1 Mumwaka wa kwaa wa utavala wa mutwa Belishasa wa Babiloni, Danieli alotili milotu na kupata hoshu kunu kawonja muulili waki, ayandikili milotu ayi yalotili. 2 Nenga Danieli yanyisilili milotu pamihi ndawonili, mumilotu yangu kwavelili na uyegha kufuma mbembi mchechi sha mlima weni wagubili bahali. 3 Vang'ongolu vakali na vakomi mchechi vabwituka kufuma mu yila bahali kila ng'ongolu aveli ndambu ya paweka na monga. 4 Ng'ongolu wa kwaa kayifwana na majabi, na aveli na mbapatilu kucha sha ngwasi. Pandimlembishili ndawonili mibapatilu shaki shapukuliwili. Na kayinuliwa na kuwoloka kwa mawulu mavili na kagayiliwa luhala kucha lwa mundu.

5 Ng'ongolu wa pili yivamkema dubu yavelili na mawulu va kumbeli matali. Mlomu waki wavelili na mbafu ndatu shakamulilili muminu vaki, lishu limuwombela, "Haya, wulyi nyama mbaka wikuti!"

6 Pafipitili afi, kuulongolu yangu ndamuwonili ng'ongolu wingi. Ayu ayifwanili na duma yavelili na mbapatilu mchechi kucha sha mbongu, aveli na mitwi mchechi na agayiliwili uwesu wa kutavala.

7 Panyendilelili kulembesha ndimuwona ng'ongolu wingi wa mchechi, yakapusha na yagola umtili na kana liwovi likomi. Ayu avelili na minu mikomi ya chuma ayi ndi yalilili nyama na kubenanga mipava, na nyama yisighalili avatangili kwa njapu shaki. Ayu avelili wa paweka na vala vang'ongolu vamonga vatatu, nongwa avelili na migomi lilongu. 8 Pandiyilembesheyi yila migomi, ndawonili ligomi lingi lidokwa palimela gati ya yila lilongu. Ili kuligayila fwasi ligomi ali, migomi yimonga mitatu yatupuliwili na mikigha yaki. Ligomeli lyavelili na mesu va mundu na mlomu wuudetili filongu fya kwifuna.

9 Pandiveyi ngali ngulembesha, figoda fya wutwa fyavikiwili pala, pambeli mgogolu yayikala majuva vosi kayisa kayikala. Avelili kafwala yingwa ngeli, fwili shaki shavelili mbuletee. Chigoda chaki cha pakwandi chavelili cha myengi ya motu, na milingishi ya chigoda chaki yaveli motu wuuyaka. 10 Kufuma muchigoda chila chibosi cha motu lwasesili, lutuva. vamakungu maelufu vamkimbanikili na vamakungu mamiliyoni vawolukili kuulongolu yaki. Chitemela chiyikala ndemindemi kwa highilu na fitabu fifuwuliwa.

11 Pambeli nyendilela kulola kwanongwa ya fila filongu fya kwifuna fya lila ligomi. Ndayendilelili kulola mbaka yula ng'ongolu pasinjiwili na mvili waki wudanganyishiwa ka kudangiwa mu wula motu wuuyakeyi. 12 Vala vang'ongolu vamonga vapokiwili uwesu wawu wa kutavala, lakini veni valekiwili vayendileli kwikala kwa chipindi chidokwa.

13 Chipindi cha milotu ayi pamihi, kuulongolu yangu ndawonili yumu kucha mundu payisa mumafundi, kamselilela yula Mgogolu wa pakwandi na valongosha kwa mweni. 14 Kagayiliwa uwesu, ukomi na wutwa, ili vandu va makabila vosi na milima yosi detelu shosi na wamkimbanikili. Utavala waki wa jola nawutwa waki wungajila mbelu.

15 Milotu yindiwonili nenga Danieli yanilimushili na kunyasha. 16 Ndamselililili yumu wa vala yivawolukili kula na ndimdasha mana yeni ya milandu ayi yosi, mweni kang'ombela. 17 "Ava vang'ongolu vakomi mchechi ndi wutwa mchechi dasifumbuki mumlima. 18 Lakini vandu va Chapanga mkomi davagayiliwi wutwa awu na kwikala nawu jola."

19 Pambeli ngadayileyi kumanya mana ya ng'ongolu yula wa mchechi, ayifwanili ha na vala vamonga kandi avelili wa kukapusha munu na yavelili na minu va chuma na mikonji ya shaba. Minu yawu ndi yagolilili kulya na kubajanga mingendewu na nyama yisighalili avatangili kwa njapu shaki. 20 Wuwula wula nenga dayilili kumanya kwilata migomi yila lilongu kumutwi yaki na wuwula wula lila ligomi limonga lifumbukili, kuulongolu ya sila ndatu sha kwaa shawili, lila lina uwesu pitu yila yingi na yivelili na mesu na mlomu wuudeta findu fya kwifuna.

21 Pandiveyi ngali ngalola, ligomeli lyalevili mgoha na vang'alili na kuvawesha. 22 Chapanga wa kumbindi munu, Chapanga wa jola paayisili na kulamula kwa kuvatanga vandu vaki yavashawulili, kwanongwa chipindi chawu cha kukola wutwa chifika.

23 Ang'ombilili naha, "Ng'ongolo wa mchechi ndi wutwa wa mchechi wuufumbukili pamlima, dawuvi wa paweka na wutwa simonga shosi na dawuyanangi mlima. 24 Yila migomi lilongu ndi vatwa lilongu yivavikiwa na wutwa awu, Mutwa wingi dafumbuki badili yawu na daghavi wa paweka kwa vala yivalongulili, na mweni davawishi vatwa vatatu. 25 Ayu daaamduki Chapanga mkomi na kuvatesha vandu va Chapanga. Dayeshi kughalambula fipindi na shaliya shawu, na vang'alili davakamuliwi na mweni kwa chipindi cha myaka mitatu na nusu. 26 Lakini chitemela cha kumbindi kwa Chapanga, davampoki utavala waki na kutilingiwa na kudanganyishiwa nakamu. 27 Wutwa, dawutavali na ukomi wa wutwa shosi sha mumlima davagayiliwi vandu va Chapanga mkomi. Wutwa wawu dawuvi wa jola na tavala shonda dasimkimbanikili na kumkombikesha."

28 Achi ndi chingomeku cha chilongu achi. Hoshu shangu shanilimushili munu nenga Danieli, hata wushu wangu waghalambukili. Lakini ndayiholili mundima yangu.