1 Mumwaka wa kwaa wa Daliu mwana wa Ahusuelu mundu wa Umedi pagoliwili mtavala wa Babeli, 2 mumwaka awu wa kwaa wa kutavala kwa Daliu nenga Danieli ndamanyili kupitila mayandiku, nga wuchivelili chilongu cha Bambu chagayiliwili mbuyi Yelimiya, kucha Yelusalemu dayidanganyishiwi na kutavaliwa kwa myaka milongu saba. 3 Topi ndimluva Bambu Chapanga kunu pandimdedeka mudadavu na kwikaja kulya na kufwala yingwa sha milobotu pamu na kwibunga lifu, kulangusha lung'ong'u kwa chila chitufumbukilili. 4 Ndamuluvili Bambu Chapanga wangu na kupomela sambi sha vandu vangu.

Deta, "Yuwi Bambu, ndi Chapanga mkomi, na yiwutundamiliwa. Yuwi ndi mwaminifu kwa lilaghanu lyaku lya utami kwa vala yivakutama na kukupikana yuwi."

5 "Tugola sambi, tuvifya, tugola findu fya wafu na kukulema. Tuleka kukupikana malawu vaku na ng'ulilu yaku. 6 Tuleka kuvapikana vandumindumi vaku vambuyi, veni vaywangili lulayilayi lwaku na vatwa vetu na vakomi vetu na vavaha vetu pamu na mlima wetu wonda. 7 Bambu, majuva vosi yuwi ukugola fya nyanyi, lakini nalelu tupata chindipa, vandu va Yuda na vandu va Yelusalemu pamu na Isilaeli yonda, vaaminifu ha kwa yuwi Bambu Chapanga. Vandu vetu kuvapwililisha kutali kumilima yingi. Vamu va pabehi na vamu va kutali, twavosi tuva na chindipa kwanongwa tukulema yuwi. 8 Bambu, yufwi na vatwa vetu na filongosi vetu na vavaha vetu tugola findu fya chindipa munu na tugola sambi. 9 Bambu Chapanga wetu, yufwi tumlema lakini yuwi kuva msangi na ukupomela vandu. 10 Twampikanilili ha Bambu Chapanga wetu, walayishili vandumindumi vaku vambuyi vatugayili malawu vaku. Lakini twayikalili ha ngimu wutuwulili shaliya yaku. 11 Vandu vonda va Isilaeli valema shalia yaku, na valema kukombikesha malawu vayandikili ndumindumi waku Musa topi kula kulapiliwa kuva kwa yufwi nongwa tugola sambi. 12 Kugola filongu fiwutudetilili yufwi na vatavala vetu. Kwa kutuyeghela njifwa ngomi, nakaka mumlima awu wonda chigoleka kamu ha chindu nga chila yichigolikili mumbwani ya Yelusalemu. 13 Kututova ngimu wuyiyandikiwili mumalawu va Musa. Lakini mbaka ponopa yuwi Bambu Chapanga wetu, tupomela ha kwa yuwi kwanongwa ya kusileka sambi shetu na kwihola uwaminifu waku. 14 Ponopa Bambu Chapanga wetu, waveli ndemindemi kututova, na wagolili nahawu, kwanongwa majuva vosi ukugola fivelili fya haki, na yufwi twakupikanilili ha."

15 "Ponopa Bambu Chapanga wetu, yiwuvawushili vandu vaku kumlima wa Misili kwa liwovi lyaku likomi na kuligola litawa lyaku livi likomi mbaka ponopa. Tukudeta tugola sambi, na tuvifya. 16 Yuwi Bambu, ngimu wufivelili figoli fyaku fya haki kotoo kuunyekwa wala kuva na chifuki na mbwani yaku ya Yelusalemu, mbwani yaku ying'alili. Vandu vonda va milima ya pabehi vakwibedala mbwani yaku ya Yelusalemu na vandu vaku, kwanongwa ya sambi shetu na vifyu sivagolili vavaha vetu. 17 Kwa ndambu ayi yuwi Chapanga, pikanishi dadavu yangu na chila chinuva nenga ndumindumi waku. Pawudayila umweni, wutuloli kwa lusungu kwilata ukiva wa mahali paku pang'alili. 18 Yuwi Chapanga tegheli, fuwuli mesu vaku loli ukiva wa mbwani yila yivelili na litawa lyaku. tukukuyeghela dadavu yetu kwanongwa tuva goleki ha, ila kwanongwa yuwi kuna lusungu lukomi. 19 Yuwi Bambu utupukani, utupomeli! Kwa lusungu lwaku pikani na ukagoli, kwanongwa yaku yuwi Bambu wangu kotoo kuhava kwanongwa mbwani yaku na vandu vaku vakukemiwa kwa litawa lyaku."

20 Topi pandiveyi ngudadava, kunu pandambula sambi shangu na sambi sha vandu vangu va Isilaeli na kumdedeka Bambu Chapanga kwanongwa ya mlima waki wung'alili. 21 Gabulieli, yula mundu yindimuwonili mumilotu mwanja mtasi, asunukili kalopu mbaka mahali pamelili. Yavelili chipindi cha kutawula ndambiku ya palumihi. 22 Topi kang'ombela, "Danieli, nyisa kukugayila luhunja na uwesu wa kumanya. 23 Pawukandili hela kudadava, Chapanga akuyangulili, na nenga nyisa kukuwombela chakuyangulili kwanongwa kutamiwa munu. Ponopa undegheli finofu na kumanya milotu ayi."

24 "Kwa chipindi cha myaka mya mchechi na milongu tisa yivikiwa kwanongwa ya vandu vaku na kwanongwa ya mbwani yaku ying'alili ili kumalila vifyu, kupeja sambi, kupomola uvifyi, kuyegha haki ya jola, kuhidika lihundu milotu na umbuyi na kumwayila mafuta mahali pang'alili munu. 25 Topi ukudayiliwa kumanya chindu achi, kukandila chipindi payidetiwa amuli ya kujenga kandi mbwani ya Yelusalemu mbaka nyisilu ya yula yashaghiwili mafuta, yula yavelili mkomi ndi chipindi cha majuma saba, kwa chipindi cha majuma milongu sita na mivili mbwani ya Yelusalemu kujengiwa kandi, wuvelili na deha ngomi na deha sha pasi kwa pasi, lakini chipindechi dachivi cha gobuleku. 26 Pavapita majuma ava milongu sita na mavili, yula yashaghiwili mafuta dadumuliwi nakamu dasighali ha hata padokwa. Mbwani na mahali pang'alili munu dafidanganyishiwi na lingandawu lya mtavala yula dayisi kupundangila. Mbelu yaki dayifiki kucha lilava, dakuvi na mgoha danganyishilu kucha wuyilatiwili na Chapanga. 27 Mtavala ayu dalevi kwa chipindi cha myaka saba, pachipita chipndi cha nusu ya mwaka ayi, dapeji ndambiku na ndawulilu. Pambindi ya nyumba ngomi dapavi mahali pa danganyishilu na peni dapayikali mbaka yula lyalivikili padanganyishiwa ngimu wuyilatiwili na Chapanga."