1 Paahi etu, Apwiiya Nlhuku ahohalhiha alha makosho alha wiira aalhikache attu o Uisraeli arii ahinaatakana ikhoto mwiilhaponi Ukanaani. 2 Aapangilhe chiicho wiira aachuwelhihe attu o iyari chiyo, ikhoto chineera aya wo waatakaniya, ukhalhawaya ari ahinaya woona ikhoto. 3 Attu aahanlhe mwiilhaponi mmo ari aholheli o ilhapo nthanu cha Afilisti, Ukanaani, Usidini, ni attu o Hivi aakhalha umiakoni Lebanoni ukhuma mwaako wo Baali hermoni mpaka uphiya Uhamathi. 4 Apwiiya Nlhuku aapangilhe yayo wiira aalhikache attu o Uisraeli, koone yakhalhaka anoorumelhelhacha malhehero aya aalhehenre aya manyaashulhupalhe aya wo iphiro ya ashinna Musa. 5 Paahi attu o Uisraeli ahokhalhacha vamoka ni attu o Ukanaani, attu o Uhiti, Aamori, attu o Uperizi, attu o Hivi, ni Ayebusi. 6 Nkayaaveka imialhi chaya ni waavekiha ni ayo imialhi chaya wa ashimirawo o chechiyo ilhapo chiyo ni uthimichera milhuku aya.

7 Attu o Uisraeli ahaalhiyalha Apwiiya Nlhuku, Nlhuku aya ni uwonya umihoolho waya, nkayaathimicha Maabaali ni Maashera. 8 Paahi Apwiiya Nlhuku ahorushiya wo chittu chaapanga aya attu o Uisraeli, ni ayo nkayaahiya wiira akottolhiye ni amwene Kushan rishath Aimu o Mesopotamiya, ni ayo nkayaatawaracha iyaakha nane. 9 Paahi attu o Uisraeli nkayonlhelha Apwiiya Nlhuku, ni ayo nkayaarwehelha ntu anohalha woopolha yaani, Othnieli mwaana a Nakenazi, mwanhima aya mwankani Nakalebu. 10 Paahi Iphumu ya Apwiiya Nlhuku yahaakhuruwelha Naothnieli, ni ayo nkayaakhalha ntu o waamulha milhatu a attu o Uisraeli. Naothnieli ahorwaa ukhotoni, ni Apwiiya Nlhuku nkayooriha wakottolha amwene Nakushan Rishathaimu o Umesopotamiya. 11 Paahi mpuha nkayaakhalha mwiilhaponi iyaakha makhumi ncheshe. Yamalheke Naothnieli anaaya Nakenazi ahorimeelha.

12 Paahi attu o Uisraeli ahowonya tho umihoolho wa Apwiiya Nlhuku. Apwiiya Nlhuku nkayaavaha machiri amwene Naegloni o Umoabu wiira aate attu o Uisraeli, wo nlhatu no uwonya umihoolho wa Apwiiya Nlhuku. 13 Ni ayo Nagloni nkayaakumaniha attu o Uamoni ni attu o Uamaleki, nkayaarwaa waatakana ni attu o Uisraeli, nkayaakottolha. Nkayaavara mateeka iwani yo miri cho Mitende yaani iwani yo Uyeriko. 14 Attu o Uisraeli nkayaatawariya ni amwene Naegloni o ilhapo Umoabu, iyaakha khumi ni nane.

15 Nansho attu o Uisraeli volhenlhe aya Apwiiya Nlhuku, aarweehelhiya ntu o wookholha. Yayo ari Naehudi anaaya Nagera, ntu o moono wo wiimushi wo machiri, aakhuma nikosho ni Nabenyamini. Attu o Uisraeli nkayaaruma yayo arweehe izawadi chaya wa amwene Naegloni o Umoabu. 16 Paahi Naehudi nkayeekoroshelha uphanga wo wiithia uno ni uno, wo urekama isitimita makhumi nthanu. Nkayaattuka nnyuununi mwaya wiimonono nhina ikuwo chaya. 17 Yamalheke nkayaarwehelha Naegiloni izawadi chilhe. Naegloni ayo ari ntu o uritimalha chinene. 18 Amalhiheke ukumiha izawadi chilhe, nkayeerelha attu akunshe izawadi alhe wiira ahokolhiacheke uwannyaya. 19 Nansho Naehudi vaaphilhe aya varii isinyago cho malhuku chaahimiye vakhiviru ni iwani yo Ugilgali, ahohokolhia wa amwene Naegloni ni weerelha wiira, "Pwiiya, kihanaa nttenga kinothanana aka uhimeriani wo nivitho."

Amwene nkayeerelha anamitheko aya wiira athamache, ni ayo nkayaakhumacha vathe.

20 Paahi Naehudi nkayaatameria vakittu aakhanlhe aya amwene uchumbani waya wo uririiya, upirothi, nkayeerelha wiira, "Kihanaa nttenga inyu ukhuma wa Nlhuku." Amwene nkonkwa uhicheni aakhanlhe aya ni weemelha. 21 Naehudi nkayaatholholha uphanga aya waari nnyuununi wiimonono waya, ni wo moono aya wo wiimushi nkayaahoma vanthunkwani wa amwene Naegloni. 22 Uphanga uyo nkawaakelha nhina vamoka ni mmini aya, makhura nkaakhunelha uphanga uyo, kwaani Naehudi kaakumihilhe tho, nkawaakhumelhelha utulhi. 23 Yamalheke, Naehudi ahokhuma vathe vapirothi vawo, baada yo uttia mikhora cho uchumbani mmo ni mihulhelho.

24 Paahi Naehudi vaathamme aya, akarumiya a amwene ahohokolhiacha. Vonne aya mikhora chonkhaye cho uchumbani chihotteiya, nkaanyiheracha wiira akenlhe urindini, mwommo mpani mmo. 25 Nkayaaweherera mpaka nkayaachokholha ukelhiya ni nipampa. Voonne aya wiira kanhulha, yahokushacha mihulhelho ni uhulha nlhako. Nkayaaphwanya amwene aya anarumpe vathi, anakhwilhe.

26 Naehudi nkayaatoroka attu ayo vaari aya athepaka uweherera. Nkaavira vaari isinyago cho malhuku, nkayaattawelha Useiri. 27 Vaaphilhe aya wowo wi ilhapo yo miako yo Efraimu, ahoopa nipalhapata no weesha attu tayari wo waatakana ikhoto, ni attu o Uisraeli ahokhuruwacha vamoka ukhuma wowo umiakoni uwo, ni ayo ahaaholhelha. 28 Nkayeerelhacha wiira, "Nkittwareke, ukhalhawaya Apwiiya Nlhuku ahaakottolha amalhaponi inyu attu o Umoabu." Attu nkayaatwaracha mpaka vaalhapuwiya mwoolhoko wo Uyorodani, ni uvara ukhuma wa attu o Umoabu, ni waatiyelhelha attu wiira ahivire ntu riyoothe wowo.

29 Nenno nihuku nno nkayeeva Amoabu elufu khumi, attu onkhaye arii o machiri ni iruttu cho ukhomaalha, mena khaawo ata mmoka aahanlhe. 30 Nenno nihuku nenno attu o Uisraeli nkayaakottolha Amoabu, ilhapo nkayaakhalha ni mpuha wo iyaakha makhumi nane.

31 Tho, baada ya Naehudi, Nashamgari anaaya Naanati, ahokusha nipuro naya. Yayo aheeva Afilisti imia sita wo ikopo yo uchungelha ing'ope. Tho etu, ahookholha attu o Uisraeli.