1 Pambeli maya va mutwa Ahasuelu pavapelili amwiholili Vashiti, na chila chagolili Vashiti na ndambu walamulili kwilata mweni. 2 Topi, vandumindumi vaki vala yivamkimbanikila mweni weka vamuwombilili, "Leki tukusakili vadadala vayenji yivavayilili. 3 Mutwa ashawuli maofisa muwutwa waki kila mkowa, vakuyegheli vayenji yivavayilili, muluviwu lwa Shushani. Na ava vavi pasi ya ndumindumi Hegai yafuniwili, mweni aloleli nyumba ya vadadala, avaloleli na kuvapa findu fyonda fya kuvagola vavayili. 4 Pambeli yula yiwumtamili pitu vonda ghavi muhumbu badili ya Vashiti."

Chilongu achi mutwa awonili cha nyanyi agolili ngimu wuvawombili.

5 Muluviwu lwa Shushani pavelili na Myawudi wa kabila lya Benjamini, vamkemili Modikayi mwana wa Yaili mwana wa Shimeyi, mwana wa Kishi, 6 mweni aveli gati ya vala yivatoliwili kuuvanda kufuma Yelusalemu chipindi mutwa Yekoniya wa Yuda, pakamuliwili mumgoha pamu na mutwa Nebukadinesa wa Babuloni. 7 Modekayi avelili na mpwa mundu mdadala litawa lyaki lyavelili Hadasa, kwa chibulania vamkemili Esta avelili kavayila njimba na wushu. Valeli vaki pavasovili, Modikayi amtolili Esta kamlela kucha mwanamundu.

8 Amuli ya mutwa payilanduliwili, vakavali vavayilili vatangalili vavayeghili mluviwu lwa Shushani na kuva pasi ya uloleli wa Hegai. Na Esta wuwowu vamuyeghili kwa Mutwa vayikali na Hegai, yavelili mkomi wa nyumba ya vadada na fidumu. 9 Hegai amutamili Esta pitu vamonga. Amupili Esta mafuta va kunungilila na filivi fya paweka. Afi hela ha, amuhamishilili mahali panofu munu munyumba ayi ya vadadala, kamshawulila vavanda saba kufuma kunyumba ya wutwa vamkimbanikili.

10 Esta ayimanyishili ha kucha mweni mundu wa lukolu liki na kabila liki, nongwa Modikayi amkayikili akotoo kugola naha. 11 Kila lijuva Modikayi atyangilili kuwani wa nyumba ya vadadala ava, ili amanyi hali ya Esta na findu dafimfiki.

12 Chipindi cha ava vakavali kwimelimetesha chavelili mwaka wumu, myesi sita ya kwaa vayishaghili mafuta va manimani na myesi ya mbelu vayishaghili mafuta vengi va kunungilila. Pambeli kila kamwali weka yaki ayeghiwili kwa mutwa Ahusuelu. 13 Chipindi cha kwingila kwa mutwa, kila muyenji agayiliwili kila chindu chadayilili kutola kufuma munyumba ya vakavali na kuyenda nachu mumnyumba ya mutwa. 14 Palumihi vayendili na chilawu yaki pamalavila vawuyili mwambu wingi wa nyumba ya vadadala yivelili pasi ya uwolukeli wa Sahashigasi, yafuniwili yavawolukela fidumu fya mutwa. Angaweshili ha kuwuya kwa mutwa mbaka amtami na kukemiwa kwa litawa lyaki.

15 Pachifikili chipindi cha Esta kamwali wa Abihaili, mpwa mundu Modikayi, yamtolili kuva kamwali waki kwingila kwa mutwa, mweni adayilili chindu ha, ila chila chalayishiwili na Hegai, mtangi waki mutwa, yula yavadima vadadala. Na Esta ajumiliwili na kila mundu yamuwonili. 16 Topi, Esta ayeghiwili kwa Mutwa Ahasuelu munyumba ya wutwa, mwesi wa lilongu, wuukemiwa Tebeti, mumwaka wa saba wa wutwa waki. 17 Mutwa amtamili Esta pitu vadada vamonga vonda. Topi, mutwa amfwalishili likokoma lya chihumbu kumutwi, atoli fwasi ya Vashiti. 18 Pambeli mutwa agolili lihungu likomi kwa ndundamilu ya Esta, kavalalika filongosi na vandumindumi vosi yivavelili muwutwa waki. Wuwulawula mutwa alandulili mbumulilu mu mikowa yaki yosi, na atawulili fupu sitangalili kulinga uwesu waki wa chiwutwa.

19 Topi vayenji pavayikungashili mwanja wa pili, Modikayi ashawuliwili kuva chilongosi pamlyangu mkomi wa mutwa. 20 Esta avelili kayimanyisha ha lukolu lwaki wala kabila lyaki nga Modikayi wamukayikili, kwanongwa Esta ayendililili kumpikana Modikayi ngimu wampikanilili chipindi cha wana waki.

21 Chipindi Modikayi paghaveyi kayikala pamlyangu wa mutwa, Bigitana na Teleshi yivadima nyumba ya mutwa, vakalalili munu mbaka vawombanila vamuwulaghi mutwa Ahasuelu. 22 Modikayi achimanyili chindu achi, kamuwombela muhumbu Esta na Esta kamuwombela mutwa chindu achi. 23 Pambeli pavalembishili kwa chifisu, yamanyikili kucha ndi nakaka, topi vandu ava vavili vatumbikiwili mulibiki na kuwulayiwa, na chilongu achi chayandikiwili muchitabu cha ngumbungumbu pawulongolu ya mutwa.