1 Mwaka wa tatu wa utavala wa mutwa Belishasa, hoshu simonga shamwisilili Danieli, pawusileka hoshu sila sha mwanja mtasi. 2 Muhoshu asi, ndayiwonili ndiva aku Susa kumbwani ngomi ya mkowa wa Elamu. Ndavelili ng'oloka muluwongu ya lweni Ulayi. 3 Panolili kuulongolu, ndawonili fungami likambaku kawoloka muluwongu lya lweni alu, aveli na migomi mivili mitali, lakini limu lyavelili lidokwa munu, lakini yayendilelili kukula. 4 Ndamuwonili yula fungami akupundangila kulola mwambu wa uhehi na kalihingila na kuchanya. Kwahela ng'ongolu yoyonda yagelili kuwoloka kuulongolu yaki wala kwilyepa liwovi lyaki. Agolili nga wadayila mweni na kwikwesha mweni.

5 Pandiveyi ngwihola, tepu libebeli livelili na likomi limu likomi munu kafumbuka kufuma mwambu wa uhehi, kalopu ngajila kugufya uganga. Gati na gati ya mesu vaki avelili na ligomi limu likomi munu. 6 Amuyendilili yula fungami likambaku livelili na migomi mivili yawolukili muluwongu ya lweni, kampundangila kwa maya vaki vonda. 7 Ndimuwona kamkalalila yula meni likambaku kwa maya makomi munu, topi kampundangila kwahilu na kaketula yila migomi yaki mivili yula fungami likambaku aweshili ha kumulimba bebelu. Topi kawa pasi na kuvatangiwa vatangiwa wala kwahela mundu wa kumtanga.

8 Topi yula bebeli kayijuma munu, lakini pafikili pachingomeku cha liwovi lyaki, lila ligomi lyaki likomi liketuka, badili yaki amelili migomi mchechi yiwonikili lipala hela, kunu silola kila mbembi mumlima. 9 Muligomi limu gati ya yila mchechi kwamelili ligomi lingi lidokwa, likula munu kulola mwambu wa kuchanya kundamba na kulola mlima wula wuvelili wanyanyi munu. 10 Ligomi lila likula munu mbaka lifika kulingandawu lya kumbindi lyeni ndi ndondwa, na kusiwisha pasi ndondwa na kusivatanga vatanga. 11 Ligomeli liyijuma kwa lingandawu lya kumbindi, akotushili mitambiku ya kunyanya ya kila lijuva kwa Chapanga na kujowola makalu vaki vang'alili. 12 Kwanongwa ya wafu wa vandu va Chapanga na mitambiku yawu ya kila lijuva vatawulili kwa lila ligomi. Na vandu valeka kujumila unakaka, topi ligomi ali lyaweshili kugola kila chindu lichidayila kugola.

13 Pambeli ndimpikana makungu yumu pawombana na monga kucha, "Wuli, afi yifilanduliwili na hoshu asi dasiyendileli mbaka ndili? Wuli mitambiku ya kunyanyiwa tinigu ya kila lijuva yikotushiwa, na kutoliwa kwa mahali pang'alili na lingandawu liivatangiwa pasi?"

14 Yula makungu wingi kayangula, "Kwa chipindi cha majuva alufu ndatu na mya mbili, pamalavila na palumihi nyumba ya Chapang dayipughiwi kangi."

15 Nenga Danieli pandifiwonili afi, na panyeshili kumanya mana yaki tepu, makungu yayifwanili na mundu awolukili pawulongolu yangu. 16 Pambeli mbikana lishu lya mundu palikema kufuma mula mulweni Ulayi, "Gabulieliii muwombeli mundu ayu mana ya hoshu asi." 17 Paghaveyi akuselela pala pang'olukili ndatilili, ndiwa wifuma.

Kang'ombela, "Yuwi mundu ukudayiliwa kumanya, kucha hoshu asi sikwilata majuva va mbelu." 18 Paghaveyi akuwombana na nenga ndavelili mung'onju libu, kunu ng'onja wifuma. Lakini mweni kangamula na kundandamusha, ng'oloka kwa mawulu vangu. 19 Pambeli kang'ombela, "Pikanishi, ngukuwombela fila yifidayila kufumbuka pambeli muchipindi cha maya va Chapanga, kwanongwa hoshu asi siyilata majuva va mbelu."

20 "Yula fungami likambaku yiwumuwonili yavelili na migomi mivili, ndi yikulangusha wutwa sha Mediya na Pelisia. 21 Yula bebeli ndi mutwa wa Ugiliki na lila ligomi likomi pagati ya mesu vaki ndi mutwa wa kwaa wa Ugiliki. 22 Lila ligomi libenikili na badili yaki yimela migomi mchechi, mana yaki wutwa awu wumu dawuvaghaniki kuva wutwa mchechi, lakini wutwasi dasivi na liwovi ha nga wutwa wula wa kwaa.

23 Filongosi ava pavagola wafu munu Wutwasi dasifiki chingomeku pambeli mutwa yavelili na lukilu yangajila kujumiliwa dafumbuki. 24 Daghavi na liwovi likomi lakini liwovi lyaki mweni ha, dagoli danganyishilu ya kukapusha na kila chagola daweshi. Davadanganyishi vandu yivaveli na liwovi na vang'alili va Chapanga. 25 Kwa usugu waki dapati munatilu yaki ya wafu, na dayikweshi mweni, davadanganyishi vandu vatangalili ngajila umanyi, na dadayili kuleva na Mkomi wa Vakomi lakini mutwa msugu dadanganyishiwi ila kwa uweshi wa chiwundu ha. 26 Hoshu kwilata mitambiku yisitawuliwa pamalavila na palumihi ndi sha nakaka. Lakini ufifisi nongwa na davapiti majuva vatangalili afi ndi dafifumbuki."

27 Pafipitili afi nenga Danieli ndatofyili munu, ndamika kwa majuva vautunga, pambonili panyimukili ndayendililili na fichuku fya mutwa, lakini sila hoshu ndasikang'anikili na ndaweshili ha kusimanya.