1 Lakini kwa mwambu wangu nenga, mumwaka wa kwaa wa mutwa Daliu mundu wa Medi ndawolukili kumtanga na kumdima na kumgayila liwovi.

2 Makungu kadeta, Ponopa dandikuwombeli wula unakaka wa milandu ayi, Kuugiliki davafumbuki vatwa vatatu, pambeli dafumbuki mutwa wa mchechi, mweni daghavi mlundamali munu pitu vosi. Chipindi payipatila kala liwovi kwa ulundamali waki daamjongisheli kila mundu kwilata wutwa wa Ugiliki.

3 "Pambeli dafumbuki mutwa munaliwovi, atavali kwa liwovi likomi na kugola nga wadayila mweni. 4 Hata naha mumbelu ya utavala waki dawupeli na kubavika kamchechi sha kumbindi kwa Chapanga. Fileli fyaki dafitavali ha, wala wutwa dawuvi ha mukuwoku yawu kwanongwa wutwa waki dawutoliwi na vengi.

5 Mutwa kuchanya daghavi munaliwovi. Lakini yumu wa vangandawu vaki daghavi munaliwovi munu pitu mweni na utavala waki dawuvi na liwovi munu. 6 Payipita myaka yiutunga dayilumbi, kamwali wa mutwa wa kuchanya dahetiwi kwa mutwa wa kalihingila, ili kudindasha fivawombanili, lakini kamwaleyu liwovi lyaki lya kumgola mundu ajumili daliyikali ha, na tati mundu dayivi nahawu. Mumajuva vesava davingivingiwi pamu na vatangi vaki va chiwutwa, vana vaki na yoyonda yula yamulumbili. 7 Pambeli mundu yumu kufuma mulukolu lwa kamwali ayu daghavi mutwa. Mweni dapundangili vangandawu va mutwa wa kalihingila na kwingila muviwu shawu na kuvawesha. 8 Datoli ming'omung'omu ya kusongola sha vamlungu vawu na findu fyawu fitalamili fya madini va mbiya na chumang'andu mbaka kumlima wa misili. Kwa chindi cha myaka yiutunga, mutwa wa kuchanya daampundangili mutwa wa kalihingila. 9 Lakini pambeli ayu mutwa wa kalihingila dawuhomukeli wutwa wa kuchanya, ila dadayiliwi kuwuya kumlima waki."

10 "Hata naha, vana va mutwa wa kalihingila dakungashi lingandawu likomi na kwitalisha kwa mgoha. Lingandawu ali daliyendileli kuulongolu lucha lilava lya machi na kuyendilela na mgoha mbaka kuluviwu lwa mutwa wa kuchanya. 11 Topi mutwa wa kucha dafumi kwa chifuki na kuleva mgoha na mutwa wa kalihingila na dagoli lingandawu likomi lakini dalemwi. 12 Paliweshishili kala munu lingandawu lya kuchanya na kuwulagha vandu maelufu, dakandi kwijuma, ila dayendileli ha kuva muweshi."

13 "Nongwa mutwa wa kalihingila datalishi lingandawu likomi pitu lila lya mwanja mtasi. Pambeli piyipita myaka yiutunga dawuyi na lingandawu likomi livelili na findu fitangalili. 14 Chipindechi vandu vatangalili davalemi mutwa wa kuchanya. Vandu vamu makuluhu va mlima waku yuwi Danieli davalemi ili kugola fila yifidetili milotu ayi, lakini davalemwi. 15 Topi mutwa wa kalihingila dayisi na kwigomba mbwani yivelili na luviwu ludindalili na kwikamula kwa mgoha. Vangandawu va kuchanya davayiwunishili ha, hata vala yivashawuliwili nongwa davavi na liwovi ha. 16 Ayu yahomukela mlima kwa mgoha davagoleli ngimu wadayila mweni, kwahela mundu yoyonda yagela kuleva na mweni. Dawoloki mumlima mkomi, na mlima awu wonda dawuvi pasi ya mweni."

17 "Na dayilati kwisa na liwovi lya wutwa waki wonda na kuwombana kwa kusika na mutwa wa kuchanya. na damtawuli kamwali waki ili kwilumba na wutwa wa chimdwama waki, lakini chayilata dachigoleki ha wala kumtanga chindu chochosi. 18 Pambeli daghalambuki na kwipundangila milima yitangalili ya muluwongu na kusiwesha. Lakini mkomi yumu wa chihenja damuweshi na kupeja nakamu kwifuna kwa mweni, yina, damuwuyishili mutwa wa kalihingila funilu yaki mweni. 19 Topi daghalambuki na kusiwuyila viwu sha mlima waki mweni, lakini dayikwali na kuwa kumgoha, na dawoneki kandi ha."

20 "Dayatali badili yaki damuyeghi msumula mbiya ili kwidindasha ulundamali wa wutwa waki. Mutwa ayu dawulayiwi pavapita majuva madokwa hela, lakini kwa maya ha wala kwa mgoha."

21 Makuku kayendilela kudeta, Na ayu datavali daghavi mundu wa kubedaliwa, yangajila kugayiliwa ndundamilu ya dawuhomukeli wutwa chipindi vandu vaki pavayiwona vava nyanyi, na mweni dawulayiwi kwa kwiwongola. 22 Topi lingandawu na mtambika wa nyumba ngomi ya Chapanga davafaghiliwili kutali na kuwulayiwa. 23 Pavawombanili kala na mweni, dagoli ujangi kwa milima yingi na dayendileli kupata liwovi hata leki akutavala mlima mdokwa. 24 Chipindi mikowa yivelili na ulundamali mkomi pavayiwona kucha vava nyanyi, dayihomukeli na kugola chila vatati mundu wala vambuyi mundu vagolili kamu ha. Pambeli davavaghashili vandu vaki vala yivakamuliwili mumgoha, mali na findu fyakamulili kumgoha. Dawombanili kusipundangila viwu lakini kwa chipindi chidokwa hela.

