1 "एरुशलेम नगरीए सैना, कठा हआ! तम्हैं तैर्हिआ, किल्हैकि थारै दुशमण च़ाल्‍लै तम्हां लै चुटी पल़ी। तिन्‍नैं आसा तम्हां संघै जुध छ़ेल़णां लै नगरी फेर गोट हेरअ द दैई। तिन्‍नां बाहणीं इज़राईले राज़ै लै थोथरै शोठै करै।"

2 बिधाता बोला इहअ, "बेतलेम एप्रात नगरीऐ! तूह आसा यहूदा मुल्खै एक होछ़ी ज़ेही नगरी। पर मुंह बिधाता बणाणअं तेरै लोगा जैंदरा का इज़राईल देशा प्रैंदै राज़अ। तेऊ एछणेंओ इंतज़ाम आसा मंऐं खास्सै पराणैं ज़मानै ओर्ही डाहअ द करी।"

3 बिधाता डाहणीं आपणीं परज़ा तिन्‍नें दुशमणा जैंदरी तेभै तैणीं शोटी ज़ेभै तैणीं सह सुंदी बेटल़ी आपणैं बलाका लै ज़ल्म निं हेरे दैई। तेखअ ज़ुंण इज़राईली गलामी दी हणैं डेऊऐ दै, तिंयां एछणैं आपणैं भाई-बंधा सेटा फिरी। 4 अह राज़अ हणअ बलबान किल्हैकि एऊ लै बल दैणअ बिधाता। तेऊ करनअ तिहअ इंतज़ाम ज़ेते लोगा ज़रुरत हणीं। सह हणअ इहै फुआला ज़िहअ ज़ुंण आपणीं भेडा लै सोभी गल्‍लो इंतज़ाम करा। तेऊ भेटणअ राज़ करनैओ हक परमेशर बिधाता का। तेखअ जाणअ संसारे सोभी लोगा का थोघ लागी कि सह आसा महान। 5 ज़ेऊ जुगै सह एछणअ, तेभा पोर्ही हणीं मणछा लै शांती। ज़ै अश्शूरी सैना म्हारै देशा लै चुटी पल़े अर म्हारी ज़ैगा बरैबाद करे, म्हारै सोभी का बलबान सैनापति निंणीं म्हारी सैना तिन्‍नां संघै जुधा लै। हाम्हां छ़ाडणैं तिन्‍नां संघै मकाबलै लै आपणैं सोभी का बलबान सैनापति।

6 तिन्‍नां करनै अश्शूरी तलबारा करै खतम संघा करनअ तिन्‍नां प्रैंदै राज़। तिन्‍नां करनअ ऐहा निम्रोद ज़ैगा अर एते सोभी नगरीए प्रऊल़ी राज़। इहअ करै करनै म्हारै तेऊ राज़ै हाम्हैं अश्शूरी राज़े गलामी का आज़ाद।

7 तेखअ याकबे आद-लुआद ज़ुंण ज़िऊंदै हणैं बच़ै दै, तिंयां हणैं देशै-देशै। तिंयां हणैं हर ज़ैगा दोत्ती पल़ी दी ओशा ज़िहै अर घाह दी पल़ी दी बरसाती ज़िहै ज़ुंण मणछे आसरै निं हंदी। 8 याकबे आद-लुआद ज़ुंण देशै-देशै ज़िऊंदै हणैं बच़ै दै, तिंयां हणैं बणें ज़ीबा जैंदरी सिहा ज़िहै। तिंयां हणैं लोगा जैंदरी भेडे हेल़्ही मांझ़ै ज़ुआन सिहा ज़िहै ज़ुंण ज़िधी बी डेऊअ तिधी पाआ सह हर पशू धेल़ी-च़िरी खतम अर तेऊ का निं तिन्‍नां कोह बच़ाऊई सकदअ। 9 इज़राईल हणअ इहअ ई बलबान अर सह ज़ितणअ आपणैं सोभी दुशमणा का अर तेऊ पाणै तिंयां सोभ मारी।

10 बिधाता बोला इहअ, "तेऊ ज़मानै पाणै मुंह थारै घोल़ै मारी अर थारै जुधा करने रथ चोल़ी। 11 थारै देशे नगरी करनी मुंह बरैबाद अर थारै गहल़-कोट पाणै मुंह ढोल़ी। 12 थारी ज़ादू-ज़ल़ंत करने च़िज़ा करनी मुंह खतम अर तम्हां जैंदरी निं कोह डांऊं-च़ेल्‍लै बच़णैं। 13 तम्हां जैंदरा का करनी मुंह मुहुर्ती अर पूज़ा करने पात्थरे ओडै खतम। तेखअ निं तम्हां कधि इना आपणैं हाथै बणाईं दी च़िज़े पूज़ा करनी। 14 अशेरा देबीए डौंड पेच़णैं मुंह तेरै देशै गोधी का पोर्ही। तेरी नगरी बी करनी मुंह बरैबाद। 15 होर देश बी ज़ुंण मेरअ हुकम निं मंदै, तिन्‍नां लै बी दैणीं मुंह सज़ा। तिन्‍नां का रहैऊंणअ मुंह आपणअ कोप।"