1 Yayo mahuku ayo ahokhalha ntu mmoka umwaakoni Efraimu, nchina nawe eehaniye Mika. 2 Nihuku nimoka aheerelha anumwanawe wiira, "Ikipande elufu imoka ni imia imoka cho isiliva mweeyeriye inyu, ni inyu kamwanlhava owiiyenreni ni kiiwaka chilhe, mii kihanaa. Mii phi akunshe."

Anumwanawe nkeera wiira, "Apwiiya Nlhuku ovahereke ibarakha Mwaamwanaka." 3 Namika nkaahokolhoshera anumwanaya ikipande elufu imoka ni imia imoka cho isiliva. Anumwanaya nkeera wiira, "Nansho ulhava waka kaalhanve aka uwo, uhuupwanyeni, chilha isiliva chilha kinoowaavaha Apwiiya Nlhuku, wiira chahanelhiye isinyago. Vano etu, kinouhokolhosherani ikipande cho isiliva chiyo." 4 Namika vaahokholhenshere aya anumwanaya ikipande cho isiliva chiyo, anumwanaya ahokusha ikipande imia piilhi cho isiliva, nkayaavaha attu anohana isiliva, ni ayo nkayaakoorosha isinyago yo uhemiya ni yo uthulhushiya. Yeyo isinyago iyo nkayeeshiya mpaani inupa i Namika.

5 Yayo Namika ayo ahanaa vakittu vaya vaathimichera aya. Ahokoorosha ikizibau ya opochera ishaani ni isinyago, Yamalheke nkayampanga mmoka a achishana aya mwanthiyana ukhalha opochera ishaani aya. 6 Yayo mahuku ayo khaariwo mwene o ilhapo ya attu o Uisraeli. Kila ntu aapanga ittu iriyoothe yoonilhe awe wiira yanlhoka.

7 Ni yeyo ikatema iyo ahokhalha mmirawo mmoka Nlawi iwani yo Ubethlehemu ilhapo i Nayuda. 8 Yoyo mmirawo uyo ahorwaa Ubethlehemu ilhapo i Nayuda, uuthothani vakittu vakina vo ukhalha. Nkwaha awe nkawaaphiya ilhapo yo miako u Naefraimu, unupani wa Namika. 9 Namika nkayankoha, "Nkumilhe vayi?"

Ni uyo nkaakhulha wo wiira, "Mii Nlawi, kinokhuma ilhapo yo Ubethlehemu, iwani i Nayuda. Kinaavia vakittu wo ukhalha."

10 Namika nkeera wiira, "Nkhalheke etu vamoka ni miyaano va, nkhalheke uwannyaka va. Nkhalheke athumwanaka ni opochera ishaani aka. Kinoulhivani ikipande khumi cho isiliva kila iyaakha ni miinjiro vamoka ni ittu nnohalha inyu uthanana iriyoothe ilhe." 11 Yoyo Nlawi uyo nkaakelha ni urumelhelha, nkaakhalha wowo ni ukhalha thoko mmoka a achishana a Namika. 12 Ni Namika nkayampanga yoyo mmirawo Nlawi uyo ukhalha opochera ishaani unupani waya uwo. 13 Yamalheke nkeera wiira, "Vano kinoochuwelha wiira Apwiiya Nlhuku anookivahera, ukhalhawaya kihaana mmirawo Nlawi ulha rii opochera ishaani aka."