1 Naabimeleki anaaya Nagidioni, ahorwaa iwani yo Ushekemu, waakhalhacha aya ashilhoko ni achishana onkhaye o nikosho na anumwanaya. Nkayeerelha wiira, 2 "Nkihimerieke vava, umihoolho wa attu o Ushekemu. Ittu yaani irii yoombone uwaninyu, wiira achishana onkhaye khumi ni saba ashilhopwanaru a Nayeru Baali otawareni ama mwaana mmoka? Muupuwelheke wiira mii phi iphome inyu." 3 Ashilhoko a anumwanaya alhe nkayaavira ahimiachaka malhove onkhaye alha wo nlhatu waya, ni attu onkhaye o Ushekemu nkayaattwara ukhalhawaya ari nlhoko aya. 4 Nkayaavaha ikipande makhumi saba cho isiliva chaari unupani wa nlhuku Baali Berithi, wiira aavahe aya attu o uhikhalhe ni irusho ni attu o unanrokotolhe wiira aatware. 5 Nkayaattukanacha urwaa wa athumwanaya, Uofra, ni wowo nkayeevakacha ashilhoko aya onkhaye makhumi saba, vachulhu nlhuku nimoka. Nansho Yothamu, mwaamwana mwankani a Nayerubabeli ahokulhuphuwa, kheeviye, ari neevinthe. 6 Yamalheke, anenchi o ilhapo yonkhaye yo Ushekemu ni o Ubeth Umilo ahokumaana vaari mwiri muulhupalhe vakhiviru ni ishanja wowo Ushekemu uwo, nkayaavara nchina Naabimeleki ukhalha amwene aya.

7 Nayothamu veewilhe awe yoyo mwaha uyo, ahorwaa ni weemelha vamwaakoni Ugerizimu, nkaakhuwelha wo wiira, nkakiiweni, inyu mwaatti attu o Ushekemu, mwathananaka Nlhuku owiiwelhelheni ni inyuva. 8 Nihuku nimoka khalhai, miri chahothukumana vamoka wiira chinthanlhe mwene aya. Paahi miri nkacheerelha mwiri wo nzeituni wiira, nnitawareke. 9 Nansho mwiri wo nzeituni nkawaakhulha, nnaanyihera wiira, kinowooria uhiya ntheko aka wo uyariha makhura anothimichiya chinene ni milhuku ni attu, wiira kirwe keehuvihe utawara miri. 10 Yamalheke miri nkacheerelha mwiri wo ntini, nkawaani inyuva nnitawareke.

11 Nansho mwiri wo ntini nkawaakhulha, chani nnaanyihera wiira kinoohiya ntheko wo uyara maphepu orera ni oochiva, kirwe keehuvihe utawara miri. 12 Yamalheke miri nkacheerelha mwiri wo nzabibu, nkawaani inyuva nkhalheke nholhelhi ihu? 13 Nansho nzabibu nkawaakulha wiiraka, Chani nnaanyihera wiira kinoohiya ntheko aka yo uyariha idivai inaachivelha milhuku ni attu, kirwe keehuvihe uholhelha miri? 14 Wo umalhelha, miri chonkhaye nkachaarwaa ni wiirelha mwiri wo mwiiwa wiira, paahi mmweeke inyuva nnihoolhelhe. 15 Mwiri wo mwiiwa nkawaakulha wiiraka, wo ikekhiaye mwathananaka ukithanlha ukhalha amwene, mmweeke etu nkhalheke vanttuchini waka. Nansho mwaahittuneke uphanga chiicho, paahi mooro uthameke mmiiwani waka ni upaha ata mierezi cho Lebanoni.

16 Nayothamu nkayaathepa uhimiacha wiira, "Vano paahi, chani nnoona wiira nhaavara nchina Naabimeleki wo nrima woombone ni wo ukhulhuvelhiya? Chani nnaanyihera wiira nhaapangelha ittu yoombone Nayeru Baali ni ashilhoko aya thoko chaathananiya wo ntheko aya? 17 Muupuwelheke wiira athumwanaka aheehelha ntatakoni ukumi aya, wo waatakanelha ni wookholha ukhuma wa attu o Umidiani! 18 Nansho lhelho va nhaarukunuwa ashilhoko a athumwanaka, nkamweevakacha achishana aya makhumi saba vachulhu nlhuku nimoka. Yamalheke mwahaapanga Naabimeleki, mwaana a namitheko a athumwana aka, akhalhe mwene a attu o ilhapo yo Ushekemu, ukhalhawaya yoyo ntu uyo o nikosho ninyu. 19 Paahi vano, yakhalhaka mpannge yayo wo nrima woombone ni wo waathimicha Nayeru Baali ni achishana aya paahi, nttapelhelheke vamoka ni Naabimeleki, ni ayo attapelhelheke vamoka ni inyu. 20 Nansho yaahikhalheke chiichammo, mooro ukhumeke wa Naabimeleki ni waarimelhiha attu o ilhapo yo Ushekemu ni o Ubeth Umilo, tho mooro ukhumeke wa attu o ilhapo yo Ushekemu ni Ubethmilo ni waarimeelhiha Naabimeleki." 21 Yamalheke Nayothamu ahotoroka, nkayaattawelha Ubeeri, nkayaakhalha wowo, ukhalhawaya ahoova Naabimeleki ahima aya. Nkayaakalha wowo.

