24 तेखअ खोज़ी ईशू तिन्‍नां का एक होर कथ्या, "स्वर्गो राज़ आसा तेऊ कृषाणा ज़िहअ ज़ुंणी आपणैं खेचै बधिया बेज़अ बऊअ। 25 पर ज़ांऊं लोग सुत्तै दै तै, तिन्‍नैं दुशमणै डाहै कणका जैंदरी बणें घाह लबहरै बऊई। 26 ज़ांऊं टिप्परू लागै अर सील निखल़ै तेखअ लागै तिंयां बणें घाह लबहरे दाणैं बी शुझदै।

27 "एता भाल़ी बोलअ तेऊए घअरे सोभी दास तेऊ सेटा एछी, ‘हे मालक, तंऐं कै आपणैं खेचै बधिया बेज़अ निं बऊअ त? तै ईंयां बणें लबहरै किधा का आऐ?’

28 "तेऊ बोलअ तिन्‍नां लै इहअ, ‘अह आसा कहा दुशमणो काम।’

"तिन्‍नैं दासै बोलअ मालका लै, ‘ऐबै तूह किज़ै बोला, हाम्हैं लबहरै कणक जैंदरा का पेच़ी झाल़ी डाहूं?’

29 "मालकै बोलअ तिन्‍नां लै, ‘इहअ निं करी, इहअ निं हआ कि बणें लबहरै झाल़दी बारी राम्बल़ै कणके दैणैंओ डाल़ बी झोठिआ। 30 तम्हैं करा इहअ, लऊंणै तैणीं दैआ इना दुही संघा-संघा बझ़णै। लऊंणे बगती बोल़णअ मुंह लऊंणै आल़ै लै कि इना बणें लबहरैओ लाऐ एकी ज़ैगा दहणा लै रूल़ अर कणक करै मेरै भढारै कठा।’"