1 Yamalheke, nnepa wo wiirimu wa Apwiiya Nlhuku ahowelha ukhuma Ugalgali urwaa Ubokimu. Nkayeerelha wiira, "Mii kihoukumihani mwaatti ukhuma ilhapo yo Umisri, ni uwiihani mpaka ilhapo kaalhupenlhe aka manyaathumwaninyu, venre aka wiira, ‘Akinontha nenno nlhove naka nno kaalhupenlhe aka ni inyu mwaatti nno mena. 2 Ni inyu mwaatti nhilhehane nlhove nirinoothe nne, ni alha attu o ilha ilhapo ilha. Mpomolhacheke madhubahu aya.’ Nansho khamwaarumelhenlhe nlhove naka, nhorukunusha. 3 Paahi wo nlhatu wa alha mii kineera wiira: Akinoomolhacha anenchi wiira athamache umihoolho winyu, nansho anoouhomachani thoko mwiiwa mmapararini mwinyu, ni milhuku chaya chinouwayihani vanothimichiya inyu." 4 Nnepa wa Apwiiya Nlhuku uyo wamalhiheke wulhumacha malhove alha, attu o Uisraeli onkhaye ahokhuwelhacha ni wunlha, 5 nkayeehana vavawo vakittu vawo Bokimu maana aya ikutto, Yamalheke nkayaakumihera Apwiiya Nlhuku isadaka.

6 Paahi Nayoshua amalhiheke waalheha attu, kila mmoka ahorwaa vakittu vaameelhiye awe wiira vakhalhe vawawe. 7 Yayo attu o Uisraeli ayo nkayaavara ntheko wa waatumikelha Apwiiya Nlhuku mahuku onkhaye a Nayoshua, ni baada yo urimeelha, aheera chiicho ikatema yonkhaye yaalhokenlhe aya manyaashulhupalhe aya aahanlhe, oonilhe mitheko chulhupalhe cha Apwiiya Nlhuku chaapangenlhe aya attu o Uisraeli. 8 Nayoshua anaaya Nanuni, namitheko a Apwiiya Nlhuku, aarimenlhe anari ni malhipa o iyaakha imia imoka ni khumi. 9 Nkayaavithiya vakittu vameelhiye aya ukhalha vawaya Utimnath Heresi uwo, ilhapo yo umiakoni yo Efraimu, mpata wo uchulhu wo Ugaashi. 10 Yamalheke vavawo attu onkhaye o iyari aya ahorimeelha, nkayaatwara iyari ikina yahaachuwenlhe Apwiiya Nlhuku, mena mitheko chaapangilhe aya wa attu o Uisraeli.

11 Paahi, attu o Uisraeli ahopangacha chittu cho uhilhoka umihoolho wa Apwiiya Nlhuku, ni uthimicha Mabaali. 12 Ahaahiya Apwiiya Nlhuku, Nlhuku a manyaapwiiya aya, aakuminhe ukhuma ilhapo yo Umisri, nkayaatwaracha milhuku chikina, milhuku chaathimichiya ni attu anokhalhacha nchereshere mwaya. Nkayaakhoromelha chechiyo milhuku chiyo, nkayaathunalhiha Apwiiya Nlhuku chinene. 13 Ahaahiya Apwiiya Nlhuku, nkayaathimicha Mabaali ni Maashithtarothi. 14 Paahi etu, urushiya wa Apwiiya Nlhuku ahothepa chinene vachulhu wa attu o Uisraeli, ni ayo nkayaahiya attu o uvara makhuche aathurulhache mihakhu chaya. Nkayaahiya wiira akottolhachiye ni amalhaponi aya aarukurerianche, ata ahoorie tho waavinga. 15 Ni kila nkwaha waarwelhe aya waatakana ikhoto, moono wa Apwiiya Nlhuku waari vachulhu waya ni waahelha mariro, thoko chaalhenlhe aya ni ulhupelha. Ni ayo nkayaakhalha ni ihuzuni yulhupalhe.

16 Paahi Apwiiya Nlhuku nkaavahacha attu o waamulha milhatu yookhonlhe ukhuma mmiononi mwa attu aathurunlhe nhakhu aya alhe. 17 Nansho ata inakhalhaka chiicho, attu o Uisraeli khayewelhenlhe attu o waamulha ayo, ukhalhawaya ahopanga thoko attu o ishembwere wo uttwara milhuku chikina ni uthimicha. Ahohiya chitema chittu chaapangilhe aya manyaapwiiya aya, aarumelhenlhe malhehero a Apwiiya Nlhuku, nansho ayo khaapangilhe chiicho. 18 Kila nkwaha Apwiiya Nlhuku vaarwehilhe aya attu o waamulha, yayo anene ayo ari vamoka ni ntu o waamulha uyo, nkayookholhiya mmiononi mwa amalhaponi aya wo ikatema yonkhaye yo ukumi wa ntu o waamulha uyo. Ukhalhawaya Apwiiya Nlhuku ahoonelha ikiriri veewilhe aya ikutto aya yo uhuvihiya waya ni waakhiya mihakhu waapangelhiye aya. 19 Nansho kila ikatema ntu o waamulha vaakhwilhe awe, ahohokholhelhacha chittu chaapanga aya mpacho chiyo, yaari attu o uphanga chittu cho uhilhoka chihipangiye ni manyaapwiya aya. Ahotwaracha milhuku ikina, nkayaanthimichera ni ukhoromelha, mena kaahilhe mitheko chaya chaapanganche aya mpacho mena uhiya itiyamaru aya. 20 Paahi urushiya wa Apwiiya Nlhuku ahothepa vachulhu wa attu o Uisraeli, nkayeerelha wiira, "Ukhalhawaya yalha attu alha ahohiya malhehano khalhehanne aka ni mwanyaapwiiya aya, nkayaakhota urumelhelha nlhove naka, 21 akinoomolha tho etu makosho arii aahalhihiye ni Nayoshua, ikatema yaarimenlhe aya. 22 Ni mii toka vano kinowaaruma yayo makosho ayo waalhikacha attu o Uisraeli koone yakhalhaka anokihokholhelha ni ukithimicha thoko manyaapwiiya aya ama kuhiwena." 23 Paahi Apwiiya Nlhuku ahohalhiha yayo makosho ayo, mena khoomonlhe wiira athamache wo waakuvia, mena kaavahilhe achishana a Nayoshua machiri o ukottolha yayo makosho ayo.