22 Naabimeleki ahaatawara attu o Uisraeli iyaakha taaru. 23 Yamalheke Nlhuku nkaawiha nrima wo uhilhoka variyari wa Naabimeleki ni attu o Ushekemu, ni ayo nkayaakhotiya. 24 Phi chiichammo chaatwarushiye aya attu o Ushekemu vamoka ni nlhoko aya Naabimeleki, wo ushilhilhi waapangenlhe aya achishana makhumi saba a Nayeru Baali. Ntwarusho no yoyo nookhwa uyo waapantte ukhalhawaya Naabimeleki yeevilhe yayo wo ukavihiya ni attu o Ushekemu ayo. 25 Paahi attu o ilhapo yo Ushekemu yaheesha attu vachulhu mwaako wiira aathurulhe mihakhu attu onkhaye aavira wowo. Naabimaleki nkayaahimeriya yoyo mwaha uyo.

26 Nihuku nimoka Nagaali, anaaya Naebedi, vamoka ni ashilhoko aya ahorwaa ukhalhani Ushekemu. Attu o ilhapo ya Ushekemu nkayaakhalha ni nrima wo waarumelhelha. 27 Nkayaakhumacha ni urwaa waari imata chaya cho mizabibu, ni urukulhacha izabibu, nkayaamakacha ni ukoorosha idivai ni uphanga isikukuu. Nkayaakelha unupani wa nlhuku aya nkayaalhia ni uwuria, Yamalheke nkayaaruwana Naabimaleki. 28 Nagaali anaaya Naebedi, nkeera wiira, "Naabimaleki phi mapani? Hiyaano attu o Ushekemu va, phi attu ni ata naathimiche Naabimaleki? Nagidioni ni Nazebuli, namitheko aya nholhelhi, haathimicha Nahamori athumwanaya Nashekemu, nansho nlhatu waani naathimiche Naabimaleki? Nansho vano mwaakavihereke ashulhupalhe inyu o Uhamori. 29 Nansho yakaari alha attu alha aarii phi attu kinaatawara aka, kaanathamiha Naabimaleki. Kaaneerelha Naabimaleki wiira, ‘Muncherereke mphingo inyu wa manyaasikaari, mwamalhaka mmweeke naatakana voonene.’ "

30 Paahi Nazebuli nholhelhi o iwani, yeeweke malhove anoolhumacha aya Nagaali anaaya Naebedi, ahorushiya chinene. 31 Paahi nkayaarwehelha nttenga Naabimaleki Utorma uwo, nkayeerelha wiira, "Nagaali, mwaana a Naebedi, vamoka ni ashilhoko aya, ahokelhacha vawani Ushekemu ni uthotheria wiira attu o ukhoteni inyuva. 32 Paahi nhokolhieke inyuva ni attu nrina inyu ayo, ikatema yo uhiyu, mweethelheke umatani vakhiviru ni vawani. 33 Nchuwa vanokhuma aya wichishu, nkelhelheke iwani iyo. Nagaali akhumaka vamoka ni attu aya uwa waatakana ni inyu, mwaapangelheke chinothananiya aya."

34 Paahi Naabimaleki ahothama nkayaarwaa ni attu aarina aya vamoka ni umaka Ushekemu ikatema yo uhiyu. Nkaamianiha attu aya mikutiro micheshe wiithelha wowo vakhiviru ni vawani. 35 Nagaali, mwaana a Naebedi, nkaakhuma vathe ni weemelha urii nlhako wo ukelhea vawani, yoyo ikatema iyo Naabimeleki ni attu aya ahokhuma vakittu veevinthe aya. 36 Paahi Nagaali voonilhe aya nkayeerelha Nazebuli wiira, "Mmweheke, attu anookhuruwacha ukhuma uchulhu mwaako."

Nazebuli nkayaakhulha, "Inyuva nnoona irungwi cho miako, thoko attu."

37 Yamalheke Nagaali nkeera, "Mmweheke! Attu anookhuruwa variyari ilhapo ni nkutiro nkina unokumelhelha mpata o mwiri mulhupalhe wa attu o moopa nttiti."

