मिका 1

1 ज़हा ज़मानै जताम, अहाज अर हिजकिया यहूदा मुल्खै राज़ करा तै, तिन्‍नां धैल़ै दैनअ बिधाता मोरेशेत नगरीए मिका लै समाद। बिधाता खोज़ी धैनै मिका का सामरी अर एरुशलेम नगरीए बारै ईंयां गल्‍ला:

सामरी अर एरुशलेम नगरी लै शोगे गिह

2 देशा-देशे लोगो, शूणां!

पृथूई दी बस्सै दै शूणां सोभ धैन दैई!

मालक बिधाता दैणीं थारी शाजत,

मालक निखल़णअ आपणैं पबित्र घअरा का बागै।

3 भाल़ा! मालक निखल़अ आपणीं पबित्र ज़ैगा का बागा लै!

सह एछणअ उंधै पृथूई लै, तेऊ दैणीं उझै उछ़टी धारा-धारा हांढ।

4 तेऊए खूरा हेठै गल़णी तेभै बडी-बडी धारा एही,

ज़िहअ आगी करै मूम गल़ा।

ज़ैगै-ज़ैगै खाग हणैं होर बी डुघै,

तिंयां बगणैं धारा का आई दी पाणींए गाडा ज़िहै।

5 इज़राईली परज़ा किऐ बतेर्है पाप अर तिन्‍नैं किअ परमेशरा लै द्रोह! तैही निभणी ईंयां गल्‍ला ज़रूर। याकबे आद लुआदो दोश किज़ै आसा? राज़धानी सामरी नगरी! यहूदा मुल्खे मुहुर्ती पूज़ा करने कंज़रैई ओ दोशी कुंण आसा? एरुशलेम नगरी! 6 तैही बोला बिधाता इहअ, "मुंह करनी सामरी नगरी सऊंऐं मुल्खै गट्टै-माट्टे ज़ेही ज़ेथ दाखे बाग डाहा रोही! मुंह डाहणअ तेतो मलुअ नाल़ै शोटी, तेते आथरी बी पेच़णी मुंह गोधी का। 7 ऐहा नगरीए देअए मुहुर्तीए करनी मुंह छिक्‍करी-छिक्‍करी, तिन्‍नें कंज़रैई करै खटी दी कमाई करनी मुंह आगी करै दहई खतम। इने पूज़ा करने मुहुर्ती डाहणीं मुंह पठी खतम करी डिंगरी लाई। किल्हैकि तिन्‍नैं झाल़ी ईंयां सोभ च़िज़ा मुल्है विश्वास घात करी। तिहै ई एछणैं इने दुशमण तिन्‍नां निंणीं इने कमाई संघा दैणीं तिन्‍नां एही ई आपणैं देअआ लै।"

8 तेखअ बोलअ मिका इहअ, "ज़ुंण ईंयां गल्‍ला निभणी, एता लै करनअ मुंह ज़ोरै-ज़ोरै ढाहा लाई शोग। मुंह लागणअ नांगी घेरी नगाही हांढदै। मुंह लाणीं शैल़ी-शैल़ठै ज़ेही लैल़ा अर शुतर मुर्गै ज़ेही छजैल़ा। 9 सामरी नगरीओ ज़खम निं बिज़रनै आल़अ आथी, अह घोर बनाश पुजणअ यहूदा मुल्खै बी। अह बनाश हणअ मेरै आपणैं लोगे नगरी एरुशलेम बी।

दुशमणा घेप्पणी एरुशलेम नगरी

10 "ऐहा गल्‍ले बारै निं गात नगरी खोज़ी आथी, तिधी निं लेरा बी लाई। तेता का रहै आपणअ दुख प्रगट करना लै बेथ-लिपरा नगरी धूल़ै-माट्टै जैंदरी बधल़दै लागी। 11 शापीर नगरी बस्सै दै मणछो, तम्हैं डेओआ गलामी लै नांगै अर शर्मिंदै! सानण नगरी बस्सै दै मणछो, तम्हैं निं नगरी बागै निखल़दै लागी। ज़ेभै तम्हां का बेथ-एसेल नगरी मखाण पल़अ द शुण्हनअ, तेखअ जाणअ तम्हां का थोघ लागी कि तेथ निं तम्हां शरण च़ाल्‍ली भेटी। 12 मोरात नगरी आल़ै आसा दाह ज़िरी न्हैल़ै लागै दै। तिंयां आसा ऐहा आशा न्हैल़ै लागै दै कि तिन्‍नां लै जाणअ किज़ै भलअ हई। पर बिधाता छ़ाडणीं तिन्‍नां लै आफ़त ई। तेऊ पजैल़ी एरुशलेम प्रऊल़ी आजू तोही आफ़त। 13 तम्हैं ज़ुंण लकीश नगरी आसा बस्सै दै, आपणैं बागरी ज़िहै छ़ेक्‍कै ठुर्हनै आल़ै घोल़ै, रथ ज़ुंडा! यहूदा मुल्खै तै सोभी का आजी तम्हैं ई ज़ुंणीं सियोन नगरीए परज़ा पाप करदी डाही लाई! तम्हां लै आसा तेऊ ई ज़ुल्म करनैओ दोश ज़ुण इज़राईल मुल्खे परज़ा किअ। 14 तैही हुई तम्हां ऐबै मोरेशेत-गात नगरी लै बदाईगी दैणीं, अकज़ीब नगरी दैणअ इज़राईले राज़ घरानै लै धोखअ।

15 "मारेशा नगरी बस्सै दै लोगो, बिधाता छ़ाडणैं तम्हां लै दुशमण ज़हा थारी नगरी कबज़अ करनअ। इज़राईले प्रतप्पी राज़ै लागणअ अदुलाम नाओंए डुआरै लुक्‍की रहणअ। 16 यहूदा, आपणअ मूंड छ़ांबा पोर्ही, ज़िहअ मुक्षरलअ आपणअ मूंड छ़ांबा संघा कर शोग। तेरै लान्हैं ज़हा लै तूह खास्सअ झ़ूरा, तिंयां निंणै तेरै दुशमणा कहा होरी देशा लै गलाम बणाईं।"