1 Paahi attu o Efraimu nkayeerelha Nagidioni wiira, "Nnipangenlhe chiicho wo nlhatu waani? Chani woonaka khannihanne vaarwelhe inyu waatakana ikhoto ni attu o Umidiani?" Nkayaachukulhacha chinene.

2 Nansho Nagidioni nkayaakhulha yiiraka wiira, "Ittu kipangilhe aka mii kihii ittu mena, thoko chinolhikanihiya aya ni alhe mpannge inyu mwaatti. Ilhokotilhe aya attu a Naefraimu vanlhalhani, phi ittu yoombone upwaha ipattilhe aya ashilhoko aka attu o nlhoko u Naabiezeri. 3 Nlhuku hookottolhelhani aholhelhi o Umidiani, Orebu ni Zeebu. Chani ittu yaani kipannge aka mii, nkakaalhikanihiya ni inyu mwaatti?" Nagidioni vaamalhinhe aya uhimia chiicho, urushiya wa attu u Nagidioni, wahotondova.

4 Paahi Nagidioni ni ashikhunanaya imia ttaru nkayaaphiyacha umwoolhokoni Uyorodani, nkayalhapuwacha. Inakhalhaka ari anoochelhe chinene, ahorwaacha ni waattwara amalhaponi aya. 5 Paahi nkayeerelha attu o Usukothi wiira, "Chonte mwaavaheke ashikhunanaka alha mikatte, ukhalhawaya ahoochacha chinene, ni mii kinoothepa waattwara mamwene Zeba ni Salmuna o Umidiani."

6 Nansho aholhelhi o Usukothi ahokoha, "Nuuvahekeni mikatte cho ishiyani, ni inyu khannaakottolha Zeba ni Salmuna?"

7 Paahi Nagidioni nkeera, "Eiyo, nansho Apwiiya Nlhuku vanohalha aya waakottolha Zeba ni Salmuna, kinoowa kaakhavakacha iruttu chinyu wo mwiiwa ni mirooka cho uthakhwani."

8 Ukhuma wowo nkayaarwelha attu o Upenueli, nkayaavekelha chiichammo. Ni ayo attu o Upenueli nkayaakulha thoko yaakhunlhe aya attu o Usukothi. 9 Nagidioni nkeera, "Vanohalha aka uhokolhia wo mpuha kinoophomolhacha ilha ishanja ilha."

10 Paahi yayo ashi Zeba ni Salmuna ayo ari wowo Ukarkori uwo, vamoka ni mphingo aya wa attu maelufu khumi ni nthanu yaahanlhe ukhuma mphingo waakhumme unosha nchuwa, maana ashikhunanaya ilaki imoka ni makhumi meelhi ahevakachiya. 11 Paahi Nagidioni nkayaatwara iphiro yo mpata uneelha nchuwa, irii unoshelha nchuwa Unoba ni Uyogbeha iphiro ya attu o maronda, nkayaakelhelha mphingo waari uneeshiukilhe uyo. 12 Mamwene o Umidiani, Zeba ni Salmuna nkayaattawacha, nansho Nagidioni nkayaattwara, nkayaavaracha ni woopopiha chinene mphingo wonkhaye.

13 Yamalheke, Nagidioni, anaaya Nayoashi, ahohokolhia ukhuma ukhotoni aviraka iphiro inokhuruwelha mphitho wo Uheresi, 14 nkayammara mmirawo mmoka o Usukothi uwo ni unkohakoha. Yoyo mmirawo uyo, nkaaromolhacha machina a manyaashulhupalhe o uchuwania o Usukothi, ni ijumla aya yaari attu makhumi saba ni saba. 15 Ni yamalhekeru, Nagidioni ahohokolhia wa attu o Usukothi alhe, nkayeerelhacha wiira, "Chani, nnowuupuwelha ngati chenre inyu wo ukiruwana venre inyu, ‘Nlhatu waani naavahe mikatte attu inyu oochanche chinene, ni inyuva khannoria waakottolha Zeba ni Salmuna?’ Haya etu, Zeba ni Salmuna phi alha va."

16 Paahi nkayaakusha ashulhupalhe o Usukothi ni weettuchiha manyaalhopwana onkhaye o usukothi waakhavakacha iruttu chaya wo mwiiwa ni mirooka. 17 Nkayaaphomolhacha ishanja yo Upenueli ni weevakacha attu o yeyo ilhapo iyo.