38 Yamalheke Nazebuli nkayaakhulha, "Wiifuna winyu urii vayi vano? Phi inyuva ngati mwenre wiira, ‘Naabimaleki phi mapani? Naathimicheke wo nlhatu waani?’ Vano yayo phi attu mwaaheulhanche inyu, nrweeke etu Mwaatakaneke." 39 Paahi Nagaali ahokhuma aholhelhihaka attu o Ushekemu ni waatakana ni Naabimaleki. 40 Nansho Nagaali ahoochelha ni uttawa, uno atoporanihiyaka ni Naabimaleki. Attu enchi ahorakhalhihiya ni ukhwaacha mphironi mpaka vanlhako muulhupalhe wo ukelha vawani. 41 Naabimaleki nkayaakhalha Uaruma ni Nazebuli nkayoomolha Nagaali ni ashilhoko aya wiira akhume ilhapo yo Ushekemu.

42 Waashelhe waya, Naabimaleki aheewa wiira attu o ilhapo o Ushekemu ahookhumacha vawani ni urwaa mmamatani. 43 Nkayaakusha attu aya nkayamianiha mikutiro micheshe, wiira arwaache eethelhe umamatani. Voonilhe aya attu anokhuma vawani, ahokhuma veevithilhe aya nkayeevakacha. 44 Naabimeleki ni nkutiro waya nkayaarwacha attimakachaka, urwaa ulhitelhelha nlhako wo ukelha vawani. Mikutiro chaya miilhi chikina nkachaatakacha attu ari umamatani alhe ni weevakacha. 45 Naabimaleki nkayaatakana ni attu o iwani iyo nihuku nonkhaye. Yamalheke, nkayaavara mateeka ilhapo iyo ni weeva attu onkhaye aarii vawani vawo. Nkayaarimeelhiha yeyo ilhapo iyo wo mooro ni uhelha maakha.

46 Yamalheke attu onkhaye yaari waari ingome yo Ushekemu vewiilhe aya yoyo mwaha uyo, ahottawelha urii nipuro no inupa ya nlhuku eehaniye El Berithi. 47 Naabimaleki nkayaahimeriya wiira attu onkhaye yaari ingome yo Ushekemu yahothukumana vamoka. 48 Paahi Naabimaleki ni attu awe ahorwaa umwaakoni Usalmoni, nkayaakusha ipacho nkayaatupulha nritta no mwiri ni weesha vanikhathani waya. Yamalheke, nkayeerelha attu attukanne aya ayo wiira yaakuviheke uphanga thoko chipannge aya. 49 Kila mmoka nkaatupulha nritta thoko nenne ni Naabimaleki nne. Nkayaakushacha maritta ayo ni weemesha urii ishiri yo mwiinano, nkayaapaha mooro ni upaha ingome. Attu onkhaye manyaalhopwana ni manyaathiyana aaphiya elufu imoka, yaari wi ingome yo Ushekemu ahokhwaacha.

50 Yamalheke Naabimaleki nkayarwaa Uthebesi, nkayaarukureria iwani iyo ni uvara mateeka. 51 Nansho yahokhalha ishanja yo machiri variyari iwani vawo. Paahi attu onkhaye o ilhapo iyo manyaalhopwana ni manyaathiyana ahottawelha wowo ni wiitelha mpaani. Nkayaawelha vachulhu nchaara no ishanja iyo. 52 Naabimaleki nkayaaphiyelha ishanja iyo ni ukelhelha. Yamalheke ahaatameria nlhako wo ishanja iyo, wiira apahe mooro. 53 Ni nthiyana mmoka ari vachulhu ishanja iyo, ahowonya nlhuku no ushilhelha no vachulhu nkanaanyatha Naabimeleki vamuruni. 54 Yamalheke Naabimaleki ahomwiihana mmirawo aya aakushilhe ikerero chaya aakuvie ni umwiirelha wiira, "Ukusheke uphanga awo, ukiiveke, ahiwe attu aahimia wiira kiheeviya ni nthiyana." Mmirawo uyo ahokusha uphanga awe, nkaahoma Naabimeleki ni weeva. 55 Attu o Uisraeli voonilhe aya wiira Naabimaleki ahorimeelha, ahothamacha ni uhokolhia kila mmoka uwannyawe.

56 Paahi phi chiichammo etu, Nlhuku chaahokolhoshenre aya Naabimaleki wo nlhatu waya waapannge aya wa athumwanaya wo weevakacha ashilhoko aya makhumi saba. 57 Tho, chiicho Nlhuku ahaatwarusha attu o Ushekemu wo nlhatu no uwonya waapangilhe aya. Paahi etu, malhavo a Nayothamu mwaana a Nayeru Baali ahaapatta.