जोहन्‍ना 1

45 फलिप्पै बोलअ नतनेला सेटा डेऊई, "ज़सरै बारै परमेशरे गूर मोसा लिखै दै बधाना दी बोलअ, अर परमेशरे गूरै ज़ुंण आजू हणैं आल़ी गल्‍ला आसा खोज़ी दी, सह गअ हाम्हां भेटी, सह आसा युसुफो शोहरू नासरत नगरीओ ईशू।"✝1:45 मोत्त. 21:11

46 नतनेलै बोलअ तेऊ लै, "नासरत नगरी का कै कोई राम्बल़ी च़ीज़ बी निखल़ी सका?"

फलिप्पै बोलअ, "च़ाल्‍ल आप्पै भाल़।"

47 ईशू भाल़अ नतनेल आप्पू बाखा लै एछदअ संघा बोलअ, "भाल़ा, अह आसा असली इज़राईले खिंबा का। एऊ दी निं किछ़ै कपट आथी।"

48 नतनेलै बोलअ ईशू लै, "तंऐं किहअ करै बछ़ैणअ हुंह?"

ईशू दैनअ तेऊ लै ज़बाब, "फलिप्पै शादअ तूह बादा का, तेता का आजी हेरअ त मंऐं तूह फेडूए बूटा गोधै भाल़ी।"

49 तेखअ बोलअ नतनेलै, "हे गूरू, तूह ई आसा परमेशरो पूत अर तूह ई आसा इज़राईलो माहा राज़अ।"

50 ईशू बोलअ तेऊ लै, "मंऐं बोलअ, तूह भाल़अ मंऐं फेडूए बूटा गोधै, तै किअ तंऐं विश्वास? अह निं किछ़ बी आथी, ताह भाल़णैं एता का बडै-बडै काम।"✝1:50 जोह. 11:40

51 तेखअ बोलअ ईशू, "हुंह खोज़ा तम्हां का सत्त कि तम्हां भाल़णअ स्वर्ग खुल्हअ द अर परमेशरो स्वर्ग दूत हेरनअ तम्हां मुंह मणछे पूता लै उंधै एछदअ अर उझै डेऊंदअ।"✝1:51 मूल. 28:12