1 Mumwaka wa pili wa utavala waki, mutwa Nebukadinesa alotili milotu, aveli na hoshu ngomi munu kwa milotu ayi na aweshili ha kuwonja, 2 topi mutwa avakemili vayilwana na yivalondola na yivakimula na vahavi na vahavi va Vakalidayu ili vamuwombeli nongwa ya milotu yalotili. Pavayingilili munyumba na kuwoloka pawulongolu ya mutwa, 3 kavawombela, "Nota lilotu na likunyasha ngudayila kumanya mana yaki."

4 Veni vamuwombela mutwa kwa detelu ya Chialamu, "Mutwa, wikali jola! Wuvawombeli vandumindumi vaku fiwulotili, na yufwi datukuwombeli mana yaki."

5 Mutwa kavawombela Vakalidayu, "Nenga namula naha leki pamung'ombela ng'odu milotu yangu na mana yaki, dandivadumuli mbiliwa mbiliwa na nyumba shenu dasibowuliwi nakamu. 6 Lakini pamung'ombela milotu ayi na mana yaki, dandivagayili fupu na ndundamilu ngomi. Ponopa mung'ombeli milotu ayi na mana yaki."

7 Veni vamuwombela kandi, "Mutwa, tuwombeli milotu yeni, na yufwi vandumindumi vaku datukuwombeli mana yaki."

8 Topi mutwa kavabwisha kwa kudeta, "Manya nakaka kucha mukwiyashinganya hela ili chipindi chipiti kwanongwa mumanya kucha ngadetili kala, 9 lakini pamumanyisha ng'odu milotu yeni, asabu yenu njifwa hela. Muwombani mujangi na kushengeta shengeta, kunu lijuva likuyenda. Mung'ombeli milotu ayi na nenga damanyi kucha mukuwesha kung'ombela mana yaki."

10 Veni vamuyangula mutwa, "Kwahela mundu yoyonda mumlima yawesha kugola chiwudayila. Wala kwahela mutwa hata ghavi mkomi na muna uweshi wuliwuli, yadashili chindu nga achi kwa vayilwana awu yivatunga ndunga awu vahavi. 11 Chindu chiwudasha yuwi mutwa chidindala munu kwahela mundu yawesha kukumanyisha ila vamlungu weka hela vala yivayikala ng'odu gati ya vandu."

12 Papikanishili nawula, mutwa Nebukadinesa akalalili munu, kavalamula vamachonda vavawulaghi vanaluhunja vosi Mubabiloni. 13 Topi, nandulilu yila yikwila kucha yivaveli na luhunja vosi vawulayiwi, Danieli na vayaki wuwula wula vasakiwa ili vawulayiwi.

14 Danieli kwa kwivavala na luhala amuyendilili Alioku, mkomi wa vadimi va mutwa ayendili kuvawulagha vandu yivavelili na luhunja va Babiloni, Danieli aywangili na mweni kwa luhala na usugu. 15 Danieli kamudasha, "Nongwa liki mutwa kalayila kwa ukali nawula?" Topi Alioku kamuwombela fyosi Danieli.

16 Papikanilili chilongu achi Danieli kamuyendela mutwa, kamuluva amugayili chipindi chidokwa ili aweshi kumuwombela mana ya yila milotu. 17 Pambeli Danieli kawuya kayaki na kuvawombela chilongu chila vaghanja vaki Hananiya na Meshaki na Asalia. 18 Avadedikili vamuluvi Chapanga wa kumbindi avawoneli lusungu kwilata nongwa ayi, ili mweni na vaghanja vaki vakotoo kuwulayiwa pamu na vandu yivavelili na luhunja va Babeli. 19 Chipindi cha pamihi Danieli kalangushiwa yila milotu na mana yaki. Topi Danieli kamulumba Chapanga wa kumbindi.

20 Kadeta, "Ajumiwi Chapanga jola

luhunja na uweshi fyosi fyaki.

21 Mweni akufigola findu fyosi figoleki kwa chipindi cheni,

Mweni akuvawusha na kuvavika vatwa,

akuvapa luhunja na umanyi vaweshi kutavala.

22 Akuvika lipala fidindalili na fifisikili,

akumanya fiveli mulwisa

mweni akwikala mungesha

23 Ngukulumba na kukujuma yuwi Chapanga wa vambuyi vangu,

kugayila luhunja na liwovi,

kumanyisha chila chitukuluvili,

kutugola tumanyi milotu ya mutwa."

24 Topi Danieli kamuyendela Aliyoku yavelili kashawuliwa kuvawulagha vana luhunja va Babiloni kamuwombela, "Kotoo kuvawulagha vana luhunja va Babiloni, ila unyeghi kwa mutwa na nenga dandimuwombeli mana ya milotu yaki."

25 Aliyoku kamuyegha Danieli kalopu kwa mutwa na kumuwombela, "Ndimupata mundu gati ya vala yivavelili vayeghiwa kufuma Yuda, yawesha kukuwombela milotu yaku yuwi mutwa."

26 Mutwa kamudasha Danieli, wuwula wula vamkemili Beliteshasa, "Wuli, ukuwesha kung'ombela chinotili na mana yaki?"

27 Danieli kamuyangula, "Kwahela munaluhunja awu muhavi awu mwilwana awu mundu yatunga ndunga yawesha kumuwombela mutwa chilongu achi chifisikili. 28 Ila kuna Chapanga wa kumbindi yafisula fifisu. Kamulangusha mutwa Nebukadinesa yichidayila kufumbuka majuva vesava. Topi dandikuwombeli milotu yaku na fila fiwilata kumutwi yaku pawuveyi mung'onju ndi afi."

