1 Attu o nikosho ni Naefraimu ahothukumanacha, nkayaalhapuwa mwoolhoko wo Uyorodani nkayaaphiyacha Uzafoni, ni weerelha Nayeftha wiira, "Chani woonaka khamwanihanne wiira nuuttukaneni naatakane ni attu o Uamoni? Vano etu, ninoopaha inupa inyu mwaanene nnari mwommo mpaani mmo."

2 Nansho Nayeftha nkaakhulha wo wiira, "Mii vamoka ni attu aka naari nihaathanaka chinene ni attu o Uamoni. Kahoulhepelhani wiira nkikavihe nansho khamwaawilhe ukookholha. 3 Voonilhe aka wiira khammwilhe ukikaviha, kahorwaa uno koovaka waatakana ni attu o Uamoni, ni Apwiiya Nlhuku ahokivahera wiira kaakottolhe. Chani etu vano nnowaacha waatakana ni mii?"

4 Paahi Nayeftha nkayaathukumaniha attu onkhaye o Ugileadi, nkayaatakana ikhoto ni attu o Efraimu. Attu o Ugileadi nkayaakottolhacha attu o Efraimu. Ni yayo attu o Efraimu ayo phi aahimmmie wiira, "Inyuva mwaatti attu o Ugileadi, inyuva phi attu mwaattawilhe ukhuma nikosho ni Naefraimu, nkamwaattawelha wa attu o nikosho ni Namanase." 5 Yamalheke, wo uthanana wiira attu ahikulhuphuwache, ahovara chittu cho ulhapuwelha mwoolhoko wo Uyorodani ni utiyelhelha iphiro ya attu o ilhapo yo Efraimu. Kila nkwaha ntu aattawa vaaphiilhe awe vavawo, ni ulhepelha wiira avire, attu o Ugileadi yahonkoha, "Chani inyuva ntu o ilhapo yo Efraimu?" Aakhulhaka "Akihii," 6 aamwiirelha wiireke, "Haya uromolheke Shibolethi", nansho uyo eera "Sibolethi," ukhalhawaya khoorilhe uromolha rata. Vavawo ahommara ni umwiiva wowo waalhapuwiya mwoolhoko wo Uyorodani uwo. Paahi attu maelufu makhumi ncheshe ni maelufu meelhi o nikosho ni Naefraimu aheevakachiya yeyo ikatema iyo.

7 Nayeftha ahokhalha o waamulha attu o Uisraeli wo iyaakha sita. Yamalheke ahorimeelha, nkayaavithiya Ugileadi, wiilhaponi waya.

8 Arimeelheke Nayeftha, Naibuzani o ukhuma Ubethlehemu ahokhalha o waamulha attu o Uisraeli. 9 Yayo yaari ni achishana ashilhopwana makhumi mararu ni ashithiyana makhumi mararu chiicho. Ni yayo achishana ashithiyana ayo aavekihilhe wa attu o ukhuma makosho makina, ahiri o nikosho naya. Naibuzani nkayaakhalha o waamulha attu o Uisraeli iyaakha saba. 10 Nkaarimeelha nkaavithiya Ubethlehemu.

11 Amalheke Naibuzani, Naeloni o nikosho ni Nazabuloni, ahokhalha o wamulha attu o Uisraeli wo iyaakha khumi. 12 Ni ayo ahorimeelha, nkaavithiya Uyiloni ilhapo yo nikosho ni Nazabuloni.

13 Umalha wa Naeloni, Naabdoni anaaya Nahileli o ukhuma Upirathoni ahokhalha phi o wamulha attu o Uisraeli. 14 Yayo ari ni achishana ashilhopwana khumi ni ncheshe ni uchuulhu ashaana khumi ni araru eeta wo uwelha iphuta khumi ni saba. Yayo ahokhalha o waamulha attu o Uisraeli iyaakha ncheshe. 15 Yamalheke, Naabdoni ahorimeelha, nkaavithiya Upirathoni ilhapo yo nikosho ni Naefraimu, ilhapo yo umiakoni Uamaleki.