Zacarias 14

एरुशलेम अर होर देश

1 एरुशलेम बस्सै दै लोगो! धैन दैई शूणां! सह धैल़ी आसा नेल़ ज़ेभै बिधाता नसाफ करनअ। तेभै लुटणीं दुशमणा थारी ज़ैदात संघा बांडणी तिन्‍नां आप्पू मांझ़ै थारी आछी नदरी।

2 बिधाता करनै सोभ देश कठा ताकि तिंयां एरुशलेम नगरी संघै जुध छ़ेल़े। एरुशलेम नगरी करनअ दुशमणा कबज़अ, तिन्‍नां लुटणैं सोभ घर अर बेटल़ी करनीं तिन्‍नां ज़ोरा-ज़ोरी नांगी करी भ्रष्ट। नगरीए आधी बादी निंणीं कैद करी दुशमणा आपणैं देशा लै। पर बाकी बच़ै दै निं नगरी का पोर्ही काढणैं। 3 तेखअ डेऊणअ रोश्शै बिधाता अर तेऊ करनअ तिन्‍नां देशा संघै जुध ज़िहअ सह जुधे बगती जुध करा। 4 ज़ेभै इहअ हणअ, तेभै खल़्हणअ बिधाता एरुशलेम नगरी पुर्बा बाखा जैतूने धारा। जैतून धारे हणैं तेभै दूई धुआल़ अर तेते खाल़्ही पल़णीं पछ़मा तैणीं। जैतून धारो एक धुआल़ सिक्‍कणअ उतर दिशा बाखा अर दुजअ धुआल़ सिक्‍कणअ दखण दिशा बाखा। 5 तम्हैं ठुर्हनै ऐहा खाल़्ही बाती ज़ुंण धारे दूई धुआल़ा मांझ़ा-मांझ़ी अजेल तैणीं हणीं पुजी दी। तम्हैं ठुर्हनै तिहै ई ज़िहै थारै दाद-बाब ज़ाज़री डरै ठुर्है तै, तेऊ ज़मानै त यहूदा मुल्खै उज़ियाह राज़अ। तेखअ एछणअ मेरअ परमेशर बिधाता अर आपणैं पबित्र स्वर्ग दूत आणनैं तेऊ आप्पू संघै।

6 तैहा धैल़ी धुप्पअ निखल़णअ, नां बादल़ घोर्हनै अर नां ओश पल़णीं। 7 सह हणीं होरी धैल़ी का नुआहरी धैल़ी। तैहा धैल़ी निं राच ई पल़णीं, सान्हां बी हणअ तैहा धैल़ी प्रैश्शअ ई। तैहा धैल़ी ज़ाणअ सिधअ बिधाता कि सह केही धैल़ी हणीं।

8 तैहा धैल़ी रहणीं एरुशलेम नगरी का कबल्‍ली पाणींए गाड बगदी लागी। तेतो आधअ पाणीं बगणअ पुर्बा बाखे समुंदरा बाख अर आधअ पाणीं बगणअ पछ़मा बाखे समुंदरा लै। ज़िहअ तेतो पाणीं ठांढै धैल़ै बगा, गर्मींए धैल़ै बी रहणअ सह तिहअ ई बगदअ लागी।

9 तेखअ हणअ सारै संसारा प्रैंदै सिधअ बिधाता ई राज़अ। तैहा धैल़ी हणअ सिधअ एक्‍कै मालक अर तेऊओ नाअं बी हणअ एक्‍कै ई।

10 सारअ देश हणअ उतरा दिशा गिबा नगरी उंधै एरुशलेम दखणा बाखा रिमोन नगरी तैणीं रेगीस्ताना ज़िहअ शुन्‍नअ। पर एरुशलेम हणीं उझै उछ़टी अर सह रहणीं आपणीं उछ़टी ज़ैगा बस्सी। नगरी सिअं हणीं बिन्यामीन प्रऊल़ी पोर्ही, कूणींए प्रऊल़ ज़िधी पराणीं प्रऊल़ आसा थिई अर हनानेल कोटा पोर्ही तैहा ज़ैगा तैणीं तिन्‍नां कोफरी तैणीं ज़िधी राज़े दास दाखो रस काढा तै। 11 एरुशलेम नगरीए बादी हणीं खास्सी। तेखअ निं ऐहा नगरी लै भिई फिटक लागणअ अर नां बरैबाद हणीं। एरुशलेम नगरी हणैं लोग राज्ज़ी-राम्बल़ै निहंचै बस्सै दै।

