1 Mutwa Nebukalinesa alayishili vandu vaki vagoli ling'omung'omu lya chumang'andu livelili na utali wa ngatachifuva milongu mivili na saba na ukingika waki ngatachifuva ndatu. Kayikimika kunyililili ya Dula kumkowa wa Babiloni. 2 Pambeli mutwa avalalikili vakomi na yivawolukela na vala yivawombana na mweni na yivakamulila sanja na Valamula pamu na filongosi vaki vonda va mumkowa vayisi kulihungu lya kukanda kulitundamila ling'omung'omu lyakimikili. 3 Topi vosi avalalikili vayisili kulihungu lya kukanda kulitundamila ling'omung'omu lyavikili mutwa Nebukadinesa. 4 Mundu wa yandusha kalandusha kwa lishu likomi kadeta, "Yumwi vandu va makabia vosi, milima na detelu shosi achi ndi chimudayiliwa kugola! 5 Pamupikana lishu lya limbalapi na filimbi na malimba na liwombu na misambu ya ndambu shonda, mulitundami mbaka pasi na kuligondamila ling'omung'omu lyakimikili mutwa Nubukadinesa. 6 Mundu yoyonda yaligondamila ng'odu mbaka pasi dadangiwi mulitanuli lya motu mkomi." 7 Topi, vandu vonda pavapikanishili mashu va limbalapi, miluli na miwombu na misambu yimonga vawili wifuma na kwigondamili lila ling'omung'omu lya chumang'adu lyakimikili mutwa Nebukadinesa.

8 Chipindechi Vakalidayu vamu vayisili kuvahigha Vayawudi kwa mutwa Nebukadinesa, 9 vamuwombela, "Yuwi mutwa wikali jola! 10 Bambu wadetili kucha kila mundu papikana lishu lya limbalapi, miluli, chinumbi liwombu, ligombugombu na ndambu shonda sha misambu agondami pasi ili kuligondamila lila ling'omung'omu lya chumang'andu. 11 Hata naha mundu yoyonda paligondamila ng'odu ali ling'omung'omu, dadangiwi mumotu wuyaka veliveli. 12 Ponopa kuna Vayawudi vamu yiwuvavikili vawolukeli milandu ya utavala wa mkowa wa Babiloni, ava ndi Shadilaki na Meshaki pamu na Abedinegu, vandu ava vakukupikana ha yuwi mutwa. Valema kukupikana yuwi na kuligondamila lila ling'omung'omu lya chumang'andu liwukimikili."

13 Topi mutwa Nebukadinesa papikanishili akalalili munu na kuva na chifuki chikomi, kalayisha Shadilaki na Meshaki pamu na Abedinegu vayeghiwi kwa mweni. Na vosi vayeghiwa. 14 Mutwa Nebukadinesa kavadasha, "Wuli, yuwi Shadilaki na yuwi Meshaki pamu na yuwi Abedidinegu mukuvakimbanikila ng'odu vamlungu vangu wala kuligondamila lila ling'omung'omu lingimikili? 15 Topi pamupikana kandi lishu lya limbalapi na miluli, chinumbi, liwombu, malimba na mashu vamonga va misambu, topi mukudayiliwa kuligondamila mbaka pasi ling'omung'omu ligolili? Leki, tepu damudangiwi mulitanuli lya motu yiliyaka vekuveku. Topi tuloli mlungu liki daweshi kuvalowola."

16 Topi Shadilaki na Meshaki pamu na Abedinegu vamuyangula mutwa, "Yuwi Nebukadinesa, yufwi tuyangula ha kwilata chindu achi. 17 Leki patudangiwa mulitanuli lya motu, Chapanga yitumkimbanikila daatulowoli na motu awu, na datulowoli muliwovi lya yuwi mutwa. 18 Lakini hata leki patulowola ng'odu, yuwi mutwa tukudayila umanyi kucha yufwi datuvakimbanikili ha vamlungu vaku wala kuligondamila ling'omung'omu lya chumang'andu liwukimikili."

19 Topi mutwa Nebukadinesa kakoliwa na maya, mbaka wushu waki wughalambuka kwa chifuki kwilata Shadilaki Meshaki na Abedinegu. Topi kalayisha vandu vakoshileli motu wuyaki veliveli wuyongishiwi myanja saba pitu wula wa myanja yosi. 20 Topi kavalayisha vandu yivavelili na liwovi mulingandawu lyaki vavawopi Shadilaki na Meshaki pamu na Abedinegu vadangiwi mulitanuli lila yiliyaka vekuveku. 21 Topi fijana vala vavawopa kunu vafwalilila mikoti yawu na mihabiti yawu na fihaluma shawu na fwali shawu singi, vadangiwa pagati ya lila litanuli yiliyaka motu vekuveku. 22 Kwanongwa mutwa akuvilishili munu, na wula motu vakoshileliwili munu wuva vekuku, mbaka myengi yivagwijusha vala vandu yivavayeghili Shadilaki, Meshaki na Abedinegu. 23 Vandu ava vatatu kunu vawopiwa nywinywi, vavadangila mulitanuli lila livelili likuyaka vekuveku. 24 Topi mutwa Nebukadinesa kajinga, katandamuka kalopu kavadasha vala yivawombana na mweni, "Wuli, vavelili vandu vatatu nda yivawopiwili na kudangiwa mumotu?"

Veni vayangula, "Yina mutwa yikavelili nahawu."

25 Pambeli kadasha, "Mbona nguvawona vandu mchechi vakuyendayenda mumotu ngajila kuwopiwa wala kulungula, na yula mundu wa mchechi akuwoneka kucha mwana wa mlungu."

26 Topi mutwa kawuselilela mlyangu wa litanuli livelili na motu wuuyaka vekuveku kakema kwa lishu likomi, "Shadilaki, Meshaki na Abedinegu vandumindumi va Chapanga mkomi, mufumi mumotu!" Shadilaki, Meshaki na Abedinegu vafuma. 27 Vanjagila na yivawolukela na vakomi va mikowa na vala yivawombana na mutwa, vonda vayikungasha kuvashengitela, vawona motu uwesha ha kuvalungusha njimba shawu wala fwili shawu, wala mihabiti yawu yilungula ha, na vanungili ha lyosi.

28 Topi, Nebukadinesa kadeta, "Ajumiwi Chapanga wa Shadilaki, Meshaki na Abelinegu kwanongwa amulayishili makungu waki kuvalowola vandumindumi vaki yivamwidumbila mweni, Veni valemili kupikana amuli yangu ya chiwutwa vajumilili kusova kuliku kukimbanikila awu kugondamila mlungu yoyonda ila Chapanga wawu weka hela.

29 Topi ngulayila kucha vandu va kabila yoyonda awu mlima wowonda awu detelu yoyonda, yivadayila kudeta chindu chochonda cha wafu kwilata Chapanga wa Shadilaki, Meshaki na Abedinegu vadumuliwi mbiliwa mbiliwa na nyumba shawu sibowuliwi, kwanongwa kwahela mlungu yoyonda yawesha kulowola nahawu."

30 Pambeli mutwa kavagayila fyewu fingi fya pambindi Shadilaki, Meshaki na Abedinegu mumkowa wa Babiloni.