1 Makungu kayendilela kudeta, "Chipindechi, Mikaeli, makungu mkomi, yaveli mdimi wa vandu vaku, dafumbuki. Ndi dakuvi na chipindi cha Tabu munu pitu fipindi fingi fyosi kukandila milima payikandili kuva pamlima. Lakini, chipindechi kila mundu yavelili mundu waku, litawa lyaki liyandikiwa muchitabu cha unofu, dalowuliwi. 2 Vandu vonda yivasovili, davashukuki. Vamonga davapati unofu wa jola na vamonga chindipa na kubedaliwa jola. 3 Vala yivavelili na luhunja davang'ali kucha lulanga lungajila lifundi. Na vala yivavalongosha vengi kugola chila yichidayiliwa na Chapanga davang'ali kucha ndondwa jola."

4 Yula makungu kayendilela kudeta, "Ponopa yuwi Danieli, viki mundima filongu afi, gubiki chitabu na kuvika lihundu mbaka chipindi cha mbelu pachifika. Yivatangalili davatuvili aku na aku, na umanyi dawuyongesheki."

5 Pambeli nenga Danieli ng'ona vandu vavili vawoloka mung'emula ya lweni, yumu mwambu awu na wingi mwambu wingi wa lweni. 6 Yumu gati ya veni amdashili mundu yafwalili yingwa ngeli yawolukili mwambu wa kumbindi wa lweni,, "Findu afi fya kukapusha dafiyikali mbaka ndili?"

7 Yula mundu yawolukili mwambu wa kumbindi wa lweni, yafwalili yingwa ngeli, kaholosha kumbindi mawoku vaki vosi mavili. Pambeli mbikana akwilapa kwa Chapanga yayikala jola kadeta, "Dayivi kwa chipindi cha myaka mitatu na nusu. Chipindi gobuleku ya vandu vang'alili payipela, findu afi fyosi dafivi."

8 Ndapikanilili chadetili lakini ndamanyili chindu ha. Topi dasha, "Bambu wangu, mbelu ya findu fyosi afi dayivi wuliwuli?"

9 Kanyangula, "Danieli, ponopa wuki, kwanongwa filongu afi fiva chifisu mbaka chipindi cha mbelu. 10 Vandu vatangalili davayipughi veni. Lakini vandu vawafu davayendileli kugola wafu, kwahela hata yumu gati ya ava damanyi, ila vala yivavelili na luhunja weka ndi davamanyi."

11 "Kukandila chipindi chila cha kuleka kutawula mitambiku ya kunyanya tinigu kila lijuva, ndi kukandila chipindi cha wafu yichiyegha msayisayi munyumba ya chapanga payipejiwa dayivi chindi cha majuva alufu yimu mya mbili na milongu tisa. 12 Ngiba yula yayiwunushila mbaka kufikila mbelu ya majuva alufu yimu mya ndatu na milongu mitatu na muhanu."

13 "Lakini yuwi Danieli, wiyendeli ukapumulili kusembi, na chipindi pachifika dawushukuki na kugayiliwa fupu."