जुगै-जुगै लागी। ज़ुंण तेऊ पशू अर तेऊए मुहुर्तीए पूज़ा करा, अर ज़ुंण तेऊए नाओंए छ़ाप लाआ, तिन्‍नां निं राची धैल़ी च़ैन भेटणअ।"

12 पबित्र लोगो सबर आसा एता ई दी। ज़ुंण परमेशरो हुकम मना अर प्रभू ईशू दी विश्वास करा।

13 मंऐं शूणअ स्वर्गै इहअ बोल कि एता लिख, ज़ुंण मुल्दै एभा पोर्ही प्रभू दी विश्वास करी मरा, परमेशरा दैणीं तिन्‍नां लै बर्गत। परमेशरे आत्मां बोला इहअ, हाँ, किल्हैकि तिन्‍नां भेटणअ आपणीं मैन्था का राम अर तिन्‍नें भलै कामें भेटणीं तिन्‍नां नांम।

लऊंणीं

14 तेखअ भाल़अ मंऐं एक शेतअ बादल़ आसा अर तेऊ बादल़ा दी आसा मुंह मणछे पूता ज़िहअ कुंण बेठअ द अर तेऊए मुंडा दी आसा सुन्‍नेंओ मुगट अर हाथै आसा तिछी दाची।✝14:14 दान. 10:16

15 तेखअ निखल़अ तेभी एक होर स्वर्ग दूत, सह थिअ च़ौथअ स्वर्ग दूत स्वर्गे भबना का परमेशरो समाद लई। तेऊ बोलअ ज़ोरै-ज़ोरै तेऊ लै ज़ुंण बादल़ा दी त बेठअ द, "आपणीं दाची करै दै लऊंणीं, किल्हैकि लऊंणेओ बगत गअ हई, पृथूईए फसल गई पाक्‍की।" 16 सह ज़ुंण बादल़ा दी बेठअ द त, तेऊ लाई पृथूई दी आपणीं दाची अर संघा लागअ पृथूई दी दाची करै लऊंदअ।

17 तेखअ निखल़अ एक होर स्वर्ग दूत तेऊ भबना का, ज़ुंण स्वर्गै पबित्र ज़ैगा आसा, अर तेऊ का बी थिई एक तिछी दाची। 18 तेखअ निखल़अ बेदी का एक होर स्वर्ग दूत अर सह थिअ छ़ऊअ स्वर्ग दूत तेऊ का थिई बेदी प्रैंदै आगी करै ज़ल़दै धनैरे ज़िम्मैंबारी। तेऊ का बी थिई एक तिछी दाची, तेऊ लै बोलअ ज़ोरै-ज़ोरै, "आपणीं दाची करै काट पृथूईए दाखे लुम्बरू, किल्हैकि तिंयां आसा गऐ दै पाक्‍की।" 19 तेखअ ज़ुंण धरती दी दाख थिई तेते लुम्बरू काटै स्वर्ग दूतै दाची करै। तिंयां दाखे लुम्बर झाल़ै तेऊ एही ज़ैगा लै ज़िधी तिन्‍नां जैंटी सके। एतो मतलब आसा इहअ कि परमेशरा दैणीं घोर सज़ा। तिंयां दाख जैंटै नगरी बागै। 20 ज़िधी तिंयां दाख जैंटै तिधा का निखल़अ एतरअ लोहू कि उझै पुजअ घोल़े नाका तैणीं लाम्मअ पुजअ कोई अर 180 मील दूर तैणीं।✝14:20 ईशा. 63:3