1 Attu o Uisraeli ahowonyacha tho umihoolho wa Apwiiya Nlhuku, paahi ni ayo nkaahiya atawariye ni Afilisti iyaakha khumi ni ncheshe.

2 Ni vavawo, ahokhalha ntu mmoka Usora uwo, o nikosho ni Unadani, nchina nawe eehaniye Manoa. Ahanu awe yoyo ari o uhiyara. 3 Nihuku nimoka nnepa a Apwiiya Nlhuku ahaakhumelhelha aathiyana ayo, nkeerelha wiira, "Inyu khannoyara khanrina mwaana. Nansho nnoorupalha irukulhu ni unnyara mwaana mwanlhopwana. 4 Paahi etu mwiishungeke rata, nhiwuriye idivai ama ittu iriyoothe yo uhapalhiha ama nhilhie ittu iriyoothe ihinorumelhelhiya umihoolho wa Apwiiya Nlhuku. 5 Ukhalhawaya nnoorupalha irukulhu ni unnyara mwaana mwanlhopwana. Vanohalha awe uyaria, ikharari chawe yoyo mwaana uyo mena chihihamiye, ukhalhawaya nookhalha ntakatifu a Apwiiya Nlhuku toka uyaria wawe. Ni uyo noochokholha wookholha attu o Uisraeli ukhuma utawara wa Afilisti."

6 Paahi aathiyana ayo nkaarwaa uwaahimeriani owannyaya wiira, "Ntu a Nlhuku ikhove awe thoko nnepa a Nlhuku ahokikhuruwelha. Akankohilhe khumme vayi mena ukoha nchina nawe. 7 Nansho aakirenlhe wiira kinoorupalha irukulhu ni unnyara mwaana mwanlhopwana, nkaakilhehera wiira, kihiwuriye idivai ama utheka wala ulhia ittu iriyoothe ihinorumelhelhiya umihoolho wa Apwiiya Nlhuku, ukhalhawaya yoyo mwaana uyo nookhalha ntakatifu a Apwiiya Nlhuku toka uyaria wawe mpaka vanohalha awe urimeelha."

8 Amalhiheke wulhumacha, Namanoa aholhepelha wa Apwiiya Nlhuku yeeraka wiira, "kinoulhepelhani inyu Apwiiya Nlhuku, wiira munrumeke tho ntu inyu uyo, wiira aniittuchihe chittu chinothananiya ihu uphanga mwaana uyo vanohalha awe uyaria vawo."

9 Apwiiya Nlhuku nkayewelhelha nlhove ni Namanoa, ni nnepa a Nlhuku ulhe nkaankhuruwelha ahanu a Namanoa tho, vaari aya anakhanlhe umatani. Nansho owannyaya, yaani Namanoa khayaatamme vavawo yeyo ikatema iyo. 10 Paahi aathiyana ayo ahottimakacha, nkaarwaa uwaahimeriani owannyaya wiira, "Nkoonani! Ntu aakikhumelhenlhe nne nihuku nne, ahokikhumelhelha tho."

11 Namanoa ahonkwa ni urwaa waattukana ahanu aya mpaka wa ntu uyo, nkayankoha "Chani inyuva phi ulhe ntu ulhe aamulhumanne ulha nthiyana ulha?"

Ntu ulhe nkaakhulha eeraka, "Eiyo, phi mii."

12 Yamalheke, Namanoa nkeera, "Vano malhove inyu ayo vanohalha aya utimira vawo, niweeke naapanga ittu yaani inotwara wo nlhatu no mwaana uyo? Nipangekeni wo nlhatu wawe?"

13 Nnepa a Apwiiya Nlhuku nkeerelha Namanoa wiira, "Ahanu inyu nvarechesheke chilheheriye aya chonkhaye chaahimenrie aka chiyo. 14 Ahilhawihe ittu iriyoothe inokhuma munzabibuni, ama ahiwuriye idivai ama utheka, wala ulhia ittu iriyoothe ihinorumelhelhiya umihoolho wa Apwiiya Nlhuku. Apangeke kila ittu ilhehenre aka."

15 Namanoa nkaakhulha nnepa a Apwiiya Nlhuku eeraka, "Chonte nkhalheke vakani nuhithelheni mwaapuri." 16 Nnepa a Apwiiya Nlhuku uyo nkaakhulha Namanoa wo wiira, "Ata mwakikhanyererihaka wiira kikhalhe, akinolhia yolhia inyu. Nansho mwattunaka, mweesheke isadaka yo upahiya vamooroni, mwaakumihereke Apwiiya Nlhuku." Namanoa ari ahichuwelhaka wiira yoyo arii nnepa a Apwiiya Nlhuku.

17 Paahi Namanoa nkaakhulha nnepa a Apwiiya Nlhuku uyo eeraka, "Nnihimerieke etu nchina ninyu wiira nithimiche ikatema malhove inyu vanohalha aya utimira."

18 Nnepa a Apwiiya Nlhuku nkaakhulha, "Nnokoherera chani nchina naka, nchina naka nno nooshangiha?"

19 Vavawo Namanoa ahonkusha mwaapuri ni ipepa, nkeesha vachulhu mwalha, wiira aakumihere Apwiiya Nlhuku anopanga chittu cho ushangiha. 20 Paahi ikatema Namanoa ni ahanu aya vaari aya awehaka malhimi o mooro vaawelha aya nchulhu wiirimu ukhuma vamadhubahuni vawo, ahomwoona nnepa mmalhimini mwo mooro ni uyo awelhaka urwaa wiirimu. Paahi Namanoa ni ahanu aya nkooroma. Namanoa nkayaachuwelha wiira ntu ulhe ari nnepa a Apwiiya Nlhuku. 21 Nnepa khaakumenlhe tho Namanoa ni ahanu aya.

22 Paahi Namanoa nkayeerelha ahanu aya wiira, "Wo ikekhiaye ninookhwa, ukhalhawaya nihomwoona Nlhuku."

23 Nansho ahanu aya nkayaakhulha wo wiira, "Yakaari Apwiiya Nlhuku aathanana uniiva khayaapochera isadaka ihu yo upahiya vamooroni ni yo ipepa iyo, wala khayaanooniha chechiyo chittu chiyi, wala yayo unilhehera ittu iriyoothe."

24 Yamalheke ahanu a Namanoa aheethapulha mwaana mwanlhopwana, ni Namanoa ahommaha nchina nawe Sansoni. Yoyo mwaana uyo ahonnuwa ni Apwiiya Nlhuku nkayamma ibarakha. 25 Iphumu ya Apwiiya Nlhuku nkayoochokholha unkhomaalhiha vaari awe Umahanedani, iriyari wo Unasora ni Ueshtaoli.