1 Nenga mutwa Nebukadinesa nguvayandikila vandu va makabila vosi, milima yosi na detelu shosi mumlima.

"Kusika kuvi na yumwi!" 2 Nenga ng'ona nyanyi kuvamanyisha chilangushilu na mihilu yila Chapanga mkomi yanangushili.

3 "Loli ndambu Chapanga filangushilu fyaki wufivelili fikomi!

Mihilu yaki mikomi munu!

Wutwa waki ndi wajola, na akutavala majuva vosi."

4 "Nenga Nebukadinesa, ndayikalili kwa fwamuku kayangu ya chiwutwa. 5 Lakini pandiveyi ng'onja pawulili ndalotili lilotu na lingapusha, hoshu na findifiwonili mumutwi yangu fyagolili ndili. 6 Topi ndalayishili vanaluhunja vosi va Babeli vayeghiwi pawulongolu yangu ili vang'ombeli mana ya lilotu ali. 7 Pavayisili vayilwana na vahavi na Vakalidayu na yivatunga ndavawombilili chinotili, lakini vaweshili ha kung'ombela mana yaki. 8 Pambeli Danieli yakemiwa Beliteshasa, litawa lya mlungu wangu na mfuki wa vamulungu vang'alili vakwikala mugati yaki. Kayisa na nenga ndimuhimulila ali lilotu lyangu. Deta, 9 yuwi Beliteshasa, yiwuvelili mkomi wa vayilwana, manya kucha fuki ya vamulungu vang'alili yikwikala mugati yaku, na kwahela chindu chifisikili chidindala kwa yuwi. Ali ndi lilotu lyangu, ung'ombeli mana yaki.

10 Pang'onjeyi ndafiwonili findu afi, kuna libiki litali munu pagati ya mlima. 11 Libiki lyayendilelili kukula, liva likomi na lidindala na chinamunamu chaki chifika kumbindi kwa Chapanga na lyawonikili kila mahali mumlima. 12 Mihamba yaki yaveli minofu, na wavelikili fivelekwa na fyaweshili kuvakwila vandu va mlima yosi. Vang'ongolu vonda va kumidasi vapatili chimbwepwa cha libiki ali na vambongu vayikalili mumitafyi yaki. Filumbi vonda vapatili filivi kufuma mulibiki ali.

13 Mumilotu ndawonili makungu mng'alili akusunuka kufuma kumbindi kwa Chapanga. 14 Kalandusha lishu kadeta, ‘Mudumuli libiki ali na kudumula dumula mitafyi yaki, mulaghashi mihamba yaki kuchachasha fivelekwa fyaki. Vang'ongolu vatuvi pasi yaki na vambongu vatuvi mumitafyi yaki. 15 Lakini wulileki lisikindwa na mikigha yaki muuganga aku kundenyeku kumidasi midodi, paliva liwopiwa kwa mingongola ya myuma na shaba.

Mumleki mundoyu anyapishiwi kwa mitungwi ya kumbindi kwa Chapanga. Mumleki ayikali pamu na vang'ongolu va kumidasi na kulya midasi kumbuga.

16 Luhala lwaki lughalambuliwi kufuma lwa mundu luvi lwa ng'ongolu, mbaka myaka saba yipiti. 17 Ayi ndi namulilu yilamuliwili na makungu, ndi namulilu ya vala yivavelili vang'alili. Ili vandu vonda kila mahali vamanyi kucha Chapanga mkomi kana uwesu kwa wutwa shonda sha vandu, mweni akumgayila wutwa mundu yoyonda yamtamili, akumgayila wutwa hata mundu msosuvafu nakamu.

18 "Ayi ndi milotu yinotili nenga mutwa Kadinesa," pambeli kadeta, "Ponopa, yuwi Beliteshesa ung'ombeli mana yaki, nongwa yivavelili na luhunja vosi muwutwa wangu vawesha kung'ombela mana yaki, lakini yuwi dawuweshi kwanongwa mfuki wa vamlungu vang'alili vava na yuwi."

19 Topi, Danieli, wuwula wula yakemiwili Beliteshasa, kajinga kwa chipindi chiwutunga na kayihola munu. Mutwa kamuwombela, "Beliteshesa, miloti ayi na mana yaki sikotoo kukukapusha!"

Beliteshesa kamuyangula, "Bambu wangu, ngiba milotu ayi na mana yaki yingavelili kwa vachimdwama vaku!" 20 Libiki likomi na lidindalili liwuliwonili, na mitafyi yaki yifika kumbindi kwa Chapanga na wawonikili kila mahali apa pamlima. 21 Mihamba yaki yavayilili na fivelekwa fyaki fitangalili fya kuvalisha filumbi fyosi, vang'ongolu dasi vakupata lumbwepwa lwaki na vambongu va kululanga vakwikala mumitafyi yaki.

