1 Yavireke mahuku, Nanaomi aheerelha ahokohi aya, Naruthi wiira, "Anaaka, kihothananiya uwaaveriani alhopwana o uvekani wiira nkhalhe ni inupa inyu. 2 Paahi etu vano alha Naboazi alha, mwaapangelhe inyu ntheko vamoka ni imialhi akhunaninyu alha, yayo o nihimo nihu! Paahi etu nkiiweke. Uchechilho anorwaa weepettani ishayiri. 3 Vavawo etu, nkhucheke, mwooteke makhura o nukhelha ni uwarelha. Nrweeke vakittu vaneepettelha aya ishayiri vawo, nansho nhiichoonihe chitema mpaka vanohalha aya umalhiha ulhia ni uwuria. 4 Tho, nchuwelheke vakittu vanohalha aya urupa. Vanohalha aya uhichilha vawo, nrweeke mwiithaka, mwaapatakulheke umietoni mwarupeke vavawo. Ni ayo anokouhimeriani ittu yo upanga."

5 Naruthi nkayaakhulha, "Kinoopanga choothene thoko chinre inyu wo ukihimeria chiyo."

6 Paahi etu Naruthi ahorwaa vakittu veepettiya ishayiri, nkayaapanga thoko chaalheheriye aya ni ahokohi aya chiyo. 7 Naboazi vaamalhinhe aya ulhia ni uwuria, ahoteelhiya munrimani, nkayoona wiitho uwo aayee. Nkayaarwa vaari ntita no ishayiri nkayaarupa. Naruthi nkayaarwa yiithaka nkayaapatakulha umietoni u Naboazi nkayaarupa vavawo. 8 Uhiyu iriyari Naboazi ahothuthuwa, nkayaarukunuwa ni ushanga umwoona nthiyana narumpe umietoni waya. 9 Nkayaakoha, "Inyuva phi apani?"

Naruthi nkayaakhulha, "Miyaano Ruthi, namitheko inyu. Nkikhunelheke ikuwo inyu iyo mii namitheko inyu, ukhalhawaya inyuva phi alhoko aya owannyaka akhwilhe, nnothananiya ukelha manupa."

10 Naboazi nkayeera, "Apwiiya Nlhuku ovaherekeni ibarakha ukhalhawaya wo chilha chonkhaye chinopanga inyu nnowooniha umanya upwaha ata chipangilhe inyu wa ahokohi inyu ukhalhawaya khamwaanvie ashimirawo amashikini ama o nhakhu wiira oovekeni. 11 Vano etu Naruthi nhikelhiye nipampa, kinoupangelhani ittu iriyoothe inohalha inyu ulhepelha ukhalhawaya kila ntu vawanihu va, hochuwelha nrima woombone urina inyu. 12 Irii wo ikekhiaye wiira mii phi nothananiya uulhelhani inyuva, nansho haawo tho nothananiya uulhelhani, ri vakhiviru ni inyu ukipwaha mii. 13 Paahi etu nkhalheke vaa uhiyu wonkhaye ulha, washaakaru ninowoona wiira noorumelhelha uulhelhani ama kuhiwe. Arumelhelhaka uulhelhani, aye, nansho akhotaka mii kinoulhelhani. Nrupeke vaa etu mpaka wichishu."

14 Paahi Naruthi nkayaarupa umietoni vawo mpaka wichishu, nansho yonkwilhe mapikosha wiira ahooniye, ukhalhawaya Naboazi khayaattunne attu achuwelhe wiira Naruthi yaarumpe vavawo veepettelhiya ishayiri vawo. 15 Naboazi nkayeerelha Naruthi wiira, "Mwaathalheke ikuwo mwiikhunenlhe inyu iyo vathi vawo." Naruthi nkayaathalha. Naboazi nkayaahelhelha ishayiri n'debe nimoka, nkayaaria vamuruni wiira akusheke uwannyaya. 16 Vaapilhe aya vawani, ahokohi aya yahaakoha, "Yeerelhe chani anaaka?" Naruthi nkayaahimiacha mwaha wonkhaye upangilhe aya ni Naboazi. 17 Nkayaahimiachera tho wiira, "Ahokihimeria wiira, kihihokolhie wa ahokohi aka mathatharu, paahi etu phi kivahilhe aya ishayiri n'debe nimoka."

18 Nanaomi nkayeera wiira, "Vano mmaalheke etu anaaka mpaka vanohalha inyu woona ittu inohalha ukhumelhelha. Naboazi anoothemwa lhelho mpaka vanohalha aya utimiriha malhove aya onkhaye."