मिका 4

नऊंअ इज़राईल अर नऊंअ भबन

1 आजू हणअ इहअ,

धार ज़िधी बिधातो भबन आसा

सह हणीं सोभी का उछ़टी धार,

सह धार हणीं सोभी धारा का महान।

तैहा धारा लै एछणैं देशा-देशा का खास्सै लोग।

2 तिन्‍नां लोगा बोल़णअ इहअ,

"एछा! हाम्हां डेऊणअ बिधाते धारा,

हाम्हां डेऊणअ तेऊ भबना लै ज़िधी

याकबे आद-लुआद परमेशरे पूज़ा-गाज़ा करा।

ताकि सह हाम्हां लै आपणअ बधान सखाओए,

अर हाम्हैं तेते साबै आपणीं ज़िन्दगी ज़िऊए।"

एरुशलेम हणअ बिधाते बधानो मूल़,

बिधाते शिक्षा एछणी एरुशलेम नगरी का।

3 बिधाता करनअ देशा-देशे लोगो नसाफ,

तेऊ करनअ दूर-दूर देशो फैंसलअ।

तिन्‍नां लोगा बणाणैं आपणीं तलबारा गाल़ी करै हल़े लुहाल़,

आपणैं बर्छ़ै गाल़ी करै बणाणीं तिन्‍नां दाची!

तेखअ निं देशा-देशा आप्पू मांझ़ै जुध करनै,

नां तिन्‍नां तेखअ जुध बिद्या शिखल़णीं।

4 हर मणछ रहणअ तेखअ आपणैं दाखे बागा

अर फेडूए बूटा हेठै निहंचै बेशी,

तिन्‍नां निं कोह दुशमण डरैऊंदअ एछणअ।

अह आसा स्वर्गे सारी सैने मालक बिधाते ज़बान।

5 होरी देशे लोग करा आपणैं-आपणैं देअए पूज़ा-गाज़ा अर च़ला बी तेते साबै। पर हाम्हां करनी आपणैं परमेशर बिधाते च़ाकरी अर ज़िहअ सह बोले हाम्हां करनअ सदा तिहअ।

बिधाता करनै इज़राईली भिई बलबान

6 बिधाता बोला इहअ, "आजू ज़ेभै अह बगत एछणअ, तेभै झाल़णीं मुंह आपणीं परज़ा ज़ुंण लाट्टी-टुंडी भेडा ज़िहै आसा। मुंह आणनीं आपणीं परज़ा बापस झाल़ी ज़ुंण मंऐं दूर-दूर डाही ती छिंगी, तिन्‍नां लै पाई ती मंऐं आफ़त, पर तिंयां करनै मुंह भिई कठा। 7 मेरी परज़ा ज़ुंण लाट्टी-टुंडी भेडा ज़िहै आसा, मुंह करनअ इहअ कि तिंयां ज़िऊंदै रहे। तिंयां ज़ुंण मंऐं दूर शोटी डाहै तै, तिन्‍नों बणाणअं मुंह बलबान देश। तेखअ हणअ हुंह बिधाता तिन्‍नों राज़अ अर मुंह करनअ सियोन धारा का तिन्‍नां प्रैंदै जुगै-जुगै तैणीं राज़।

8 "एरुशलेम, तूह आसा इहै चेचा ज़ेही ज़ेथ प्रैंदा का फुआल आपणीं भेडे हेल़्ही भाल़अ रहा लागी। तूह आसा सियोन बस्सै दै मणछा लै गहल़ा ज़ेही। ताल्है हणअ आजू इहअ ई, तूह हणीं भिई बलबान देशे राज़धानी ज़ेही तूह पैहलै आसा ती। आजू हणअ भिई इहअ राज़अ ज़हा एरुशलेम नगरी का तेरै लोगा प्रैंदै राज़ करनअ। 9 एरुशलेम नगरीऐ! ऐबै शुण तूह मेरै बोल, तूह किल्है आसा एही ज़ोरै-ज़ोरै लेरा लांदी लागी दी? ताह प्रैंदै कै कोह निं आथी राज़अ? तेरै सलाहकार कै सोभ गऐ मरी? तैही आसा ताह सूंणें दाह लागी दी बेटल़ी ज़िहै शूल़ लागै दै? 10 सियोन बस्सी दी परज़ा, तम्हां हणीं सूंणें दाह लागी दी बेटल़ी ज़ेही खास्सी दाह। सह हआ चाछल़दी अर लैल़ा लांदी लागी दी। तम्हां लागणअ नगरी बागै निखल़णअ अर बागै दहल़ै रहणअ। तम्हां लागणअ बाबेल देशा लै डेऊणअ, पर तिधी हेरनै तम्हैं मुंह बिधाता बच़ाऊई, मुंह करनै तम्हैं थारै दुशमणा का भिई आज़ाद। 11 एरुशलेम, एभै आसा तेरै खास्सै दुशमण देशे सैना तूह फेरा-फेर गोटी दी, ज़ुंण इहअ बोला, ‘हाम्हां करनी एरुशलेम नगरी बाख बरैबाद, सियोनो बनाश हंदअ भाल़ी हणअ हाम्हां खुश।’ 12 पर तिन्‍नां का निं थोघै कि हुंह बिधाता किज़ै सोठा! तिंयां निं समझ़दै ई आथी कि मुंह तिन्‍नां लै केही सज़ा दैणीं! तिंयां आसा मंऐं बिधाता ई इधा लै झाल़ै दै ज़िहअ कुंण मणछ ज़ेठै-शाल़्है मांडणा लै नाज़े काशी खहल़ै झाल़ा।

13 "सियोन नगरीए लोगो! उझ़िआ, आपणैं दुशमणा लै पल़ा चुटी, तिन्‍नां लै पल़ा खल़ै नाज़ा मांडणै ज़िहै चुटी! तम्हां हेरनअ इहअ करी, किल्हैकि मुंह बणाणैं थारै शींग लोहै ज़िहै राट्टै अर थारै खूर कांस्सै ज़िहै पाक्‍कै। तम्हां मांडणै खहल़ै नाज़ा ज़िहै कई देश। तिन्‍नां देशे ज़ैदात आणनीं तम्हां मुल्है। तिन्‍नें धन-माया करनी तम्हां मुल्है भैंट ज़ुंण सारी पृथूईओ मालक आसा।