1 Paahi Ugileadi uwo ahokhalha ntu eehaniye Yeftha, yoyo ari ntu wooria waatakana, aayariye ni nthiyana o ulhuva, ni athumwanawe eehaniye Nagileadi. 2 Yayo Nagileadi ayo ahanaa achishana akina wa ahanu aya aakhalhana aya. Yayo achishana a ahanu a Nagileadi ayo ahomwomolha Yeftha wiira athame vawani vawo, amwiirelhaka wiira, "Uwe khurina ittu va yo uvahiya, ukhuma wo chittu cha athumwanihu, ukhalhawaya uwe uyariye ni nthiyana nkina." 3 Paahi Yeftha ahaattawa manyonnawe nkaarwaa ukhalha ilhapo yo Utobu. Wowo attu enchi aholhutaana ni uyo, nkayantwara kila waarwa awe.

4 Baada yo mahuku, attu o Uamoni ahaakelhelha attu o Uisraeli. 5 Ikatema ikhoto vaathepa aya upharelha mooro, ashulhupalhe o Ugileadi ahorwaa ni waakusha Nayeftha ukhuma Utobu, 6 yeeraka wiira, "Nkawaani mmwe mwaaniholhelha unaatakana ihu ikhoto ni attu o Uamoni."

7 Nansho Nayeftha nkayeerelha ashulhupalhe o Ugileadi ayo wiira, "Chani woonaka mwahokivenga nkamwaakomolha wa manyaalhoko a athumwanaka? Ni vavawo chani woonaka nnokiweelha vano vanohuva inyu?"

8 Yayo ashulhupalhe o Ugileadi ayo nkayaakhulhacha wo wiira, "Phi nlhatu no utwarani wiira nnittukane vanorwaa ihu uwaatakanani ni attu o Uamoni, ni inyu nnookhalha nholhelhi ihu ni attu onkhaye o Ugileadi."

9 Nayeftha nkayaathepa weerelha ashulhupalhe o Ugileadi ayo wiira, "Yakhalhaka nnookittukana waatakanani ni attu o Uamoni, ni Apwiiya Nlhuku akoorihaka waakottolha, vavawo mii kinookhalha nholhelhi inyu."

10 Ashulhupalhe o Ugileadi nkayaakhulha Nayeftha, "Apwiiya Nlhuku anookhalha phi o unihimiechesha ihu. Wo ikekhiaye ninoopanga thoko chinre inyu wo wulhumacha." 11 Paahi Nayeftha nkayaattukana ashulhupalhe o Ugileadi alhe, ni attu ayo nkayaapanga ukhalha nholhelhi aya. Nayeftha nkayoolhumacha tho umihoolho wa Apwiiya Nlhuku ittu yaathanana aya upangelhiya, Umizpa uwo.

12 Yamalheke, Nayeftha yahorweha nttenga wa amwene Naamoni yeerelhaka wiira, "Nnaanani ni hii, ata mmwe mwaatakana ikhoto wiilhaponi wihu?"

13 Ni amwene o Uamoni nkaakhulha wo wiira, "Attu o Uisraeli vaakhumilhe aya Umisri, ahokithurulha iwani aka ukhuma mwoolhoko wo Uamoni mpaka mwoolhoko wo Uyaboki, ni mwoolhoko wo Uyorodani. Vano nkiholhoshereke etu iwani iyo wo mpuha."

14 Nayeftha nkaaruma tho akarumiya wa amwene Naamoni, 15 yaahimerie wo nlhatu waya wiira, "Attu o Uisraeli khayaakushilhe ilhapo ya attu o Umoabu mena iwani ya attu o Uamoni. 16 Nansho attu o Uisraeli vaakhumilhe aya Umisri, yente uthakoni mpaka ibahari yo Ushamu mpaka Ukadeshi. 17 Yamalheke attu o Uisraeli ahaaruma akarumiya arwee wa amwene o Uedomu yaalhepelhaka wiira aahiyerere avirache iwani aya, nansho amwene o Uedomu ahokhota. Paahi nkayaalhepelha amwene o Umoabu ni ayo ahokhota. Paahi attu o Uisraeli nkayaahalha Ukadeshi. 18 Yamalheke aheeta nkwaha wo uvira uthakoni urukureriya ilhapo yo Uedomu ni Umoabu mpaka vaapilhe aya mpata uneelha nchuwa wo Umoabu, nkayeeshacha nipuro ukhopelhelhe mwoolhoko wo Uarnoni. Nansho khayaakelhanche ilhapo yo Umoabu. Mwoolhoko wo Uarnoni phi waari mwiinano wo Umoabu. 19 Vavawo attu o Uisraeli ahaaruma akarumiya wa amwene Nasihoni o Uamori, uwo Uheshboni uwo. Nkayaalhepelha wiira aahiyerere avirache vawani waya, arwaache wiilhaponi waya. 20 Nansho Nasihoni ahaakhotelha attu o Uisraeli wiira avirache wiilhaponi waya. Paahi Nasihoni aheehana attu onkhaye, nkayeeshacha nipuro naya Uyahasa, nkayaakelhelha Uisraeli. 21 Paahi Apwiiya Nlhuku a attu o Uisraeli, ahaakottolha Nasihoni vamoka ni attu aya, nkayaatakacha. Paahi attu o Uisraeli nkayaakushacha iwani yonkhaye ya attu o Uamoni yaakhalha aya iyo. 22 Yahokushacha ilhapo yonkhaye ya attu o Uamoni toka mwoolhoko wo Uarnoni mpaka mwoolhoko wo Uyaboki, ukhuma uthakoni mpata unosha nchuwa mpaka mwoolhoko wo Uyorodani uneelha nchuwa. 23 Paahi Apwiiya Nlhuku, Nlhuku a attu o Uisraeli, nkayoomolhacha attu o Uamoni umihoolho wa attu o Uisraeli. Chani inyuva nnothanana unaakha ilhapo ihu? 24 Nthoshiyeke ni ilhe nlhuku inyu Kemoshi yuvanheni awe. Nansho ilhapo iriyoothe Apwiiya Nlhuku, Nlhuku ihu, yoomonlhe aya anenchi o ilhapo iyo, nkayaanivaha hii, yeyo yawihu hii. 25 Chani nnoona wiira nhanaa machiri waapwaha Nabalaki anaaya Nazipora amwene o Umoabu? Yayo nkayaakhulhanne ni attu o Uisraeli ama waatakanana. 26 Ikatema yonkhaye attu o Uisraeli aakhanlhe aya Uheshboni ni ittoko chaya, ni iwani yo Uaroeri ni ittoko chaya, vamoka ni iwani chonkhaye chaari vachereshere mwoolhoko wo Uarnoni, wo ikatema yo iyaakha imia ttaru, chani woonaka khamwookhonlhe ilhapo iyo vavawo? 27 Mii akinoottekelhani ittu, phi nlhatu etu nnoteka inyu vanokikelhelha inyu. Apwiiya Nlhuku phi o waamulha, yayo waamulha lhelho nna variyari wa attu o Uisraeli ni attu o Uamoni." 28 Nansho amwene o Uamoni ahoheulhacha nttenga u Nayeftha uyo.

