1 Arimeelheke Naabimeleki, Natola anaaya Napua, anaaya Nadodo o nikosho ni Naisakari, ahokhalha phi nholhelhi o woopolha attu o Uisraeli. ayo Natola ayo aakhalha Ushamiri ilhapo yo umiakoni yo Efraimu. 2 Yayo ari ntu o waamulha milhatu attu o Uisraeli wo iyaakha makhumi meelhi ni taaru, Yamalheke ahorimeelha ni uvithiya wowo Ushamiri uwo.

3 Arimeelheke Natola, ahokhalha Nayairi o Ugileadi, nkaaholhelha attu o Uisraeli wo iyaakha makhumi meelhi ni piilhi. 4 Nayairi arii ni achishana ashilhopwana makhumi mararu, eetakacha anaweenlhe iphuta makhumi mararu. Yayo iwani chaya chaari makhumi mararu wiilhaponi Ugileadi, uneehaniya mpaka lhelho nna Howoth Yairi. 5 Nayairi ahorimeelha ni uvithiya Ukamoni.

6 Yamalheke, attu o Uisraeli ahowonya tho umihoolho wa Apwiiya Nlhuku nkayaathimicha Mabaali, Maashtarothi, ni milhuku cho Usiria, cho Usidoni, Umoabu, Uamoni ni wa Ufilisti. Ahaahiya Apwiiya Nlhuku, ni uhaathimicha tho. 7 Apwiiya Nlhuku nkaarushiya chinene vonne aya chittu chaapannge aya attu o Uisraeli, ni ayo nkaahiya wiira akottolhiye ni Afilisti ni attu o Uamoni. 8 Yayo ni ayo ahaatwarusha ni waamereriha attu o Uisraeli iyaakha khumi ni nane, attu o Uisraeli aakhanlhe Ugileadi, ilhapo ya attu o Uamori, mpata unosha nchuwa mwoolhoko wo Uyorodani uwo. 9 Attu o ilhapo yo Uamoni ni ayo aholhapuwacha mwoolhoko wo Uyorodani ni urwaa waatakana ni attu o makosho a Nayuda, ni Nabenyamini ni Naefraimu. Nkaathepiha attu o Uisraeli uthemwa chinene.

10 Paahi attu o Uisraeli aholhelha Apwiiya Nlhuku, yeeraka wiira, "Nihoowonyani inyuva, ukhalhawaya nihouhiyani inyu Nlhuku ihu, ni waathimicha Mabaali."

11 Ni Apwiiya Nlhuku nkayaakhulha wo wiira, "Chani mii akuthaminheni ukhuma wa attu o Umisri, nkakowopolhani wa attu o Uamoni, wa Aamori ni wa Afilisti, 12 attu o Usidoni, attu o Uamaleki ni attu o Umidiani otwarushani. Ni inyuva nkamwaakunlhelha, ni mii nkakowoopolhani ukhuma mmiononi mwaya? 13 Inakhalhaka ahopanga chiicho, mwaattiva ahokihiya, nkamwaathimicha milhuku chikina. Paahi akinowookholhani tho. 14 Nrwaacheke mwonlhelheke etu chechiyo milhuku chithanlhe inyu chiyo. Nhiyeke chechiyo chiwe chowaakihani untwarushoni winyu uwo!"

15 Nansho attu o Uisraeli nkayeerelha Apwiiya Nlhuku wiira, "Nihowonya, nnipangeke chinothanana inyu, nansho ninouvendani wiira nnookholhe lhelho." 16 Yamalheke ahorihelha utayi milhuku chilheto chiyo, nkayaathimicha tho Apwiiya Nlhuku. Apwiiya Nlhuku khayoonrie uvilhelha chinene woona ntwarusho wa attu o Uisraeli.

17 Yeyo ikatema iyo attu o Uamoni ahothukumanacha vamoka, nkayeesha nipuro naya Umizpa. nkayees Attu o Uisraeli ni aholhelhi aya ni ayo aheesha nipuro naya Umizpa. 18 Aholhelhi o Ugileadi nkayaakohanacha wo wiira, "Phi mpani etu nohalha uchokholha waatakana ikhoto ni attu o Uamoni? Nohalha wiira chiicho, phi nohalha ukhalha nholhelhi a attu onkhaye anokhalha Ugileadi."