12 ज़ुंणीं-ज़ुंणीं देशै एरुशलेम नगरी संघै जुध छ़ेल़ै तै, तिन्‍नां लै पाणीं बिधाता नबिज़री बमारी। तिन्‍नें देही चिजणी तिन्‍नें ज़िऊंदी ज़िता। तिन्‍नें आछी चिजणी तिन्‍नें आछिए खोल़्हा दी अर तिन्‍नें ज़िभा चिजणी तिन्‍नें खाखा। 13 तैहा धैल़ी करनअ बिधाता इहअ कि लोग हणैं इहै खास्सै डरै दै कि मणछा ढाकणअ आप्पू संघो दुजअ मणछ टाटू का अर तिन्‍नां पल़णअ एकी दुजै मारदै चुटी। 14 यहूदा मुल्खे परज़ा करनअ एरुशलेम नगरीए फाज़त करना लै जुध। इज़राईली ज़ितणैं तिन्‍नां फेर सोभी देशा का संघा करनी झाल़णअ तिन्‍नों सुन्‍नअ-च़ंदी, किम्मती झिकल़ै अर खास्सी ज़ैदात आप्पू लै। 15 ऐहा ई नबिज़री बमारी शाचणी तिन्‍नें घोल़ै, खच़रा, ऊँट, गाधै अर तिन्‍नें डेरे सोभी पशू लै।

16 खिरी एरुशलेम नगरी संघै जुध छ़ेल़णै आल़ै देशा मांझ़ै ज़ुंण देश बनाश हणैं का बच़े, तिंयां एछणैं हर साल एरुशलेम नगरी लै, तिन्‍नां टेक्‍कणअ तिधी बिधाता सेटा माथअ ज़ुंण स्वर्गे सारी सैनो मालक अर सारै संसारो राज़अ आसा। तिन्‍नां मनाऊंणअ बिधाते परज़ा संघै छ़ानींओ थैर बी। 17 ज़ै कुंण देश स्वर्गे सारी सैने मालक बिधाता राज़ै सेटा एरुशलेम नगरी नांईं एछे, तेऊ देशै निं सरगा का पाणीं बर्शणअ। 18 ज़ै मिसर देशे लोग छ़ानींए थैरै एरुशलेम बिधाता सेटा माथै टेक्‍कदै नांईं एछे, तिन्‍नां लै बी निं सरग बर्शणअ। तिंयां करनै बिधाता रोगी। ज़ै होर देश बी एरुशलेम बिधाता सेटा नांईं डेओए, तिन्‍नां बी लागणीं नबिज़री बमारी संघा मरनै तिंयां। 19 अह नबिज़री बमारी हणीं मिसर देशा लै सज़ा अर तिन्‍नां सोभी देशा लै सज़ा ज़ुंण छ़ानींए थैरा मनाऊंदै एरुशलेम नगरी नांईं एछदै।

20 तिन्‍नां धैल़ै लिखणअ लोगा घोल़े गल़ै लागी दी घांडी दी, "बिधाता लै पबित्र।" बिधाते भबने भडू हणैं तेतरै ई पबित्र ज़ेतरै बेदी सेटा प्रिहै हआ। 21 यहूदा मुल्ख अर एरुशलेम नगरीए सोभ भडू हणैं सोभै स्वर्गे सारी सैने मालक बिधाता लै पबित्र। ज़ेतरै बी मणछ बिधाता लै बल़ीदान करदै एछे, तिन्‍नां सटेऊंणी शिखा तिन्‍नां भडू दी। तैहा धैल़ी निं कोह बपारी स्वर्गे सारी सैने मालक बिधाते भबनै एछणअ।