25 "Kwa uhwadali mkomi dagoli lingandawu likomi ili kuupundangila wutwa wa kuchanya, na mutwa wa kuchanya dawuyishi mbundangilu kwa kuva na lingandawu likomi munu na livelili na liwovi na liwovi munu. Lakini mutwa wa kuchanya daweshi kwanongwa ya chila chagolili kwilata mweni. 26 Vala yivalya pamu na mweni ndi davamdanganyishi. Davamdanganyishi na lingandawu lyaki dalifyaghiliwi kutali na vandu vatangalili davawulayiwi. 27 Topi, vatwa ava vavili davayikali pamu pamesa kulya, lakini kila mundu akwimwiholela monga wafu na kwijanga veni kwa veni. ila dayivi ha, nongwa chipindi yichilatiwili dachivi chikalihela kufika. 28 Mutwa wa kalihingila dawuyi kumlima waki kunu kava na mali sitangalili, lakini mundima yaki akwihola kulileka lilaghanu ling'alili. Dagoli wadayila mweni pambeli dawuyi kumlima waki."

29 "Muchipindi yichilatiwili dawuhomukeli kandi mlima wa kuchanya, lakini chila dachifumbuki chipindechi dachivi kafwauti na mwanja matasi. 30 Matu makomi kufuma Kitimu davampundangila, na mweni dakamuliwi na chipwembwi."

"Pambeli dawuyi kumbeli kunu kamema maya na kulileka lilaghanu ling'alili. Topi dagoli chila chivadayila vala yivalilekili lilaghanu ling'alili. 31 Vangawu vaki davalitayi wafu nyumba ngomi na viwu shaki, na kuleka kugola mitambiku ya kunyanya tinigu kila lijuva na kukimika munyumba ngomi vifyu sha danganyishilu. 32 Kwa ujangi davayaghamishi vala yivalilekili lilaghanu, lakini vandu yivamumanya Chapanga wawu davamlimbi kwahilu. 33 Vala yivavelili na luhunja davavawuli yivatangalili. Hata leki kwa chipindi chidokwa davawulayiwi kwa mipanga awu kunyanyiwa motu awu kukamuliwa na kugoliwa yivakamuliwili mumgoha. 34 Chipindi pavawulayiwa davapati utangi padokwa, na vala vangajila kuva vaaminifu davayilumbi pamu. 35 Vana luhunja vamu davawulayiwi, ili vaweshi kuwushiwa wafu, kung'lishiwa na kugoliwa nyanyi mbaka chipindi cha mbelu, nongwa ponopa chikalihela kufika."

36 "Mutwa dagoli nga wadayila dayikweshi na kwikwisha kucha mweni ndi mkomi pitu vamlungu vosi, na kumduka Chapanga wa vamlungu. Dayendileli kupata mbaka maya vafiki chingomeku chaki, nongwa yifilatiwili mbaka fivi. 37 Mutwa ayu dalangushi ha ndundamilu kwa vamlungu va vatati mundu awu kwa yula yadobukeliwili na vadadala wala dawoni chindu ha mlungu yoyonda, nongwa dayiwoni mkomi pitu yoyonda yula. 38 Badili ya vamlungu ava mweni datundamili mlungu mdimi wa luviwu, yula vavaha vaki vavelili vamjuma kamu ha. Damtawulili chumang'andu, madini va mbiya, vindu fitalamili pamu na fupu sitawukili munu. 39 Dasipundangili viwu sivelili liwovi munu kwa utangi wa mlungu muhenja na davatundamili munu vala dayivamjumili mweni, davagoli vatavala kwa vandu vatangalili na kuvagayila mlima kucha fupu."

40 "Chipindi cha mbelu mutwa wa kuchanya dampundangili mutwa ayu wa kalihingila. Lakini mutwa wa kalihingila dayanguli mbundangilu ayi kwa hilu kucha lingukumbi, paghava na mbutuka sha kukuluwuliwa na fwalasi, yivakwela fwalasi na matu makomi vatangalili. Dayihomukeli milima yitangalili na kupita mumilima ayiyi kucha lilava. 41 Dawuhomukeli hata mlima wula mkomi na kuwulagha maelufu ya vandu, lakini milima ya Edomu, Mowabu na ngengileka ngomi ya Amoni dasilowoki na danganyishilu yaki. 42 Chipindi payihomukeli milima ayi, hata mlima wa Misili dawulowoki ha. 43 Daghavi na sanja sha chumang'andu, madini va mbiya na findu fyosi fitalamili fya mlima wa Misili. Vandu va Libiya na vandu va Isopia davagoli nga wadayila mweni 44 Lakini filongu kufuma kundamba na kalihingila dafimkapushi, na dawuki kwa maya makomi ili kuwulagha kudanganyisha vatangalili. 45 Pawufileka afi, dakimiki mibudi yaki mikomi gati ya bahali na chidunda chikomi na ching'alili. Lakini daghavi kafika chingomeku chaki na dakuvi ha na yoyonda wa kumtanga."