1 Nanaomi ahaana alhoko aya yeehaniya Naboazi, ntu o nikosho ni Naelimeleki, owannyaya. Yoyo ari ntu ochuwania ni o nhakhu mwiichi. 2 Nihuku nimoka Naruthi aheerelha Nanaomi wiira, "Nkihiyeke etu kirwee kaavieavie mahalhahalha o choolhia mmamatani."

Nanaomi nkayaakhulha wiira, "Haya, urweeke etu mwaamwanaka."

3 Paahi Naruthi nkayaarwa umatani, nkayattwara attu yaakhungura choolhia, nkayalhokottacha machashi yaahiyachilhe aya. Kumbe nkayeephwanya anakenlhe umatani wa Naboazi, ntu o nikosho nimoka ni Naelimeleki.

4 Katashi aya, Naboazi ahowa akhumaka Ubethlehemu nkayaashikuriacha attu yaakhungura choolhia alhe yeeraka wiira, "Apwiiya Nlhuku, akhalhe vamoka ni inyu."

Ni ayo nkayaakhulhacha, "Apwiiya Nlhuku ovaherekeni."

5 Paahi Naboazi nkayankoha ntu eemelhelha attu yaakhungura choolhia ayo, "Ulhe mwalhi ulhe phi mpani?" 6 Ntu eemelhelha attu akina uyo nkaakhulha, "Yoyo mwalhi Mmoabu, wiilhe vamoka ni Nanaomi ukhuma Umoabu. 7 Ahokilhepelha wiira avire attwaraka utulhi attu anokhungura choolhia ayo, avire arokottaka mahalhahalha o choolhia. Paahi wiilhe toka wichishu ni uvara ntheko, nansho vano tu phi rweelhe awe uwiittuwani vanrapattani valhe."

8 Phi vavawo Naboazi verenlhe aya Naruthi wiira, "Wiiweke mwaamwanaka, uhirwee uurokottani machashi ukina ihikhalhe ilha imata ilha vekha. Waattukaneke alha imialhi ilha. 9 Tho, uweheke vanovara aya ntheko ni uwe wiithakaniheke mwa manyaathiyana mmo. Kihaamuka ashimirawo alha wiira ahuhuviheni. Wawolhiyaka nttona, urweeke vamiapuni vawo wawurieke maashi arikachilhe aya ashimirawo ayo."

10 Vavawo Naruthi nkayaakhoroma waakhoromelha Naboazi mpaka vathi wo wiitimarikha, ni wiira, "Nlhatuni no ukoonelha ikiriri thoko chiicho? Woonaka nnokichukulhelha chiicho ni mii kinari nlheto?"

11 Nansho Naboazi nkayaakhulha, "Kiheewa mwaha wonkhaye waapangenlhe inyu ahokohi inyu toka varimeelhe aya owannyu. Kihochuwelha chinre inyu wo waahiya manyanaangoro inyu, nkamwaahiya ilhapo inyu nkamwaawa uukhalhani wa attu mwahaachuwenlhe inyu khalhayi. 12 Apwiiya Nlhuku oocharihelhekeni wo nlhatu wo chilha chonkhaye chipangilhe inyu chi. Apwiiya Nlhuku o Israeli mwaattawenlhe inyu ovahekeni nttuvo nitiminre."

13 Naruthi nkayaakhulha, "Athumwanaka, inyuva nhokipangelha moombone chinene. Ata inakhalhaka wiira mii akirii thoko mmoka a anamitheko inyu, kihoteelhiya ukhalhawaya nhokiteelhiha nrima ni ukoopana mwaha wo nrima woombone."

14 Ikatema yaalhiya yolhia, Naboazi aheehanelha Naruthi yiiraka wiira, "Kharibu vaa, mmweeke mwaalhia nkatte ni upapha munhuchini." Paahi Naruthi ahonkoma vamoka ni attu aakhungura choolhia. Ni Naboazi ahaavaha Naruthi yolhia yo waarikiya nkayaalhia, nkayaawona mpaka uhiya. 15 Nkayaakhalha wiira Naruthi vaathempe aya urokottacha choolhia, Naboazi aheerelhacha anamitheko aya wiira, "Mwaahiyeke arokotteke ata weeshiye ihiru uwo wala nhaachiichihe. 16 Wo uthepa vavawo, ntholholheke machashi nttuke inyu mmatiitani ayo mwaahiyeke awieke wala nhaachiichihe."

17 Paahi Naruthi ahorokotta machashi mpaka uchechilho. Vaamalhinhe aya weepetta ishayiri ahopatta wo upwaha isaado imoka. 18 Amalhihekeru ahokusha ishayiri yaapante aya nkaarwana uwani nkayooniha ahokohi aya. Tho ahokumiha ni yolhia yaahalhinhe aya vaalhilhie aya nkayaawona, ni waavaha. 19 Paahi ahokohi aya ayo nkayaakoha, "Nrokontte vayi ishayiri yonkhaye ilha? Kwaani mwaari umatani wa apani? Apuhihiyeke yayo ohiyerenreni ayo."

Vavawo Naruthi nkayaahimeria Nanaomi wiira aavanre ntheko umatani wa ntu eehaniya Naboazi. 20 Paahi Nanaomi nkayeerelha ahokohi aya wiira, "Apwiiya Nlhuku aavahereke yayo Naboazi ayo! Nlhuku o mahuku o uhimalha nootimiriha malhehano awe wa attu akumi ni attu akhwilhe." Nkayaathepa tho wulhumacha wiira, "Yoyo ntu uyo nlhoko ihu ni uyo phi mmoka a attu anothananiya unilhelha hii."

21 Paahi Naruthi, ntu o Umoabu, nkayeera, "Tho, ahokiirelha wiira, kiithakaniheke ni imialhi anovara ntheko wo ukhungura choolhia chaya ayo mpaka vanohalha aya umalhiha ukhungura choolhia chonkhaye."

22 Paahi Nanaomi nkayeerelha Naruthi wiira, "Eiyo mwaamwanaka. Vahorera uvara ntheko vamoka ni imialhi akina mmatani mwa Naboazi mmo, ukhalhawaya veekinaka mwanhuvihiya mwakaarweelhe umatani wa ntu nkina."

23 Paahi etu, Naruthi nkaavara ntheko vamoka ni yayo imialhi anamitheko a Naboazi ayo, nkayaarokottacha machashi mpaka vaamanlhe aya nlhalha wo ishayiri ni ingaano. Wo mahuku onkhaye ayo yaari akhalhaka ni ahokohi aya ayo.