1 Lijuva lya tatu Esta afwalili yingwa shaki sha chihumbu, ayendili kuwoloka muwani wa mugati ya nyumba ya mutwa, songusongu na mdamwa wa myumba ya mutwa. Na mutwa aveli kayikala pachigoda chaki cha wutwa mumdamwa wula kulola kumlyangu mkomi wa kwingilila. 2 Mutwa pamuwonili muhumbu Esta kawoloka muuwa, anoviliwili na Esta, amusonyilili lula lukweku lwa chumangandu lwakamulili. Pambeli Esta amselilelili na kugufya mbeju ya lukweku lwa mutwa. 3 Pambeli mutwa amudashili, "Ukudayila liki muhumbu Esta? Ung'ombeli chiwudayila ngugayili, hata nusu ya wutwa wangu dangugayili."

4 Esta kayangula, "Leki payikunovela, yuwi mutwa wisi nalelu yuwi pamu na Hamani ndanda lihungu kwanongwa ya umweni mutwa."

5 Mutwa kadeta, "Mukamuwombeli Hamani ayisi kalopu, ili tugoli ngimu wadayila Esta." Pambeli mutwa na Hamani vayendili mulihungu lyavatandilili Esta. 6 Pavalandeyi difwayi mutwa amudashili kandi Esta, "Ponopa ung'ombeli, chiwudayila, ngugayili. Nguwesha kukugayila hata nusu ya wutwa wangu." 7 Esta kamuyangula, chinuva ndi achi 8 "Leki payikunovela yuwi mutwa, na ukujumila chinuva, topi, nguluva yuwi pamu na Hamani chilawu mwisi kulihungu dandivatandili. Pawisa dandikuwombeli chidayila."

9 Pavafumeyi kulihungu Hamani ndima yaki yamemili seku. Lakini pamuwonili Modikayi kawoloka pamlyangu mkomi wa mutwa, na aveli ngajila kubagama pawulongolu yaki, Hamani apatili maya mundima yaki kwanongwa ya Modikayi. 10 Hata naha, Hamani kayiwunishila kayenda kayaki. Kavakema vaghanja vaki na Seleshi mwehi mundu. 11 Hamani ayijumili kwa veni kwanongwa ya ulundamali mkomi wavelinawu, vana vaki valulumi vatangalili na ndambu mutwa wamupili ndundamilu na kuvikiwa mkomi pitu vandumindumi vonda va mutwa. 12 Hamani ayendilelili kudeta, "Afi hela ha, nenga ndi mundu wa paweka, muhumbu Esta kanalika mulihungu pamu na mutwa. Hata chilawu kanalika kandi nyendi na mutwa. 13 Lakini fyondafi fikunyimba kusika ha panyendilela kumuwona yula Myawudi Modikayi payikala pamlyangu mkomi wa mutwa."

14 Topi, Seleshi mwehi mundu, na vaghanja vaki vamuwombela, "Goli libiki lya kwitumbikila, livelili na utali wa ngatachifuva milongu mivili na mbili? Pambeli chilawu pamalavila puti ywangi na mutwa, Modikayi awulaghiyi kwa kutumbikiwa, pambeli muyendi mukalyi filivi na mutwa kwa seku."

Chilongu achi chamnovilili Hamani na agolili mahali pa kutumbikila.