1 Lijuva limu mutwa Belishasa avatandilili lihungu likomi maelufu va vatangi vaki na valandili difwayi pamu na mweni. 2 Chipindi Belishasa payendileleghi kulanda difwayi yaki, avawombilili vamuyegheli fikombi fya chumang'andu na fya madini va mbiya fila Nebukadinesa tati mundu aveli kafitola kunyumba ngomi ya Chapanga aku Yelusalemu, ili vafilandili mweni na vatangi vaki vakomi, vehi vaki na fidumu fyaki. 3 Tepu hela fila findu fya chumang'andu na fya madini va mbiya yifitoliwili kunyumba ngomi ya Chapanga vafiyegha, kwa mutwa na vatangi vaki, vehi vaki na fidumu fyaki vafilandila. 4 Valandili kunu pavavajuma vamlungu vawu yigoliwili kwa chumang'andu na kwa madini va mbiya na kwa shaba na kwa myuma na kwa mibiki na kwa migonguveli.

5 Tepu, liwoku lya mundu lifumbuka na kuyandika pachibali cha nyumba ya mutwa, pabehi na chindangawala cha luliku. Mutwa aliwonili liwoku lila paliyandika. 6 Wushu wa mutwa waghalambukili langi na apuvili luhala, fisingu fyaki fihogoya na mawulu vaki vakanda kubagama. 7 Mutwa kavakema vahavi, Vakalidayu yivavelili na luhunja na vayilwana vayisi. Pavafikili mutwa kavawombela ava yivavelili na luhunja va Babiloni naha, "Mundu yoyonda yasoma mayandiku ava na kung'ombela mana yaki, dafwalishiwi yingwa sha salabati na kufwalishiwa mungulu yaki ukufu wa chumang'andu na kugayiliwa fwasi ya tatu muwutwa wangu." 8 Topi, vana luhunja vonda va mutwa vayisa, lakini vaweshili ha kusoma mayandiku vala wala kumuwombela mutwa mana yaki. 9 Topi mutwa Belishasa kayendilela kutila na langi yaki yiyendilela kughalambuka, na vala vatangi vaki vakomi vajuluvala.

10 Mamundu mutwa Belishasa apikanilili mashu va mutwa na va vatangi vaki vakomi, ayisili kayingila pamdamwa wa lihungu. Kadeta, "Yuwi mutwa, kotoo kulilimuka wala kotoo kughalambuka langi nahawu. 11 Muwutwa waku kuna mundu yavelili na mfuki wa vamlungu vang'alili mugati yaki. Chipindi cha wutwa wa tati waku, mundu ayu amanyikili kucha muna umanyi na luhala na luhunja kucha wula vamlungu. Tati waku, mutwa Nebukadinesa amgolili kuva mkomi wa yivatunga na vahavi na Vakalidayu yivelili na luhunja na yivalondola. 12 Mundu ayu kava na luhunja na umanyi wa kukuwombela fiwulotili, na kuhimulila fifisikili pamu na kuwusha misayisayi. Litawa lya mundoyu ndi Danieli yula tati waku amkemili Beliteshasa, topi wumkemi na mweni dakuwombeli mana ya afi fiyandikiwili."

13 Topi, vamuyegha Danieli pawulongolu ya mutwa, mutwa kamdasha, "Yuwi ndi danieli, yumu gati ya vala yivatoliwili kumgoha na tati wangu mutwa wa mlima wa Yuda? 14 Mbikana kucha mfuki wa vamlungu vakugayila yuwi kuva na umanyi na luhala na luhunja lwa paweka. 15 Yivavelili na luhunja na vahawi pavavayeghili apa kusoma na kuhimulila mana ya mayandiku ava valemwili. 16 Lakini mbikana kucha yuwi ukuwesha kuhimulila mana ya milotu na detelu ya chifisu. Topi leki pawuwesha kusoma mayandiku ava na kuhimulila mana yaki, dawufwalishiwi fwali sha paweka sha salabati na kumfwalisha mungulu yaku ukufu wa chumang'andu. na dawuvikiwi fwasi ya tatu ya wutwa awu."

17 Danieli kamuyangula mutwa Belishasa kadeta, "Fupu shaku wikali nashu umweni awu umupi mundu wingi. Nenga dandikusomeli mayandiku ava na kukuwombela mana yaki."

18 "Yuwi mutwa, Chapanga mkomi amgayilili tati waku mutwa Nebukadinesa na ndundamilu na fwamuku pamu na ukomi. 19 Kwanongwa ya ndundamilu shamgayilili tati waku vandu va milima yonda, na detelu shonda vambagamilili na kumtila. Nebukadinesa aweshili kumuwulagha mundu yoyonda na kumleka mkomu mundu yoyonda. Yadayilili kumkwesha chewu amkweshili, na yadayilili kumsunusha chewu amsunushili. 20 Lakini pakandili kuva na lukilu na kwijuma, topi akopushiwili muchigoda chaki cha pakwandi, na kupokiwa wutwa waki. 21 Avingivingiwili kutali na vandu, luhala lwaki lugoliwa kucha lwa ng'ongolu, kayikala na chihongu dasi na aveli akulya midasi kucha senga. Atonyiliwili na ndonya mbaka pamanyili kucha Chapanga mkomi ndi yatavala wutwa sha vandu, na mweni akuwesha kumwingisha wutwa mundu yamdayila."

22 Lakini yuwi Belishasa, mwana wa Nebukadinesa, hata leki kufimanya fyosefi kuva mshishamoyu ha. 23 Badili yaki kwikwesha umweni kwa Bambu wa kumbindi, kufitola findu fya nyumba ya Chapanga kafilandila difwayi, umweni, vatangi vaku vakomi, vehi vaku pamu na fidumu fyaku na kuvatundamila vamlungu yiwuvagolili kwa madini va mbiya na chumang'andu na shaba na myuma na mibiki pamu na migonguveli yingi. Lakini Chapanga yavelili unofu waku wuva mukuwoku yaki, na deha shawu siva lipala kwa mweni, kumtundamila ha. 24 Ndi nongwa Chapanga kalayisha liwoku liyandiki filongu afi.

25 "Mayandi veni ndi ava, ‘MENE, MENE, TEKELI NA PELESI.’ 26 Na mana yaki ndi ayi, MENE mana yaki Chapanga kavalanga majuva va wutwa waku na kuupeja. 27 TEKELI mana yaki, yuwi kulingiwa muchigelu, na kuwoneka kupusuka. 28 PELESI mana yaki, wutwa waku vavaghana Vamedi na Vapelesi."

29 Topi, mutwa Belishasa kalayisha Danieli afwalishiwi yingwa sha paweka sha salabati na ukufu wa chumang'andu mungulu. Na kalandula kucha Danieli dakamulili fwasi ya tatu muwutwa. 30 Pamihi lijuva lilila lila, mutwa Belishasa wa Vakalidayu, awulayiwili, 31 na mutwa Daliu mundu wa Medi kayingila wutwa, kunu kava na myaka milongu sita na mivili.