18 Yamalheke, nkayaakohacha Zeba ni Salmuna wiira, "Attu mweevilhe inyu wowo Utabori alhe, ari chani?" Nkayaakulhacha yiiraka, "Aalhikanne ni inyuva, ukhalhawaya kila mmoka oonia thoko achishana a amwene."

19 Ni ayo nkeerelha wiira, "Yayo yaari ashilhoko aka, achishana a anumwanaka o ukiyara. Kinolhupelha wa Apwiiya Nlhuku arii akumi, nhikeevilhe, ata mii akoowiivani." 20 Yamalheke nkaamwiirelha Yetheri, mwaamwanaya o nttara, "Weemelheke weeveke alha." Nansho Yetheri ahoova ukusha uphanga awe uyo, ukalhawaya ari baado mwammirawo.

21 Vavawo Zebu ni Salmuna nkayeerelha Nagidioni wiira, "Nniiveke inyuva mwanene, ukhalhawaya ulha phi ntheko wa ntu muulhupalhe." Nagidioni nkayeevekacha anene ni ukusha mapambo ari nshikoni mwo ingamiya chaya.

22 Yamalheke yayo, attu o Uisraeli nkayeerelha Nagidioni wiira, "Inyuva etu nkhalheke phi nholhelhi ihu, ni baada yo inyu aniholhelheke achishana inyu, ukhalhawaya inyuva nhonoopolha ukhuma wa attu o Umidiani."

23 Nagidioni nkaakhulhacha wo wiira, "Mii kinokhalha nholhelhi inyu, mena mwaamwanaka khanokhalha nholhelhi inyu. Apwiiya Nlhuku phi nohalha ukhalha nholhelhi inyu." 24 Yamalheke nkeerelha wiira, "Kinothanana uvekelhani ittu imoka, kinothanana kila mmoka inyu akivaheke ivipuli chivanre inyu mateeka." Ukhalhawaya attu o Umidiani alhe thoko chiri aya attu akina o uthakoni, ari anawaranche ivipuli cho idhahabu.

25 Attu nkayaakhulha, "Ninouvahani wo nrima ihu." Nkayaathalhacha ikuwo ni kila mmoka nkeesha mwommo ivipuli cho idhahabu chaavanre awe mateeka. 26 Ivipuli chaapochenre aya Nagidioni, ulhemelha waya chonkhaye waari ikilo makhumi meelhi. Uthepa cho chechiyo, ahopochera tho ni ivipuli, ikuwo cho zambarau chaawariye ni amwene a attu o Umidiani ni mikufu chaari nshikoni mwo ingamiya chaya. 27 Paahi Gidioni nkayaakoroshelha isinyago yeeshilhe aya iwani yo Uofra. Attu o Uisraeli onkhaye nkayaarwacha wowo uthimichani. Isinyago iyo nkayaakhalha nriankho wa Nagidioni ni ashilhoko aya.

28 Paahi attu o Umidiani ahokottolhiya ni attu o Uisraeli, mpuha nkayaakhalha wo ikatema yo iyaakha makhumi ncheshe, wo uhoopopihiya ni attu o Umidiani.

29 Yamalheke Nagidioni yaani Nayeru Baali, anaaya Nayoashi ahohokolhia uwannyaya ni ukhalha wowo. 30 Nagidioni yaari ni achishana ashilhopwana khumi ni saba, ukhalhawaya ari ni mavasha a manyaathiyana enchi. 31 Ahokhalha ni namitheko nthiyana wowo Ushekemu uwo annyarinhe aya mwaana mwanlhopwana, nchina nawe eehaniye Abimeleki. 32 Paahi Nagidioni anaaya Nayoashi, ahorimeelha anari ni malhipa o iyaakha chinchi, nkaavithiya mahiye a Uyoashi athumwanaya, wi ilhapo yo Uofra, Ubiezeri.

33 Yamalheke, baada yo urimeelha u Nagidioni, attu o Uisraeli ahohokolhelha ni uthimicha milhuku chaya cho Baali. Nkayampanga Baali Berithi ukhalha phi nlhuku aya. 34 Aisraeli nkayaalhiyalha Apwiiya Nlhuku, Nlhuku aya, athaminhe ukhuma wa amalhaponi aya enchi anrukurenrie aya kila mpata. 35 Tho, khaapangenlhe ittu yo ulhoka ashilhoko a Nayeru Baali yaani Nagidioni, wo chittu choombone chonkhaye chaapangilhe aya Uisraeli.