29 "Yuwi mutwa, pawuveyi mung'onju sikwisila hoshu sha milandu yiidayila kufumbuka majuva vesava, na Chapanga ndi yafisula findu yififisikili na akulangushili fila yifidayila kufumbuka. 30 Nenga ndiva na luhunja pitu vandu vonda ha, lakini Chapanga kukufisulila chifisu cha milotu yaku kwanongwa akudayilayuwi umanyi mana yaki. Mweni akudayila yuwi umanyi chila chivelili kumutwi yaku."

31 "Mutwa, mumilotu yaku wawonili ling'omung'omu liveli kucha mundu, likomi na yiling'ala na yavelili yilikakapusha vandu pavalilola. 32 Mutwi wa lila ling'omung'omu wagoliwili kwa chumang'andu yisingiwili finofu, chifuva chaki na mawoku vaki vavelili vagoliwa kwa madini va mbiya, lida lyaki na miwondu yaki yavelili ya shaba. 33 Mawulu vaki vavelili va lyuma na njapu shaki shavelili siyitovikela kwa lyuma na ukaka. 34 Pawuveyi ukali ukalola, ligonguveli lyatupukili lyeni kuchidunda ngajila kugufyiwa na mundu na kubajanga mawulu va shaba na ukaka va lila ling'omung'omu, na kubungunyula nakamu. 35 Tepu lila lyuma na ukaka na madini va mbiya pamu na chumang'andu, fyosi fidumuka mbiliwa mbiliwa, na kuva kucha myeyu ya mahali yipatutila filivi chipindi cha mkakamu. Liyegha lifidangila kutali hata mbiliwa yimu yisighala ha, lakini lila ligonguveli liibungunyulili lila ling'omung'omu lighalambuka kuva chidunda chikomi na kwikwisha mlima wonda."

36 "Ali ndi lilotu lyaku mutwa, na ponopa dandikuwombeli mana yaki. 37 Yuwi mutwa ndi mutwa pitu vatwa vosi. Chapanga wa kumbindi kakugayila yuwi utavala na uweshi na liwovi na ukomi. 38 Chapanga kakugayila uwesu wa kutavala vandu vonda, vang'ongolu va kumidasi na vambongu vonda va kululanga, kokosi kula kuvavelili. Yuwi ndi nga wula mutwi wa chumang'andu. 39 Pawupita yuwi wutwa wingi dawisi, lakini wutwa awu dawuvi na liwovi ha, na dawisi wutwa wa tatu wuulingiwa na shaba, awu dawutavali mlima wonda. 40 Pambeli dawisi wutwa wa mchechi, wuvelili na liwovi nga lyuma, nga wulivelili lyuma likubija na kubajanga findu fyonda. Wutwa wisawu dawubenangibenangi na dawushi nakamu ndambu ya kutavala sha wutwa shonda yisilongulili. 41 Ngimu wula wulotili kucha njapu na fyala fya ling'omung'omu ali wufivelili nusu ukaka na nusu chuma. Ayi yikulagusha kucha wutwa awu dawuvaghaniki, mwambu wumu dawuvi na liwovi nongwa chuma chikulangusha liwovi. 42 Nga fyala fyaki fya mawulu fyavelili nusu chuma na nusu ukalakala, ayi yikulangusha kucha wutwa awu dawuvi naliwovi mwambu wumu na usosuvafu mwambu wumu. 43 Ngimu wula wuwonili, chuma chiyihasha na ukaka. Ayi yikulangusha wutwa awu dawuvagoli vandu vayilumbi kwa kwitola. Lakini davaweshi ha kwilumbi pamu kuva chindu chimu, nongwa chuma chikuwesha ha kwilumba na ukaka. 44 Mumajuva va vatwa ava Chapanga daviki wutwa wudindalili hata lijuva limu dawudanganyishiwi ha, wala vandu vangi davatavali ha, dawusibajangi wutwa shosi na kusipeja nakamu, weni dawikali jola. 45 Waliwonili ligonguveli litupukili lyeni kufuma kuchidunda, ngajila kugufiwa na mundu lila ligonguveli libenangili mbiliwa mbiliwa lila ling'omung'omu ligolikili kwa chuma na shaba na ukaka na madini va mbiya pamu na chumang'andu. Yuwi mutwa Chapanga mkomi kakugubutulila findu dafifumbuki pambeli. Ndikuwombela miloti yaku na mana yaki ndi ya nakaka."

46 Topi mutwa Nebukadinesa kawa wifuma na kumgondamila Danieli na kalayisha vamtawulili Danieli litambiku na ubani. 47 Mutwa Nebukadinesa kamuwombela Danieli, "Nakaka Chapanga waku ndi mkomi pitu vamlungu vosi na Bambu wa vatwa na ndi yafumbula fisu shosi, kwanongwa kuwesha kufisula fisu ayi." 48 Pambeli mutwa kamuvika Danieli fwasi ngomi muutavala waki na kumgayila fupu sitangalili, na kumgola mtavala wa mkowa wosi wa Babiloni na kumvika mkomi wa vosi yivavelili na luhunja. 49 Danieli kamluva mutwa avavika Shadilaki, Meshaki na Abedinegu kuva vawolukela va ngengileka ya utavala wa mkowa wa Babiloni, Lakini Danieli kasighala munyumba ya wutwa.