1 Khalhayi vawo, ikatema owaamulha milhatu vaari aya atawaraka Uisraeli, yahokhuruwa ikuruna mwiilhaponi mmo. Ntu mmoka ukhuma Ubethlehemu, Uyudea vamoka ni ahanu awe ni achishaana awe eelhi ashilhopwana ahorwaa ukhalhani ulhetoni wiilhaponi Umoabu. 2 Yoyo ntu uyo eehaniya Elimeleki ni ahanu awe yeehaniya Nanaomi. Achishaana aya eelhi ashilhopwana, mmoka eehaniya Mahaloni ni nkina uyo eehaniya Kilioni. Yoyo ntu uyo vamoka ni amuchi awe yaari o nikosho na Aefrati o Ubethlehemu yo Uyudea. Yahorwaa ilhapo yo Umoabu, nkayaakhalha wowo. 3 Ikatema vaari aya wowo, Naelimeleki owannyaya Nanaomi, ahorimeelha ni Nanaomi nkayaahiya ni achishaana aya eelhi ayo. 4 Yayo ashimirawo ayo yahaaveka imialhi o Umoabu, Orpa ni Ruthi. Chavireke iyaakha khumi, 5 Mahaloni ni Kilioni ni ayo ahorimeelhacha. Nanaomi nkayaahalha veekha, ahiri ni owannyaya ama achishaana.

6 Kaanyuma aya, Nanaomi aheewa wiira Apwiiya Nlhuku yahaavahera attu aya upatta choolhia chinchi. Paahi etu, yahothama Umoabu ni uhokolhia uwannyaya vamoka ni ashihokohi aya ayo. 7 Ahothama vakittu vaakhalha aya vamoka ni ashihokohi aya ayo, ulhukama uhokolhia Uyudea. 8 Nansho vaachokholha aya nkwaha, Nanaomi aheerelhacha ashihokohi aya eelhi ayo wiira, "Nhokolhieke etu kila mmoka uwannyawe wa anumwanawe. Kinolhepelha wiira Apwiiya Nlhuku akhalhe o nrima woombone uwaninyu mwaatti thoko chaari inyu mwaatti ni nrima woombone uwannyaka ni wa attu aka arimelhanche alhe. 9 Apwiiya Nlhuku ovahereni kila mmoka inyu ampatte nlhopwana ni upatta kila mmoka inupa awe."

Yamalheke Nanaomi ahaalhehacha ni waakumbatiracha. Nansho onkhaye nkayaachokholha wulha akhuwelhachaka, 10 ni ayo nkayeeracha, "Ata mena! Hii ninouttukanani vamoka vanorwaa inyu wa attu inyu."

11 Nansho Nanaomi yahaapepechacha yeeraka wiira, "Mena! Nhokolhieke umawannyu achishaana aka. Nlhatuni no ukittwara? Chani, mwaatti nnanyihera wiira kinowooria waapatta achishaana ashilhopwana anohalha uthelhani mwaatti? 12 Nhokolhiacheke uwannyu achishaana aka ukhalhawaya mii kihoolhuvalha chinene vano, akinooria uvekiya tho. Ata kineeraka wiira kinookhulhuvelha, ni ata kaapattaka alhopwana o ukiveka lhelho va ni waayara ashaana ashilhopwana, 13 chani nnowooria waalhita mpaka onnuwe? Chani nnowooria wiishunga wiira nhivekiye ni manyaalhopwana akina? Ihikhalhe chiicho achishaana aka! Mwaha aka uri worikarika chinene wo nlhatu winyu, ukhalhawaya Apwiiya Nlhuku ahohiyerera ukipatte wu uhuva wu."

14 Vavawo nkayaachokholhacha ukhuwelhacha ni wunlha tho. Phi vavawo tho Naorpa vaakumbatinre aya ahokohi aya, ni waalheha uhokolhia uwannyaya. Nansho Naruthi, ahohalha vamoka ni Nanaomi. 15 Paahi Nanaomi nkayeerelha Naruthi wiira, "Mwooneke akhunaninyu ahohokolhia uwannyaya wa anumwanaya ni wa milhuku aya. Paahi etu ni inyu nhokolhieke mwaattwareke akhunaninyu ayo."

16 Nansho Naruthi ahaakhulha wiira,

"Nhikipepeche wiira kuuhiyeni,

ni mena nhikichiichihe uttukanani.

Uriwoothe unohalha inyu urwaa ni ukhalha uwo, ni mii kinoorwaa wowo,

unorwaa inyu ukhalha uwo, ni mii kinookhalha wowo,

ni attu inyu anookhalha phi attu aka,

ni Nlhuku inyu nookhalha Nlhuku aka.

17 Vakittu vanohalha inyu ukhwelha ni mii kinookhwelha vavawo,

phi vavawo vanokhalha aka uvithiya.

Apwiiya Nlhuku akitwarusheke chinene yakhalhaka kinomwalhaanihiya ni inyu,

yaahikhalhe wo nookhwa veekha aya."

18 Ni Nanaomi vonne aya wiira Naruthi ahokhanyerera waattukana vamoka uwo, ahohiya waapepecha uwo. 19 Phi vavawo oyelhi vaarwelhe aya nkwaha aya mpaka Ubethlehemu. Vaapilhe aya wowo, attu onkhaye ahoomiya uwanoni ata manyoopani yahokohanacha wiira, "Chani ana alha phi Nanaomi?"

20 Nanaomi nkayeera wiira, "Nhikiihane tho Naomi nkiihaneke Mara, maana aya uweria, ukhalhawaya Nlhuku o Machiri chinene hopanga ukumi aka ukhalhe wo uweria chinene. 21 Vaathamme aka vaa, kaari ntu o chittu chinchi, nansho vano Apwiiya Nlhuku ahokihokolhosha mathatharu. Chani woonaka nnokihaana Naomi, maana aya uvaheriya, uno Apwiiya Nlhuku anakitwarunshe, ni ayo Apwiiya Nlhuku o machiri ahohiyerera wiira kihuve?"

22 Phi chiichammo etu Nanaomi vamoka ni Naruthi nthiyana Mmoabu, vaahokolhelhe aya ukhuma Umoabu, ni uphiya Ubethlehemu ikatema nlhalha wo ishayiri vaachokholha aya.