Mateus 21

ज़िती करै एरुशलेम नगरी लै डेऊणअ

1 ईशू अर तेऊए बारा च़ेल्‍लै पुजै एरुशलेम नगरी नेल़ जैतून धारा, ज़ुंण बेतफगे गराऊंआं नेल़ आसा। ईशू छ़ाडै आपणैं दूई च़ेल्‍लै गराऊंआं लै। तिन्‍नां लै बोलअ तेऊ इहअ, 2 "आपणैं सम्हनै एऊ गराऊंऐं डेओआ। तिधी पुजधी भेटणीं तम्हां एक गाधी बान्हीं दी। तैहा संघै भेटणअ तम्हां तेसो एक बच्च़अ। तेऊ आणै तम्हैं खोल्ही मुंह सेटा लै। 3 ज़ै तम्हां का कुंण पुछ़े, तम्हैं बोलै इहअ कि प्रभू पल़ी एते पग्गर। तेखअ हेरनअ तेऊ सह तम्हां लै दैई।"

4 अह हुअ तैही कि परमेशरे गूरै ईशायाह ज़ुंण बोलअ थिअ, सह लोल़ी पूरअ हुअ,

5 "सियोन नगरी का बोला इहअ, ‘भाल़!

तेरअ राज़अ आअ ताह सेटा लै,

सह आसा शरीफ अर तेऊ करनी गाधे शुंआरी,

सह एछणअ गाधीए बच्च़ै प्रैंदै बेशी।’"

6 च़ेल्‍लै बी किअ तिहअ ई ज़िहअ-ज़िहअ ईशू तिन्‍नां लै बोलअ त। 7 तिन्‍नैं आणअ गाधी अर तेसो बच्च़अ संघा पाऐ तिन्‍नां प्रैंदै आपणैं च़ादरू, अर ईशू बेठअ गाधू प्रैंदै।

8 कई लोगै छ़ैऐ आपणैं झिकल़ै बाता अर कई छ़ैई खज़ूरे बूटा का नरम डाल़ी चोल़ी बाता। 9 ज़ुंण खास्सै मणछ आजू-पिछ़ू हांढदै तै लागै दै, तिंयां लागै ज़ोरै-ज़ोरै बोल्दै,

"राज़ै दाबेदे लुआदे ज़ै-ज़ैकार,

परमेशर ज़ुंण स्वर्गै आसा, सह दैआ तेऊ लै बर्गत ज़ुंण तेऊए नाओंऐं एछा।

परमेशरे ज़ै-ज़ैकार ज़ुंण स्वर्गै आसा।"

10 ज़ांऊं ईशू एरुशलेम नगरी पुजअ, सारी नगरी मच़अ हाल्‍लअ-गोल्‍लअ अर लोग लागै बोल्दै, "अह कुंण आसा?" 11 तेखअ बोलअ कई लोगै, "अह आसा गलील मुल्खे नासरत गराऊंऐं परमेशरो गूर ईशू।"