1 Mumwaka wa tatu wa utavala wa Yehoyakimu mutwa wa Yuda, Nebukadinesa mutwa wa Babiloni ayisili Yelusalemu na kwigomba mbwani. 2 Bambu Chapanga amgolili Yehoyakimu mutwa wa Yuda akamuliwi na Nebukadinesa pamu na findu fimu fivelili munyumba ya Chapanga. Topi mutwa Nebukadinesa afikamulili mumgoha findofi kafiyegha kulusanja lwa mlungu waki aku Shinali.

3 Topi mutwa Nebukadinesa kamulayisha Ashipinasi, lijuva limu chilongosi wa vandumindumi va munyumba yaki ya chiwutwa, kamuwombela Ashipinasi amuyegheli fijana va Chisilaeli kufuma mukaya sha chiwutwa. 4 Nebukadinesa alayishili fijana yivaveli na liwovi na yivavayilili, yivavelili na umanyi na yivavelili na luhala lwa kumanya findu kalopu na yivajakwa kukimbanika munyumba ya wutwa. Wuwula wula adayilili fijana ava vawuliwi kusoma na kuyandika kwa detelu ya Babiloni. 5 Ayu Mutwa alayishi kucha kila lijuva vavapi fijana ava filivi fya nyanyi na difwayi nga waghalya na kulanda mweni. Fijana ava vadayiliwili kuwuliwa kwa myaka mitatu, pambeli vayeghiwi kumkimbanikila mutwa. 6 Gati ya fijana yivashawuliwili kufuma kabila lya Yuda, aveli Danieli na Hananiya na Mishaeli pamu na Asaliya. 7 Mkomi wa maafisa kavagayila matawa vashonu, Danieli akemiwili Belitishasa na Hananiya akemiwili Shadilaki na Mishaeli akemiwili Meshaki na Asaliya akemiwili Abelinegu.

8 Lakini Danieli alamulili kwitaya wafu ha kwa kulya filivi fya chiwutwa na difwayi, topi kamuluva mkomi wa vandumindumi va nyumba ya mutwa amjumishi akotoo kulya filivi afi akotoo kwibava na Chapanga, 9 topi Chapanga amgolili mkomi ayu ghavi na utami na kumuwonela lusungu Danieli. 10 Lakini mkomeyu kamuwombela Danieli, "Ngumtila mutwa mweni ndi bambu wangu yanayishili filivi na chilandi chenu, dawoni njimba yaku yiva nofu ha nga fijana vayaku yimulinganilili, akuwesha kung'ulagha."

11 Topi Danieli kamuwombela mdimi yula yashawuliwili na ayu mkomi wa vala yivakimbanika munyumba ya wutwa kuvawolukela Danieli na Hananiya na Mishaeli pamu na Asaliya. 12 "Deku, wutuyeshi yufwi vandumindumi vaku kwa majuva lilongu kwa kutugayila likolu dasi na machi va kulanda hela. 13 Pambeli wutulingi yufwi na ava fijana vengi yivalya filivi fya mutwa, pambeli umweni walamula."

14 Topi yula yavawolukela kajumila kuwusha chilivi cha chiwutwa na difwayi ya chiwutwa yivalayiliwili valyi na kulanda pambeli vagayiliwa makolu na machi va kulanda hela, muwolukela kavayesha kwa chipindi cha majuva lilongu. 15 Pavapitili vala majuva lilongu, avawonili vavayila na njimba shawu shaveli filifili pitu vala fijana yivalili filivi fya chiwutwa. 16 Topi yavawolukela awushili filivi fyawu na difwayi yawu yivawombiliwili valyi badili yaki kavagayila likolu dasi na machi va kulanda.

17 Chapanga kavagayila fijava ava mchechi umanyi na luhunja lwa kila ndambu ya luhunja na luhala chipindi pavayiwuleyi. Pawufileka afi amsangilili Danieli kumanya milotu yosi.

18 Mbelu ya chipindi chivikiwili na mutwa fijana ava vangayeghiwili kwa mutwa ngimu walayishili, yula mkomi wa yivakimbanika munyumba ya mutwa kavayegha fijana vosi pawulongolu ya mutwa Nebukadinesa. 19 Mutwa paywangili na vonda amanyili kucha kwahela yawonikili kava nyanyi nga Danieli na Hananiya na Mishaeli pamu na Asalia. Topi avayingishili mungimbaniku ya kumkimbanikila mutwa. 20 Kila chilongu cha Luhunja na umanyi kwilata chila mutwa angavadashili, fijana vala mchechi vawonikili vanyanyi myanja lilongu pitu vala yivalondola na vayilwana vonda muwutwa waki. 21 Danieli ayikalili munyumba ya wutwa mbaka mwaka wa kwaa wa kutavala mutwa Koleshi.