22 "Topi, yuwi mutwa ndi lila libiki. Kuva mkomi na munaliwovi ukomi waku wukula mbaka kumbindi kwa Chapanga na wutwa waku wukwila mbaka kumbelu sha mlima. 23 Yuwi mutwa pambeli kumuwona kandi makungu mng'alili pasunuka kufuma kumbindi kwa Chapanga, kadeta, ‘Mulidumuli libiki ali na kulidanganyisha, lakini muchileki chisikindwa na mikigha yaki muuganga, mumidasi midodi ya kundenyeku, kunu chiwopiwa bahala pala kwa lingongola lya myuma na shaba. Mumleki mundoyu anyapishiwi na mitungwi kufuma kumbindi kwa Chapanga, mumleki ayikali pamu na vang'ongolu va mudasi kwa myaka saba.’

24 Mutwa ayi ndi mana ya milotu yaku, Chapanga mkomi ndi yalamulili kwa yuwi mutwa. 25 Yuwi dawudagidagiwi kutali na vandu, dawikali pamu na vang'ongolu va mudasi na dawulyi midasi kucha senga na dawunyapi mitungwi kufuma kumbindi kwa Chapanga. Dawikali nahawu kwa myaka saba na pambeli dawumanyi kucha Chapanga mkomi ndi yavelili na uwesu kwa wutwa sha vandu na akumwingisha wutwa mundu yoyonda yamdayila mweni. 26 Kandi amuli yila ya kuchileka chisikindwa na mikigha ya libiki ali pamlima yina mana ayi, yuwi dawuwuyishiwi kandi wutwa waku chipindi pawumanya kucha Chapanga wa kumbindi ndi yatavala. 27 Kwanongwa ayi, mutwa pikanishi achi chindikuwombela. Pawuleka sambi shaku na wafu waku goli chila yichimunowesha Chapanga na kuvawonela lusungu yivasulumiwili, dawuyongishiwi fwamuku mungalilu yaku."

28 Fyosefi fyamfikili mutwa Nebukadinesa. 29 Payipitili myesi lilongu na mivili mutwa Nebukadinesa aveli akuyenda yenda kudali ya nyumba ya wutwa ya mbwani ya Babiloni. 30 Kadeta kwa lishu likomi, "Loli Babiloni mbwani yindiyijengili kwa liwovi lyangu yivi makalu vangu va chiwutwa, yikulangusha nenga ndi mkomi na muna liwovi."

31 Tepu mutwa Nebukadinesa paghaveyi akali hela akwifuna kwilata liwovi lyaki, apikanilili lishu kufuma kumbindi kwa Chapanga lideta, "Nguywanga na yuwi mutwa Nebukadinesa, nenga ng'usha liwovi lyaku lya kutavala kucha mutwa. 32 Dawudagidagiwi kutali na vandu, dawikali pamu na vang'ongolu va mudasi, dawulyi midasi kucha senga kwa myaka saba. Pambeli ndi dawumanyi kucha Chapanga ndi muna liwovi likomi kwa wutwa sha vandu na akuwesha kumwingisha wutwa mundu yoyonda yamdayila."

33 Bahala pala fila fidetikili kwilata Nebukadinesa fiva. Vandu avingivingiwili mumbwani ayendi kutali na vandu na alili midasi ngimu senga. Anyapishiwili mitungwi kufuma kumbindi kwa Chapanga, na fwili shaki shavelili ndali na chakachaka kucha mipuku ya ndapu na ngonji shaki shaveli kucha sha mbongu.

34 "Payipitili yila myaka saba," kayendilela kudeta, Nenga Nebukadinesa ng'alama nola kumbindi kwa Chapanga na luhala lwangu lung'uyila. Ndimulumba Chapanga muna liwovi na kumtundamila mweni weka yayikala jola.

"Utavala waki wukwkala jola

Wutwa waki wukwikala fileli na fileli."

35 Vandu vonda va mumlima chindu ha,

akugola ngimu wadayila mweni gati ya makungu va kumbindi kwa Chapanga

kwa mingandawu ya kumbindi kwa Chapanga

na kwahela yawesha kumlimba

awu mundu yawesha kumdasha kucha ukugolela liki nahawu.

36 "Luhala lwangu palung'uyililili, wuwula wula na nyanga kandi utavala wangu, vandu vandundamila kandi kucha mutwa. Vala yivatavala pasi yangu na vandu vamanyikili vang'uyila kugola chichuku pamu na nenga, ndavala kandi muwutwa wangu na ndiva kandi mkomi nga pakwandi."

37 "Ponopa nenga Nebukadinesa ngumjuma na kumtundamila mutwa wa kumbindi kwanongwa ndi Chapanga mkomi. Majuva vonda akugola chivelili nyanyi na telatela. Leki vandu yivayifuna akuvagola vavi vashishamoyu."