1 Nenno nihuku nno Nadebora ni Nabaraki, anaaya Nabinoamu, nkayeepa nna Ichipo nna:

2 Athimichiye Apwiiya Nlhuku!

Attu o Uisraeli, aheekumiha wiira aatakane ikhoto,

ni attu aheekumiha wo nrima aya wo uteelhiya.

3 Mwiiwelhelheke inyu mamwene!

Mwiiwelhelheke rata, mwaatti nri manyaashulhupalhe va!

Kinowiipa Ichipo, weepelha Apwiiya Nlhuku, Nlhuku o Uisraeli.

4 Inyuva Apwiiya Nlhuku, vaathamme inyu Useiri,

vaakhuruwilhe inyu mwaako wo Uedomu,

ilhapo yahotetemelha,

irimu ahomoriha maashi, eiyo,

mahute ahoruphiha iphulha.

5 Miako chahotikhinyia umihoolho winyu Apwiiya Nlhuku,

eiyo, mwaako wo Usinai umihoolho winyu Apwiiya Nlhuku, Nlhuku o Uisraeli.

6 Mahuku a Nashamgari, anaaya Naanathi,

ikatema i Nayaeli,

miphingo chahohiya uvira mwiilhaponi,

anamikwaha ahovira vachereshere.

7 Anamalhima ahohiyacha ulhima, ahohiya ulhima tho Uisraeli,

mpaka mii Debora veemenlhe aka,

mii kirii thoko anaangoro a attu o Uisraeli.

8 Aheethanlhelha milhuku cho naanano,

nkayaakhalha ikhoto velhaponi.

Nansho khaakhanlhe ntu aavanre nivaka ama ntu o aavanre ichikopa,

munlhokoni mwa attu maelufu makhumi ncheshe o attu o Uisraeli.

9 Nrima aka unowaatotopelha aholhelhi o miphingo cha attu o Uisraeli,

eekumihilhe wo nrima waya munlhokoni mwa attu.

Athimichiye Apwiiya Nlhuku!

10 Nhimiacheke mwaatti inyu nnowelha iphuta cho teelha,

inyu nnokhalhelha matandiko o nhakhu mwinchi anaathalhiya mmithanani mwa ashinama,

mwaatti inyu nneeta mmaphironi,

nkuwelhecheke nno nhimiaka ittu iyo.

11 Mwiiweke, attu enchi mmalhushi, anowiipacha ahimiachaka machiri ya Apwiiya Nlhuku, machiri wa anamalhima aya o Uisraeli.

Phi vavawo, attu a Apwiiya Nlhuku vaakhuruwachilhe aya mmilhakoni.

12 Munkweke, Nadebora munkweke!

Munkweke, munkweke mwiipeke Ichipo!

Munkweke Nabaraki anaaya Naabinoamu,

mwaakusheke attu mwaavanre inyu mateeka.

13 Attu o machiri aahanlhe ahokhuruwacha,

attu a Apwiiya Nlhuku yaarwelhe waatakanelha wa attu o machiri.

14 Ukhuma u Naefraimu ahokhuruwacha unikoteni, nkayaatwaracha achihima aya attu o nikosho ni Nabenyamini,

ukhuma Umakiri ahokhuruwa manyaaholhelhi o miphingo,

ukhuma nikosho ni Nazabuloni ahowa mamwene manyaaholhelhi olhupalhe chinene.

15 Manyaaholhelhi o nikosho ni Naisakari, nkayaattukana Nadebora,

eiyo, attu a Naisakari nkayaattukana Nabaraki,

nkayaattwaracha wo waakuvia mpaka unikoteni.

Nansho attu o nikosho ni Narobeni ahomwalhaana,

Khachuwenlhe chinohalha aya ukhumaana.

16 Wo nlhatu waani etu no ukhalha utulhi ikhondoro?

Wiira eewe nlhove no nshunga vaneehana awe?

Eiyo, mmilhokoni mwo attu o nikosho ni Narobeni,

wahokhalha nrima wo umwalhaanacha.

17 Nikosho ni Nagileadi nahohalha ukhopelhelhe mwoolhoko wo Uyorodani.

Nlhatuni mwaatti attu o nikosho ni Unadani,

mwahohalha wo uhikhuruwa nkalhavani?

Attu o nikosho ni Naasheri nahomaalha shiriri uchengweni uwo,

nahokhalha uchengweni uneemeshiya ikalhava uwo.

18 Nansho attu o makosho a Nazabuloni ni Nanaftali,

phi attu yaahenlhe ukumi aya ntatakoni,

wowo wi ipuwa yo waatakaniya ikhoto uwo.

19 Wowo Naanaki uwo, vachereshere marapo o Umegido uwo,

mamwene ahowaacha nkayeesha nipuro,

mamwene o ilhapo yo Ukanaani ahaatakana,

nansho khaapatilhe chittu cho malhuku o isiliva mena uvara mateeka.

20 Ittotwa cho wiirimu chahatakana ikhoto,

chahottwara iphiro chaya, nkachaatakana ni Sisera.

21 Mawambwe o mwoolhoko wo Kishoni ahaakhupa mpaka utayi,

eiyo, mawambwe molhupalhe o mwoolhoko wo Kishoni.

Kinoochusha umihoolho wo machiri aka!

22 A farasi ahoviracha eetaka wo ikhito,

ahothipacha ittaya wo ikhito cho inyaa chaya.

23 Nnepa wo wiirimu wa Apwiiya Nlhuku neera cho, "Mwaalhaveke attu o ilhapo yo Umerose,

mwaalhaveke attu o ilhapo aya, ukhalhawaya khaawachilhe uwaakavihani attu a Apwiiya Nlhuku, waatakana ni attu o machiri."

24 Avahiye ibarakha Nayaeli ahanu a Naheberi ntu o Ukeni,

waapwaha manyaathiyana onkhaye.

Eiyo, ahovahiya ibarakha waapwaha manyaathiyana onkhaye

anokhalhacha mmaheemani.

25 Nasisera aavekelhe maashi, nansho ayo nkayaavaha mapelhe,

nkayaawiihera mapelhe o lhemelha, aahelhiye nnyiponi mworera.

26 Wiimushi aavanre ikhomo yo nihema,

ni wiimonono waya aavanre inuto, nkayaanyata Nasisera vamuruni,

nkayampwesha ni umparulha vayuchi.

27 Nasisera ahooroma ni uwulhuwa,

nkaarupa wo uhitikhinyia,

vamietoni waya.

Vooromme aya vawo, phi vavawo vaawulhuwilhe aya anakhwilhe!

28 Anumwanaya Nasisera ahothurumelha vandirishani, nkayonlha.

Chani woonaka anoopicha uhokolhia?

Woonaka khanineewa nkukuta chaya cho upurulhiya ni ashinama chihokolhiaka?

29 Nkayaakhulhiya ni manyaathiyana o irusho,

Nkayeemalhiha tho ni tho,

wo wowo waakhulhiya waakhulhiye aya uwo.

30 Veekinaka kapatilhe mateeka ni ukawana,

mwalhi mmoka ama eelhi wo kila nsikari,

ikuwo yo sufu yo rangi wo nlhatu ni Nasisera.

Ikuwo yo isufu nittaviye rata,

ni mitandio miilhi cho uphwanelhiha ishiko aka!

31 Inyuva Apwiiya Nlhuku, arimeelhache amalhaponi inyu onkhaye! Nansho manyampwana inyu apharelheke thoko nchuwa! Ikatema vanokhuma aya wo nchakarimia mulhupalhe!

Ni ilhapo iyo nkayaakhalha ni mpuha wo iyaakha makhumi ncheshe.