1 Mutwa Daliu adayilili kuvashawula vatangi mya na milongu na vavili kuwolukela milandu ya utavala waki. 2 Wuwula wula avashawulili vatangi vengi vatatu gati yawu aveli Danieli vavawolukeli vala mya na milongu mivili milandu yimwilata mutwa, ili akotoo kupata asala. 3 Kwa chipindi chidokwa hela Danieli amanyikili kucha kanyanyi muchichuku chaki pitu vala vatangi vamonga, topi mutwa ayilatili kumgola ghavi mkomi wa vosi muwutwa waki. 4 Vala vatangi vakomi pamu na vanjagila vasakili cha kumpayishila Danieli kwilata milandu ya wutwa, lakini vapatili ha nongwa ya kumpayishila, wala livifyu lwolwonda, nongwa Danieli avelili akujumilika na yangajila livifyu. 5 Topi vayiwombela, "Datupati wilyambi wowonda wa kumuhigha Danieli, pamongangapa leki wilyambewu dawilati lilawu lya Chapanga waki."

6 Topi ava vatangi na vanjagila kwa pamu vamuyendela mutwa na kumuwombela, "Yuwi mutwa Daliu wikali majuva vosi! 7 Yufwi vatangi vaku yiwutuvikili, vala yivawolukela na vanjagila na vala yiwuwombana nawu twavosi tuwombana kucha, dayivi finofu viki amuli na vandu vayikombikeshi nakamu. Vawombeli kucha kwa majuva milongu mitatu kukotoo kuva na mundu yoyonda yajumishiwa kudadava kwa mlungu yoyonda awu kwa mundu yoyonda ha, ila kwa yuwi mutwa weka yaku, yaleka kukola lilawu ali adangiwi mulyowu lya majabi. 8 Topi yuwi mutwa Daliu vawombeli lilawu ali na kuvika lihundu ili likotoo kughalambuliwa, na ali ndi dalivi lilawu lya Vaamedi na Vaajemi, yighalambuliwi ha." 9 Topi mutwa Daliu kavika lihundu kwa kuyandika lilawu ali. 10 Danieli pamanyili kucha yila hati yivikiwa lihundu, awuyili kayaki muchumbagati chaki chavelili kugolofwa na milanga yaki yafuwukili kulola Yelusalemu. Ngimu wuchivelili chishovi chaki, Danieli adadavili myanja mitatu, kila lijuva kadadava na kumlumba Chapanga waki.

11 Vandu vala yivamnyekwili Danieli vamuyendilili pavava chipinga, vayingila munyumba vamuwona Danieli padadava na kumluva Chapanga waki amtangi. 12 Topi veni vamuyendela mutwa na kumuwombela mutwa kwilata lila lilawu. Vadeta, "Mutwa Daliu wuli, wavikili ng'odu lihundu mu yila hati ya lilawu kucha kwa majuva milongu mitatu kwahela mundu yoyonda yajumishiwa kudadava chochonda kwa mlungu yoyonda awu kwa mundu yoyonda ila kwa yuwi weka yaku, na yoyonda yalileka lilawu ali dadangiwi mulyowu lya majabi." Mutwa kayitikila, "Nahawu ndi wuyivelili, ngimu na malawu va Vaamedi na Vapelisi yaweshili ha kughalambuliwa."

13 Vamuwombela mutwa, "Yula Danieli yavelili yumu wa yivakamuliwili kumgoha kufuma mlima wa Yuda akukutundamila ha yuwi mutwa wala akupikana ha lilawu liwuvikili lihundu lya mawoku. Mweni akudadava myanja mitatu kila lijuva."

14 Mutwa papikanishili filongu fila, ang'ong'utekili munu, ayilatili kumulowola Danieli. Agolili kila ndambu mbaka lijuva palidibili. 15 Vala vandu vamyendela mutwa Daliu kwa pamu vamuwombela, "Yuwi mutwa, ukudayiliwa kumanya kucha kwahela lilawu wala amuli yoyonda ya Vaamedi na Vapelisi yiiwesha kughalambuliwa chipindi mutwa kavika kala lihundu."

16 Topi mutwa Daliu kalayila Danieli vamuyeghi na kumdangila mulyowu lya majabi. Mutwa kamuwombela Danieli, "Chapanga waku yiwumkimbanikila majuva vosi akulowoli." 17 Valiyegha ligonguveli valipuyika pamlyangu wa lila ligoma, Mutwa kalivika lihundu lyaki mweni pamu na wula wa vatangi vaki, ili mundu akotoo kumulowola Danieli. 18 Pambeli mutwa kawuya kunyumba yaki ya wutwa, kalya ha filivi wala kulanda chochosi kagunga mesu.

19 Pamalavila puti mutwa Daliu kayimuka, kayenda kalopu kula kulyowu lya majabi. 20 Pafikili pabehi na lyowu kamkema Danieli kwa lishu lya lusungu, "Danieli, ndumindumi wa Chapanga yavelili mnofu! Wuli, Chapanga waku yiwumkimbanikila majuva vosi kawesha kukugola ukotoo kusatangiwa na majabi ava!"

21 Danieli kayangu, "Mutwa wikali majuva vosi! 22 Chapanga wangu avayeghili vamakunga vaki na avawopili milomu vamajabi vagola chindu ha. Kwanongwa nenga ndina mbatiwa yoyonda ha wala gola chindu chochonda cha wafu ha kwa yuwi."

23 Mutwa asekilelili munu, kalamula Danieli afumishiwi mula muligoma. Topi vamfumisha, na agobulekili ha kwanongwa Danieli amwidumbileyi Chapanga waki. 24 Mutwa alamulili vakamuliwi vala vandu yiva mpayishilili Danieli, vatoliwa na kudangiwa mulyowu lila lya majabi pamu na vehi vawu na vana vawu. Na veni hata vakalihela kutula pasi, majabi vavapundangila na kubenanga mipava yawu.

25 Topi mutwa Daliu kavayandikila vandu va makabila vosi na milima yosi na detelu shosi sha mumlima.

"Nguvaluvila kusika munu!"

26 Deta kucha vandu vonda muwutwa wangu, vamtundamili na kumdadava Chapanga wa Danieli.

Mweni ndi Chapanga yavelili mnofu,

na yayikala jola.

Wutwa waki dawudanganyishiwi ha,

na utavala waki wungajila mbelu.

27 "Mweni akugombola na kulowola,

akugola mihilu na filoja

kumbindi na pamlima.

Nongwa kamlowola Danieli kuwulaghiwa na majabi."

28 Topi Danieli kakwishiwa muwutavala wa mutwa Daliu na mutwa Koleshi, mundu wa Peleshi.