29 Yamalheke iphumu ya Apwiiya Nlhuku nkayaakuruwelha Nayeftha, ni ayo nkayaathama ni uvira Ugileadi ni Umanase, nkayaahokholhia Umizpa, ilhapo yo Ugileadi ni urwaa mpaka Uamoni. 30 Nayeftha nkayaanlhupelhelha Apwiiya Nlhuku yeeraka wiira, "Yakhalhaka nnowaakottolha attu o Uamoni, 31 paahi ntu riyoothe nohalha ukhuma vathe unupani waka uwa ukikamelhani vanohokolhiaka baada yo waakottolha attu o Uamoni, yoyo nookhalha awinyu Apwiiya Nlhuku. Yoyo kinoukumiherani isadaka yo upahiya vamooroni."

32 Paahi Nayeftha aholhapuwa mwoolhoko, nkayaatakana ni attu o Uamoni, ni Apwiiya Nlhuku nkayaakottolha attu o Uamoni. 33 Nkayaata, nkayaavara mateeka iwani makhumi meelhi munlhokoni mwa Aaroeri, ilhapo chaarukureria iwani yo Uminithi ni Uabelkeramimu. Paahi attu o Uamoni ahokottolhiya ni attu o Uisraeli.

34 Ikatema Nayeftha vaari aya mphironi ahokolhiaka uwannyaya, Umizpa, mwaamwanaya mwanthiyana ahothama uwa uweekamelhani eenaka ni woopa nipalhapata. Yoyo mwalhi uyo ari phi o yekha awe, kwaani Nayeftha khayaarina mwaana nkina nlhopwana ata nthiyana. 35 Paahi Nayeftha vaamonilhe aya, ahaahulha ikuwo chaya wo ukelhiya ihuzuni ni wiira, "O mwaamwanaka! Uhokikwiiha nrima aka. Uweva uhokhalha phi ittu yulhupalhe yo ukihelha ntatakoni. Ukhalhawaya hahaalhupelhelha Apwiiya Nlhuku, ni mii akinooria ukhota ulhupelha waka!"

36 Ni uyo nkaakhulha, "Thithi, yakhalhaka mwaholhupelhelha wa Apwiiya Nlhuku ittu, paahi nkipangelheke thoko chilhapenlhe inyu, ukhalhawaya vano ahowoorihani waalhivihera amalhaponi inyu ni waata attu o Uamoni." 37 Nkaathepa weerelha athumwanawe wo wiira, "Ninouvendani etu ittu imoka, nkivaheke mieri miilhi, wiira kirwee umiakoni ni manyampwana aka, kechunlhenlhe urimeelha waka kihinaya uvekiya." 38 Athumwanawe nkayanhiyerera wiira arwee wowo wo mieri miilhi. Ni uyo nkaarwaa vamoka ni manyampwana awe, nkayonlhacha urimeelha wawe ahinaya uvekiya. 39 Baada yo mieri miilhi ahohokolhia vawani, Yamalheke athumwanawe nkayampangelha wo ulhikaana ni ulhupelha waya. Yoyo mwalhi uyo ari hinaatameriya ni nlhopwana riyoothe.

Paahi toka vavawo, nkayaakhalha malhemalhelho wa attu o Uisraeli wiira, 40 kila iyaakha ashithiyana o Uisraeli anorwaa ulhapelhani wo mahuku macheshe urimeelha wa mwaamwana a Nayeftha o Ugileadi