1 Paahi attu o Uisraeli vaakumanne aya Umizpa aholhupelhacha wa Apwiiya Nlhuku wiira: "Khaawo ata mmoka ihu nohalha unvekiha mwaamwanawe mwanthiyana wa attu o nikosho ni Nabenyamini." 2 Paahi attu o Uisraeli ahorwaacha mpaka Ubetheli nkayaakhalha wowo umihoolho wa Nlhuku mpaka uchechilho. Nkayaakhuwelhacha onlhaka wo nlhatu no urushiya chinene yeeraka, 3 "Inyu Apwiiya Nlhuku, Nlhuku o Uisraeli, chani nlhatuni no unikhumelhelha yelha ittu ilha, ata nikosho na attu o Uisraeli niwukuwe munlhokoni wihu?"

4 Waashelhe waya attu ahonkwacha wichishuru, nkayaatheka madhubahu nkayakhumiha isadaka cho uwiiha mpuha. 5 Yamalheke nkayaakohanacha yeeraka, "Chani mmilhokoni wa attu o nikosho nonkhaye na attu o Uisraeli uhawo nlhoko uriyoothe uhiwilhe vakumanne ihu umihoolho wa Apwiiya Nlhuku va?" Ukhalhawaya aholhupelha wiira ntu riyoothe hinophiya umihoolho wa Apwiiya Nlhuku Umizpa uwo yoyo eeviyeke. 6 Nansho attu o Uisraeli nkayoonelha ikiriri ashilhoko aya o nikosho ni Nabenyamini, nkeera wiira, "Lhelho nikosho nimoka na attu o Uisraeli nihorimeelha. 7 Vano ninohalha uphanga ittu yaani wiira naavahe manyaathiyana alha ashilhopwana o nikosho ni Nabenyamini ahalhenlhe alha? Ukhalhawaya naholhupelha wo nchina na Apwiiya Nlhuku wiira khaninaavekiha achishana ihu ashithiyana akhalhache manyaahanu aya!"

8 Vaathananne aya uchuwelha yakhalhaka wahaawo nlhoko uriwoothe wo nikosho na attu o Uisraeli uhiwiilhe vanokumaaniya umihoolho wa Apwiiya Nlhuku vawo Umizpa uwo, nkayaachuwelha wiira khaariwo ntu riyoothe ukhuma Uyabeshgileadi aawiilhe vanokumaaniya vawo. 9 Ukhalhawaya attu vaalhakelhiye aya, khaariwo ata ntu mmoka o Uyabeshgileadi. 10 Paahi nlhoko wa attu o Uisraeli wahaarweeha attu o machiri chinene maelufu khumi ni maelufu meelhi, ni weerelha, "Nrweeke mweevakacheke attu o Uyabeshgileadi, manyaahithiyaana vamoka ni achishana aya. 11 Mweevakacheke manyaalhopwana onkhaye ni manyaathiyana ashithiyana onkhaye athuphanche mooro." 12 Paahi nkayaapwanya mmilhokoni wa attu o Uyabeshgileadi imialhi imia ncheshe o uhithupha mooro, nkayaarweha unipuroni Ushilo, ilhapo yo Ukanaani.

13 Yamalheke nlhoko wonkhaye wahorweeha nttenga wo mpuha wa attu o nikosho ni Nabenyamini ari umwalhani Urimoni. 14 Yayo manyaalhopwana o nikosho ni Nabenyamini nkayahokolhelha ashikunana aya ayo yeyo ikatema. Paahi nkaavahiya ashithiyana aawihachiye ukhuma Uyabeshgileadi uwo alhe. Nansho ashithiyana ayo kaathonshe.

15 Attu o Uisraeli nkayoonelha ikiriri attu o nikosho ni Nabenyamini, ukhalhawaya Apwiiya Nlhuku ahohiya ukhalhe ni mwiinano munlhokoni mwa attu o Uisraeli. 16 Yamalhekeru ashulhupalhe a attu onkhaye nkayeeracha wiira, "Vano ninohalha uphanga ittu yaani wiira naavahe manyaathiyana ashilhopwana aahanlhe, ukhalhawaya ashithiyana onkhaye o nikosho ni Nabenyamini ahorimeelhacha? 17 Iri lazima ashilhopwana aahanlhe o nikosho ni Nabenyamini avahiye manyaathiyana wiira nihipotere nikosho nirinoothe na attu o Uisraeli, ni nikosho na attu o Ubenyamini nunchererie. 18 Nansho khaninooria waakumiha achishana ihu akhalhache manyaahanu aya, ukhalhawaya naholhupelha wiira ntu riyoothe nohalha unvekiha mwaamwanawe mwanthiyana wa manyaalhopwana o nikosho ni Nabenyamini alhaviyeke."

19 Paahi nkayoopuwelha wiira isikukuu ya Apwiiya Nlhuku inopangiya kila iyaakha Ushilo uwo, iwani irii mpata wo uchulhu wo Ubetheli, wi iwani iri iphiro yuulhupalhe inokhuma Ubetheli urwaa Ushekemu, yaari inaatamenrie. 20 Paahi etu, nkayaalhehera manyaalhopwana o nikosho ni Nabenyamini alhe wiira, "Nrwaacheke mweethelheke nu wiivitha mmamatani mwo izabibu, 21 mwakhalheke miitho. Ashithiyana o Ushilo vanokhuma aya vathe uthwelha ikatema yo isikukuu, nkhumeke umizabibuni ni kila ntu akusheke mwalhi mmoka akhalheke ahanu awe. Yamalhaka nhokolhieke wiilhaponi u Nabenyamini. 22 Manyathumwanaya ama ashirokoraya awaaka unichukhulhelhani ninooweerelha wiira, ‘Hii ninoulhepelhani wiira mwoonelhe ikiriri attu o nikosho ni Nabenyamini, mwaahiyereke aakusheke ashithiyana ayo, ukhalhawaya khanaapattilhe ukhotoni Uyabeshgileadi. Ni ukhalhawaya mwaatti mwaashinene khanivahilhe achishana inyu ayo, kannohukhumulhiya.’ "

23 Ashilhopwana o nikosho ni Nabenyamini alhe nkayaapanga chiichammo, kila mmoka kayeethanlhiya mwaalhi mmilhokoni wa ashithiyana akumme vathe utwelhani Ushilo uwo ni unkusha akalheke ahanu awe. Yamalheke kayahokholhiacha vakittu wawe, kayaatheka iwani yonanano ni ukhalha wowo. 24 Ikatema ya attu o Uisraeli kayaathamacha, kila ntu kayahokholhi aya vakittu o nikosho naya ni ashilhoko aya. Kila ntu ahohokholhiya vakittu vameelhiye awe.

25 Paahi yayo mahuku ayo khaariwo mwene o nikosho na attu o Uisraeli. Ni kila ntu ahopanga thoko choonilhe awe.